1, 2. a) Pa geꞌi, ¿tenguꞌä nꞌa rä hogä regalo? b) ¿Por hanja xi nꞌa rä däta regalo näꞌä rescate bi uni Jeoba?

PA GEꞌI, ¿tenguꞌä nꞌa rä hogä regalo? Nꞌa rä hogä regalo, hindi ja mꞌe̱di di muui ndunthi rä bojä. Mu̱ nꞌa rä regalo bi jaꞌi gä johya, o mu̱ näꞌä bi tꞌaꞌi xa mi jaꞌi mꞌe̱di, zäi ge xa gä umbäbi njamädi näꞌä toꞌo bi rꞌaꞌi.

² De gatꞌho näꞌä xä rꞌakägihu̱ Jeoba, ꞌnehe xä rꞌakägihu̱ nꞌa rä däta regalo näꞌä xa di jakägihu̱ mꞌe̱di: Jeoba bi uni nꞌa rä rescate nuꞌmu̱ bä pe̱hni Ñhesukristo, näꞌä rä hmäkä Tꞌu̱ pa bi uni rä te, ꞌne njabu̱ di pe̱ꞌtsihu̱ rä oportunida de gä ꞌmu̱ihu̱ pa nzäntho (hñeti Mateo 20:28). ¡Rä Zi Dada Jeoba xä ꞌñudi hängu di mäkägihu̱, hänge bi uni nunä rescate! Ha nunä ntheke, ma gä pädihu̱ ndunthi de nunä regalo.

3. ¿Por hanja di tuhu̱?

³ Rä rescate näꞌä nꞌa rä njutꞌi bi uni rä Zi Dada Jeoba pa dä ñäni yä jäꞌi de rä pekado ꞌne de rä du (Efesios 1:7). ¿Por hanja mi ja mꞌe̱di nunä njutꞌi? O̱tꞌe rꞌa yä mꞌo yä je̱ya, ha rä jardin de Edén, Adán ꞌne Eva bi zo ha rä pekado hänge nuꞌu̱ bi du. Koꞌmu̱ Adán ꞌne Eva geꞌu̱ mä mu̱di dadahu̱, nuꞌu̱ bi zogägihu̱ rä pekado hänge di tuhu̱ ꞌnehe. (Hyandi rä nota 9, «Pekado»).

4. ¿Toꞌo Adán ꞌne mi tenguꞌä nuꞌmu̱ Jeoba bi hyoki?

⁴ Nuꞌmu̱ Jeoba bi hyoki Adán, bi hyoki mrä perfecto. Bi umbäbi nꞌa rä ndoyꞌo ꞌne nꞌa rä mfeni näꞌä hinte  mä tsꞌoki mi ñꞌoui. Adán bi thoki pa nunka xä ñheni, nunka xä nxita, ꞌne nunka ma xä du. Koꞌmu̱ Jeoba go bi hyoki Adán, Jeoba bi zo̱ho̱ bi nja nꞌa rä Dada pa geꞌä (Lucas 3:38). Jeoba njatꞌä mi ñäui Adán. Jeoba bi esplikabi Adán te mi to̱ꞌmi de geꞌä, ꞌne bi mändabi dä ja nꞌa rä me̱fi xa mähotho (Génesis 1:28-30; 2:16, 17).

5. ¿Te signifika ora rä Biblia enä ge Jeoba bi hyoki Adán ja nguꞌä?

⁵ Jeoba bi hyoki Adán ja nguꞌä (Génesis 1:27). Adán bi thoki pa dä ꞌñudi ꞌnehe rä mhäte, rä mfädi, rä justisia ꞌne rä tsꞌe̱di, ja ngu udi Jeoba. Jeoba himbi hyoki Adán ngu nꞌa rä mäkinä pa xä obligabi te dä me̱fi. Jeoba bi hyoki Adán pa xä huahnise̱ mu̱ mi ne dä me̱fi näꞌä xä ñho o näꞌä xä ntsꞌo. Mu̱ Adán xä huahni xä yꞌo̱te Jeoba, nuꞌmu̱ ma xä za xä mꞌu̱i pa nzäntho ha nꞌa rä Paraiso nuua ha rä Xiꞌmhai.

6. a) ¿Te bi thogi Adán ꞌne Eva nuꞌmu̱ bi huahni hindä yꞌo̱te Jeoba? b) ¿Te di thogihu̱ mäpaya po rä tsꞌoki Adán ꞌne Eva?

⁶ Adán bi huahni hindä yꞌo̱te Jeoba, ꞌne po geꞌä bi gutꞌi xä mädi; Adán bi ꞌme̱di näꞌä rä hogä ntsitsꞌi mi pe̱ꞌtsi ko rä Zi Dada Jeoba, bi zo ha rä pekado, bi tꞌe̱ni de rä Paraiso, ꞌne pa ri uadi bi du (Génesis 3:17-19). Adán ꞌne Eva himbi yꞌo̱te Jeoba, hänge nuꞌu̱ bi ꞌme̱di näꞌä rä oportunida xki tꞌumbäbi de dä mꞌu̱i pa nzäntho. Po näꞌä bi me̱fiꞌu̱, rä pekado bi yu̱tꞌi ha rä xiꞌmhai hänge gatꞌho di tuhu̱, ngeꞌä gatꞌho xtä ehehu̱ de Adán ꞌne Eva (Romanos 5:12). Ko näꞌä bi me̱fi Adán, dä tsohu̱ kongeꞌä ha rä pekado ꞌne ha rä du (Romanos 7:14). Pe xi nuju̱, ¿ma gä tuhu̱ pa nzäntho ngu Adán ꞌne Eva? Hinä, ¡ngeꞌä Jeoba bi uni nꞌa rä rescate po gekhu̱!

7, 8. ¿Te me̱ꞌä nꞌa rä rescate?

⁷ ¿Te me̱ꞌä nꞌa rä rescate? Nꞌaa, näꞌä di njutꞌi pa drä nrekupera nꞌa rä kosa näꞌä xä tꞌe̱ntꞌä mprenda o pa dä  the̱gi nꞌa rä jäꞌi näꞌä xä nsekuestra. Yoho, geꞌä rä presio di njutꞌi po nꞌa rä dañu.

⁸ Ninꞌa rä mexiꞌmhai himi tsa dä gutꞌi näꞌä rä dañu bi zoogi Adán. Ho̱nse̱ rä Zi Dada Jeoba bi za bi gutꞌi po gekhu̱, ꞌne njabu̱ bi ñängägihu̱ de rä pekado ꞌne de rä du. ¿Te mä benefisio di hänihu̱ de näꞌä njutꞌi bi uni Jeoba? Ma gä handihu̱.

9. ¿Hanja mi debe dä njutꞌi näꞌä rescate?

⁹ Ninꞌa rä jäꞌi himi tsa dä gutꞌi näꞌä presio pa dä rekupera näꞌä rä te bi ꞌme̱di Adán. ¿Por hanja? Ngeꞌä gatꞌho yä jäꞌi xä mꞌu̱i ko rä pekado (Salmo 49:7, 8). Koꞌmu̱ Adán mi rä perfecto, mi ja mꞌe̱di mä nꞌa rä jäꞌi näꞌä rä perfecto (1 Timoteo 2:6). Hää, mi ja mꞌe̱di dä njutꞌi nꞌa rä rescate näꞌä di ñhe̱hui rä presio ko näꞌä rä te bi ꞌme̱di Adán.

10. ¿Te bi me̱fi Jeoba pa bi gutꞌi näꞌä rescate?

¹⁰ ¿Te bi me̱fi Jeoba pa bi gutꞌi näꞌä rescate? Bä pe̱hni rä Hesu ha rä Xiꞌmhai, näꞌä rä Hmäkä Tꞌu̱ (1 Juan 4:9, 10). Rä Hesu bi mꞌu̱i dispuesto dä zoogi rä Dada ꞌne näꞌä rä nsu mi pe̱ꞌtsi ha mähetsꞌi (Filipenses 2:7). Rä Zi Dada Jeoba bä pombäbi rä te näꞌä rä Tꞌu̱ pa ha rä mu̱i nꞌa rä nxutsi mi rä thuhu María. Hänge rä Hesu bi za bi mꞌu̱i nsi rä pekado nuua ha rä Xiꞌmhai (Lucas 1:35).

11. ¿Por hanja ko näꞌä rä te bi uni rä Hesu bi za bi njutꞌi nꞌa rä rescate po gatꞌho yä mexiꞌmhai?

¹¹ Adán bi hñäkuäbi gatꞌho yä jäꞌi näꞌä rä oportunida de dä me̱ꞌtsi nꞌa rä te nsi rä pekado. ¿Toꞌo ma xä za xä ñäni yä mexiꞌmhai? (Hñeti Romanos 5:19). Koꞌmu̱ rä Hesu hinte mä pekado mi pe̱ꞌtsi, bi uni rä te pa bi  njutꞌi nꞌa rä rescate, pa njabu̱ yä jäꞌi dä za dä kꞌotꞌi de rä pekado ꞌne de rä du (1 Corintios 15:21, 22, 45).

12. ¿Por hanja rä Hesu pe̱ꞌtsi te bi thogi po ndunthi yä sufrimiento?

¹² Rä Biblia xikägihu̱ hängu bi sufri rä Hesu änte de xä du. Näꞌä bi tꞌumbä yä ñu̱ntꞌi ꞌnepu̱ bi tsꞌu̱ti ha nꞌa rä zaa habu̱ bi du rꞌamätsꞌu̱u̱ (Juan 19:1, 16-18, 30, TNM). ¿Por hanja rä Hesu pe̱ꞌtsi te bi thogi po ndunthi yä sufrimiento? Ngeꞌä rä Zithu xki mää ge mu̱ toꞌo dä thogi yä däta prueba hingä ma dä yꞌo̱te rä Zi Dada Jeoba. Pe rä Hesu, nꞌa rä ñꞌo̱ho̱ näꞌä himi ñꞌoui rä tsꞌoki, bi ꞌñudi ge hää dä za toꞌo dä yꞌo̱te rä Zi Dada Jeoba, mäske po geꞌä dä sufri ndunthi asta xa dä tho. ¡Imäjinä hängu rä johya bi senti rä Zi Dada Jeoba mi hyandi ge rä Tꞌu̱ bi ze̱ti gatꞌho näꞌä bi tꞌo̱tꞌpäbi! (Proverbios 27:11). (Hyandi rä nota 15, «Rä ponza»).

13. ¿Hanja ꞌne habu̱ bi njutꞌi näꞌä rescate?

¹³ ¿Hanja ꞌne habu̱ bi njutꞌi näꞌä rescate? Ha rä 14 de nisán de rä je̱ya 33, rä Zi Dada Jeoba bi hye̱gi ge nuꞌu̱ yä nkontra rä Hesu bi hñäkuäbi rä te (Hebreos 10:10, TNM). Pe rä hñupaꞌä, rä Zi Dada Jeoba bi gu̱tsꞌi rä Hesu de rä du, ꞌne bi umbäbi rä te ngu nꞌa rä espiritu. Mi mengi ha mähetsꞌi, rä Hesu bi ntregabi Jeoba näꞌä rä presio pe̱ꞌtsi näꞌä rä te bi uni nuua ha rä Xiꞌmhai (Hebreos 9:24, TNM). Jeoba bi asepta näꞌä njutꞌiꞌä o rescate hänge nubye̱ di pe̱ꞌtsihu̱ rä oportunida de gä kꞌotꞌihu̱ de rä pekado ꞌne de rä du (hñeti Romanos 3:23, 24, TNM).

14, 15. ¿Te mähyoni gä pe̱fihu̱ pa gä hänihu̱ rä mpumbäte po mä pekadohu̱?

¹⁴ Ma gä handihu̱ rꞌa de nuꞌu̱ yä benefisio ya di  hänihu̱ mäpaya ꞌne nuꞌu̱ yä benefisio ma gä hänihu̱ mꞌe̱fa po mäde de näꞌä rä däta regalo xä uni rä Zi Dada Jeoba.

¹⁵ Dä za gä hänihu̱ rä mpumbäte po mä pekadohu̱. Gatꞌho di jakägihu̱ xä ñhei gä pe̱fihu̱ näꞌä xä ñho. Rꞌabu̱ hingä geꞌä di pe̱fihu̱ o hingä geꞌä di mäñhu̱. Hänge pa gä hänihu̱ rä mpumbäte de nuꞌu̱ mä pekadohu̱, mähyoni gä arrepentihu̱ ko ngatꞌho mä korasohu̱ ꞌne gä apäbihu̱ rä Zi Dada Jeoba ge dä punꞌgägihu̱ (Colosenses 1:13, 14; 1 Juan 1:8, 9).

16. ¿Te mähyoni gä pe̱fihu̱ pa gä pe̱ꞌtsihu̱ nꞌa rä konsiensia xä ntꞌaxi?

¹⁶ Dä za gä pe̱ꞌtsihu̱ nꞌa rä konsiensia xä ntꞌaxi. Ora mä konsiensiahu̱ tsu̱kägihu̱, jakägihu̱ gä sentihu̱ ge hinte mä humu̱i di pe̱ꞌtsihu̱ o ge hinte rä me̱kägihu̱. Pe mu̱ gä bäntebihu̱ rä Zi Dada Jeoba ge dä punꞌgägihu̱, näꞌä ma dä yꞌo̱xkägihu̱ ꞌne ma dä punꞌgägihu̱ (Hebreos 9:13, 14). Rä Zi Dada Jeoba ne gä petuäbihu̱ gatꞌho nuꞌu̱ yä xuñha o debilida di pe̱ꞌtsihu̱ (Hebreos 4:14-16). Mu̱ gä jabu̱hu̱, ma dä za gä pe̱ꞌtsihu̱ nꞌa rä konsiensia xä ntꞌaxi ante Jeoba.

17. ¿Te mä jäpi ma dä za gä hänihu̱ po mäde de näꞌä rä te bi uni rä Hesu?

¹⁷ Dä za gä ꞌmu̱ihu̱ pa nzäntho. «Näꞌä rä njutꞌi uni rä pekado, geꞌä rä du, pe näꞌä regalo uni Äjuä, geꞌä rä te pa nzäntho po mäde de rä Kristo Ñhesu näꞌä mä zi Hmuuhu̱» (Romanos 6:23, TNM). Po mäde de näꞌä rä te bi uni rä Hesu, di pe̱ꞌtsihu̱ rä humu̱i de gä ꞌmu̱ihu̱ pa nzäntho nsi yä u̱gi nixi yä ñheni (Apocalipsis 21:3, 4). ¿Te mähyoni gä pe̱fihu̱ pa gä hänihu̱ nuya yä jäpi?

18. ¿Hanja di pädihu̱ ge rä Zi Dada Jeoba ꞌne rä Hesu xa di mäkägihu̱?

¹⁸ Ora tꞌakägihu̱ nꞌa rä regalo xa mähotho, ¿hänge xa di jamädibihu̱ näꞌä toꞌo bi rꞌakägihu̱? Pe de gatꞌho nuꞌu̱ yä regalo xtä hänihu̱, rä rescate geꞌä mänꞌa rä däta regalo xä rꞌakägihu̱ rä Zi Dada Jeoba, hänge ri ꞌñehe gä jamädibihu̱ ndunthi po geꞌä. Rä Biblia enä: «Äjuä xi bi mädi ntsꞌe̱di gatꞌho yä jäꞌi de rä xiꞌmhai, hänge bä pe̱hnä rä rꞌa Tꞌu̱» (Juan 3:16). Hää, rä Zi Dada Jeoba xa di mäkägihu̱ hänge bä pe̱hni rä Tꞌu̱. Rä Hesu ꞌnehe xa di mäkägihu̱ hänge bi mꞌu̱i dispuesto dä du po gekhu̱ (Juan 15:13; Gálatas 2:20).

19, 20. a) ¿Te mähyoni gi pe̱fi pa dä za gi yꞌo̱tꞌe ri amigo Jeoba? b) ¿Hanja dä za gi ꞌñudi ge gi huxä ri komfiansa ha näꞌä rä te bi uni rä Hesu?

¹⁹ Ya dä pädihu̱ hängu di mäkägihu̱ rä Zi Dada Jeoba. Pe, ¿hanja dä za gi yꞌo̱tꞌe ri amigo? Mäjuäni ge xä ñhei gä mädihu̱ nꞌa rä jäꞌi näꞌä hindi pädihu̱. Pe rä Biblia, ha Juan 17:3 enä ge nuju̱ dä za gä pädihu̱ toꞌo Jeoba. Pa geꞌä, mähyoni gi sigi gi nxadi rä Biblia (1 Juan 5:3). Entremäs gi pädi de Jeoba, mänꞌa ma gi mädi ꞌne mänꞌa ma gi ne gi pe̱päbi nuꞌu̱ yä mhända. ¡Njabu̱ ma dä zo̱ho̱ gi yꞌo̱tꞌe ri amigo!

²⁰ Hñuxä ri komfiansa ha näꞌä rä te bi uni rä Hesu. Rä Biblia enä ge «nuꞌä toꞌo kamfri rä Tꞌu̱» go geꞌä ma dä me̱ꞌtsä «rä te pa nzäntho» (Juan 3:36). ¿Te di signifika “gä kamfrihu̱ rä Tꞌu̱”? Ge hingä kombasta gä mäñhu̱ ge di kamfrihu̱ rä Hesu, mähyoni gä pe̱fihu̱ gatꞌho näꞌä bi ꞌñudi (Juan 13:15). Pe mu̱ hindi pe̱fihu̱ näꞌä bi ꞌñudi ꞌne näꞌä bi mända rä Hesu, hinte di muui näꞌä mä jamfrihu̱ (Santiago 2:26).

21, 22. a) ¿Por hanja debe gä ntinihu̱ tatꞌä je̱ya ha näꞌä rä Fenäte de rä du rä Hesu? b) ¿Te ma gä pädihu̱ ha rä ntheke 6 ꞌne 7 de nunä mfistꞌofo?

 ²¹ Ntini ha rä Fenäte de rä du rä Hesu. Näꞌä xui änte de xä du rä Hesu, näꞌä bi mända gä o̱tꞌehu̱ nꞌa rä fenäte de rä du. Nunä fenäte di tꞌo̱tꞌe tatꞌä je̱ya, ꞌne tꞌembäbi rä Fenäte de rä du rä Hesu o «rä Mäkä Ntꞌoxi» (1 Corintios 11:20; Mateo 26:26-28). Rä Hesu ne ge hingä pumfrihu̱ ge näꞌä bi uni rä te pa bi ñängägihu̱. Näꞌä bi ꞌñenä: «Sigi gi yꞌo̱thu̱ njaua ngu nꞌa rä fenäte de gekägi» (hñeti Lucas 22:19, TNM). Hänge mu̱ gi ntini ha nunä Fenäte pa gi beni rä du rä Hesu, ma gi ꞌñudi ge gi jamädi po näꞌä rä mhäte xä rꞌakägihu̱ rä Zi Dada Jeoba ꞌne rä Hesu. (Hyandi rä nota 16, «Rä Fenäte de rä du rä Hesu»).

²² Näꞌä rä rescate bi tꞌuni po gekhu̱ geꞌä rä regalo mänꞌa xa mähotho xtä hänihu̱ (2 Corintios 9:14, 15). Ha rä ntheke 6 ꞌne 7 de nunä mfistꞌofo, ma gä pädihu̱ hanja nunä rescate ma dä benefisiabi asta nuꞌu̱ yä miyontho yä jäꞌi xä du.