1. ¿Zäi ge te mä ntꞌani gi o̱tꞌe nubye̱ ya ma gi huadi gi nxadi nunä mfistꞌofo?

KO RÄ mfatsꞌi nunä mfistꞌofo, nuꞌi ya xkä pädi ndunthi de rä Biblia. Por ejemplo, ya gi pädi ge Äjuä di promete dä rꞌakägihu̱ nꞌa rä te pa nzäntho. ꞌNehe ya gi pädi te thogi ko nuꞌu̱ yä jäꞌi xä du ꞌne te ma dä me̱fi Äjuä po geꞌu̱ (Eclesiastés 9:5; Lucas 23:43, TNM; Juan 5:28,  29, TNM; Apocalipsis 21:3, 4). Mu̱ ya gi ntini ha yä mhuntsꞌi yä testigo rä Jeoba, zäi ge xkä handi ge ho̱nse̱ꞌu̱ o̱tꞌe ntsꞌe̱di po dä xo̱kämbeni rä Zi Dada Jeoba ja ngu di mända rä Biblia (Juan 13:35). ꞌNehe, mu̱ ya gä fu̱di gi ñꞌamigoui rä Zi Dada Jeoba, zäi ge nubye̱ gi ñꞌanise̱: «Xibye̱, ¿te mä nꞌa di debe gä pe̱fi pa dä za gä pe̱päbi?».

2. ¿Por hanja bi ne bi nxixtehe näꞌä rä ñꞌo̱ho̱ mrä me Etiopía?

² Geꞌä bi ñꞌani ꞌnehe nꞌa rä ñꞌo̱ho̱ ha yä pa nuꞌu̱ yä mu̱di kristianu. Mꞌe̱fa de xki nangi rä Hesu de rä du, nꞌa de nuꞌu̱ yä de̱ni mrä thuhu Felipe, bi predikabi nꞌa rä ñꞌo̱ho̱ mrä mengu Etiopía. Bi esplikabi ko rä Mäkä Tꞌofo ge rä Hesu mi geꞌä rä Mesia. Näꞌä ñꞌo̱ho̱ꞌä xa bi ho näꞌä bi tꞌuti hänge bi ꞌñenä: «Jani nꞌa rä zi mothe po rä dehe. ¿Ha hindä za ja gä nxixteheni?» (Hechos 8:26-36).

3. a) ¿Te bi mändabi rä Hesu nuꞌu̱ yä de̱ni? b) ¿Te pe̱fi nuꞌu̱ xa mäjuäni yä kristianu ora di nxixtehe?

³ Rä Biblia udi ge mu̱ nuꞌi gi ne gi pe̱päbi rä Zi Dada Jeoba, mähyoni gi nxixtehe. Rä Hesu bi mändabi nuꞌu̱ yä de̱ni: «Gi mahu̱, ꞌne ꞌñutihu̱ yä jäꞌi de gatꞌho yä dähni pa dä zo̱ho̱ dä de̱ngägi, xiꞌtsihu̱» (Mateo 28:19, TNM). Rä Hesu ꞌnehe bi nxixtehe. ¿Pe gi pädi? Hingä ho̱nse̱ bri xiꞌtsuäbi rä dehe ha rä ñäxu, sino ke gatꞌho rä ndoyꞌo bi ju̱ꞌmi ha rä dehe (Mateo 3:16). Mäpaya, nuꞌu̱ xa mäjuäni yä kristianu di nxixtehe njabu̱ ꞌnehe; di ju̱ꞌmi gatꞌho rä ndoyꞌo ha rä dehe.

4. Ora nꞌa rä jäꞌi di nxixtehe, ¿te udi kongeꞌä?

⁴ Ora nꞌa rä jäꞌi di nxixtehe, ¿te udi kongeꞌä? Näꞌä jäꞌiꞌä, japäbi dä bädi märꞌaa ge ne dä ñꞌamigoui rä Zi Dada Jeoba ꞌne ge ne dä me̱päbi rä bolunta (Salmo 40:7, 8). Pe zäi ge nuꞌi gi ñꞌanise̱: «¿Te mähyoni gä pe̱fi pa dä za gä nxixtehe?».

5. a) ¿Te mähyoni gi pe̱fi mꞌe̱tꞌo änte de gi nxixtehe? b) ¿Por hanja xa mähyoni gi ntini ha nuꞌu̱ yä mhuntsꞌi o̱tꞌe yä testigo rä Jeoba?

⁵ Änte de gi nxixtehe, mꞌe̱tꞌo ja mꞌe̱di gi hñäni nꞌa rä mfädi de rä Zi Dada Jeoba ꞌne de Ñhesukristo. Dä za gä eñhu̱ ge nuꞌi ya gi häni näꞌä rä mfädiꞌä ngeꞌä nuꞌi ya gi nxadi rä Biblia (hñeti Juan 17:3). Pe xa mähyoni gi sigi gi pädi ndaꞌä rä bolunta Äjuä (Colosenses 1:9). Mu̱ gi ntini ha nuꞌu̱ yä mhuntsꞌi o̱tꞌe yä testigo rä Jeoba, geꞌä ma dä maxꞌäꞌi ꞌnehe pa gi joni ko Äjuä. ¡Hänge xa mähyoni hingi hye̱gi de gi ntini ha nuya yä mhuntsꞌi! (Hebreos 10:24, 25).

6. ¿Hängu di debe gi pädi de rä Biblia pa dä za gi nxixtehe?

⁶ Pa gi nxixtehe, Jeoba hingi adi gi pädi gatꞌho näꞌä huxä ha rä Biblia. Ja ngu näꞌä rä ñꞌo̱ho̱ dä mäñhu̱ mrä me Etiopía, Jeoba himbi yꞌapäbi dä bädi gatꞌho änte de dä nxixtehe (Hechos 8:30, 31). Ngeꞌä ninꞌa rä jäꞌi nunka ma dä za dä bädi gatꞌho de Jeoba (Eclesiastés 3:11). Pe pa dä za gi nxixtehe, hää di ja mꞌe̱di gi pädi ꞌne gi kamfri rꞌa de nuꞌu̱ yä ntꞌudi huxä ha rä Biblia (Hebreos 5:12).

7. ¿Te mä nꞌa di ja mꞌe̱di gi pe̱fi änte de gi nxixtehe?

⁷ Rä Biblia enä: «Toꞌo hingi pe̱ꞌtsi rä jamfri hingi tsa dä yꞌo̱tꞌä nuꞌä di ho Äjuä» (Hebreos 11:6). Hää, änte de gi nxixtehe ꞌnehe mähyoni gi ꞌñudi ge gi pe̱ꞌspäbi rä komfiansa Äjuä. Rä Biblia udi ge nuꞌmu̱ rꞌa yä me Corinto bi yꞌo̱de näꞌä mi predika yä de̱ni rä Hesu, nuꞌu̱ bi gamfri ꞌne bi nxixtehe (Hechos 18:8). Njabu̱ ꞌnehe, rä Biblia xä maxꞌäꞌi gi pe̱ꞌspäbi rä komfiansa rä Zi Dada Jeoba ge ma dä kumpli näꞌä xä promete, ꞌne ge näꞌä rä te bi uni rä Hesu, geꞌä ma dä ñängägihu̱ de rä pekado ꞌne de rä du (Josué 23:14; Hechos 4:12; 2 Timoteo 3:16, 17).

8. ¿Te ma dä jaꞌi gi xipäbi märꞌa näꞌä xkä pädi de rä Noya Äjuä?

⁸ Entremäs gi pädi de rä Biblia ꞌne gi hyandi hanja faxꞌäꞌi ha ri mꞌu̱i, ri komfiansa po rä Zi Dada Jeoba mänꞌa ma dä te, ꞌne geꞌä ma dä jaꞌi gi xipäbi märꞌa näꞌä xkä pädi de rä Noya Äjuä (Jeremías 20:9; 2 Corintios 4:13).

9, 10. a) ¿Ngu toꞌo dä za gi xipäbi näꞌä xkä pädi de rä Biblia? b) ¿Te mähyoni gi pe̱fi mu̱ ya gi ne gi po̱ni gi predika ko yä ku de rä mhuntsꞌi?

⁹ ¿Ngu toꞌo dä za gi xipäbi näꞌä xkä pädi de rä Biblia? Ri familia, ri amigo, ri besinu o nuꞌu̱ gi mpe̱hui. Pe mähyoni gi xipäbi ko ndunthi rä tꞌekꞌei ꞌne ko rä mhäte. Mu̱ nuꞌi ya gi ꞌmu̱i ja ngu di mända rä Biblia ꞌne ya gi ne gi po̱ni gi predika ko yä ku de rä mhuntsꞌi, dä za gi xipäbi näꞌä rä ku utꞌäꞌi de rä Biblia. Mu̱ näꞌä rä ku handi ge ya hinte hu̱kꞌäꞌi pa gi predika, nuꞌmu̱ yoho yä ansiano ma dä ñä kongeꞌähu̱.

¹⁰ Xti ñä nuꞌu̱ yoho yä ansiano kongeꞌi, ma dä hyandi mu̱ gi ntiende ꞌne gi kamfri nuꞌu̱ yä ntꞌudi de rä Biblia, mu̱ ya gi ꞌmu̱i ja ngu di mända Äjuä, ꞌne mu̱ xa mäjuäni gi ne gi ntestigo rä Jeoba. Beni ge yä ansiano su gatꞌho nuꞌu̱ yä ku de rä mhuntsꞌi, hänge ogi tsu gi ñä kongeꞌu̱ (Hebreos 13:17; 1 Pedro 5:2, 3). Xti uadi yä ansiano dä ñä kongeꞌi, nuꞌu̱ ma dä xiꞌi mu̱ ya gi kumpli ko yä rekisito pa gi po̱ni gi predika ko yä ku de rä mhuntsꞌi, o tobe hinä.

11. ¿Por hanja xa mähyoni gä jahu̱ yä mpadi ha mä mꞌu̱ihu̱ änte de gä po̱ñhu̱ gä predikahu̱?

¹¹ Yä ansiano ma dä xiꞌi mu̱ di ja mꞌe̱di gi ja märꞌa yä mpadi ha ri mꞌu̱i. Pe, ¿por hanja xa mähyoni gä jahu̱ yä mpadi ha mä mꞌu̱ihu̱ änte de gä po̱ñhu̱ gä predikahu̱? Ngeꞌä ora di utihu̱ de rä Biblia märꞌa yä jäꞌi, di representahu̱  rä Zi Dada Jeoba. Hänge po rängeꞌä xa mähyoni gä pe̱ꞌtsihu̱ nꞌa rä mꞌu̱i xä ntꞌaxi pa njabu̱ gä eꞌspäbihu̱ rä nsu ꞌne hinto dä ñämäñꞌu̱ de geꞌä (1 Corintios 6:9, 10, TNM; Gálatas 5:19-21, TNM).

12. ¿Por hanja xa mähyoni gä arrepentihu̱?

¹² Änte de gi nxixtehe, ꞌnehe mähyoni gi arrepenti po nuꞌu̱ ri pekado (Hechos 3:19). Por ejemplo, mu̱ xkä o̱tꞌe yä pekado ngu nuꞌu̱ o̱tꞌe yä ꞌñätsa jäꞌi ko yä ndoyꞌo; pe̱ꞌtsi te gi arrepenti ko ngatꞌho ri koraso. Pe, ¿xiꞌmu̱ nzäntho xkä o̱tꞌe ntsꞌe̱di po gi pe̱ꞌtsi nꞌa rä mꞌu̱i xä ntꞌaxi ꞌne nunka xkä o̱tꞌe nꞌa rä däta pekado? Mäske njabu̱, mähyoni gi arrepenti. ¿Por hanja? Ngeꞌä gatꞌho xtä mꞌu̱ihu̱ ko näꞌä rä pekado bi zogägihu̱ Adán ꞌne Eva, hänge mähyoni gä apäbihu̱ rä Zi Dada Jeoba dä punꞌgägihu̱ (Romanos 3:23; 5:12).

13. ¿Te di signifika «gä tsohu̱bu̱ näꞌä rä ꞌñuu xä ntsꞌo»?

¹³ Pe hingä ho̱nse̱ di debe gä mäñhu̱ ge di arrepentihu̱, ꞌnehe mähyoni «gä tsohu̱bu̱ näꞌä rä ꞌñuu xä ntsꞌo». Hää, pe̱ꞌtsi te gä tsohu̱bu̱ näꞌä rä mꞌu̱i ndi tsitsꞌihu̱ mä mꞌe̱tꞌo ꞌne gä mꞌu̱ihu̱ ja ngu di mända Äjuä. Por ejemplo, imäjinä ge gi yꞌo ha nꞌa rä luga näꞌä hingi pädi, ꞌne gä da ngue̱nda ge näꞌä rä ꞌñuu gi te̱ni, hingä geꞌä ma dä zixäꞌi habu̱ gi ne gi ma. ¿Te ma gi pe̱fi? ¿Ma gi sigi gi yꞌo ha näꞌä rä ꞌñuuꞌä mäske ya gi pädi ge hingä geꞌä? Hinä, zäi ge nguntꞌä ma gi tsopu̱ ꞌne ma gi hyoni näꞌä rä ꞌñuu ma dä zixäꞌi habu̱ gi ne gi tso̱ni. Njabu̱ ꞌnehe, ora di nxadihu̱ rä Biblia ꞌne di dahu̱ ngue̱nda ge hindi tsitsꞌihu̱ nꞌa rä hogä mꞌu̱i, mähyoni gä mꞌu̱ihu̱ dispuesto gä tsohu̱bu̱ näꞌä rä mꞌu̱i xä ntsꞌo, ꞌne nubye̱ gä fu̱dihu̱ gä mꞌu̱ihu̱ ja ngu di mända rä Zi Dada Jeoba.

14. ¿Hanja dä za gi umbäbi ri te rä Zi Dada Jeoba?

¹⁴ ¿Te mä nꞌa di debe gi pe̱fi änte de gi nxixtehe? Mähyoni gi umbäbi ri te rä Zi Dada Jeoba. ¿Hanja di debe gi ja? Mähyoni gi ja nꞌa rä sadi pa gi xipäbi rä Zi Dada Jeoba ge nuꞌi gi prometebi gi xo̱kämbeni ho̱nse̱ꞌä ꞌne ge dende näꞌä oraꞌä ma gi mꞌu̱i pa gi pe̱päbi rä bolunta (Lucas 4:8).

15, 16. ¿Te ma dä japi nꞌa rä jäꞌi dä umbäbi rä te rä Zi Dada Jeoba?

¹⁵ Ora gi umbäbi ri te rä Zi Dada Jeoba ꞌne gi prometebi ge ho̱nse̱ꞌä ma gi pe̱päbi, ꞌñenä ora gi ne gi nthätui nꞌa rä jäꞌi ngeꞌä xa gi mädi. Imäjinä ge nꞌa rä tsꞌu̱ntꞌu̱ po̱ni ko nꞌa rä nxutsi, ꞌne ngu thogi rä tiempo, mänꞌa di mädi näꞌä rä nxutsi ꞌne nubye̱ apäbi dä nthätui. Mäske näꞌä tsꞌu̱ntꞌu̱ pädi ge nunä nꞌa rä däta responsabilida, pe koꞌmu̱ xa di mädi näꞌä rä nxutsi, ꞌmu̱i dispuesto dä ndude näꞌä responsabilida durante rä te.

¹⁶ Entremäs gi konose rä Zi Dada Jeoba, mänꞌa ma gi mädi ꞌne ma gi ne gi umbäbi ri te pa gi pe̱päbi rä bolunta. Rä Mäkä Tꞌofo enä ge toꞌo ne dä de̱ni rä Kristo, ya hingä ma dä mꞌu̱i pa dä yꞌo̱tꞌe rä boluntase̱ (Marcos 8:34). Hää, nubye̱ ma gi ꞌmu̱i pa rä Zi Dada Jeoba ꞌne nubye̱ ma gi turimu̱i po näꞌä di hoꞌä, hingä po näꞌä go gi ne o gi desea (hñeti 1 Pedro 4:2).

17. ¿Por hanja rꞌa yä jäꞌi hingi ne dä umbäbi yä te rä Zi Dada Jeoba pa dä me̱päbi?

¹⁷ Rꞌa yä jäꞌi hingi ne dä umbäbi yä te rä Zi Dada Jeoba ngeꞌä tsu dä fayabi ꞌne hindä me̱päbi ngu ri ꞌñehe. Märꞌaa, di mbeni ge mu̱ hindä umbäbi yä te Jeoba pa dä  me̱päbi, nuꞌu̱ hinte mä responsabilida pe̱ꞌtsi Kongeꞌä ꞌne ge dä za dä sigi dä me̱fi näꞌä go dä ne.

18. Mu̱ gi tsu gi fayabi Jeoba, ¿te ma dä maxꞌäꞌi gi täpäbi näꞌä rä ntsu?

¹⁸ Xi nuꞌi, ¿gi tsu gi fayabi Jeoba? Mu̱ hää, ogi turimu̱i. Näꞌä rä mhäte gi pe̱ꞌspäbi rä Zi Dada Jeoba geꞌä ma dä maxꞌäꞌi gi täpäbi näꞌä rä ntsu, ꞌne geꞌä ma dä rꞌaꞌi rä tsꞌe̱di pa gi kumpli ri promesa (Eclesiastés 5:4; Colosenses 1:10). Entremäs dä te näꞌä ri mhäte po rä Zi Dada Jeoba, mänꞌa hingä ma dä jaꞌi xä ñhei gi pe̱päbi rä bolunta. Rä apostol Juan bi ꞌñenä: «Mu̱ di o̱tuähu̱ yä mhända Äjuä, nuꞌmu̱ xi mäjuäni di mädihu̱ꞌä, ꞌne nu yä mhända Äjuä hingi hei gä o̱tꞌehu̱» (1 Juan 5:3).

19. ¿Por hanja hindi debe gi ntsu gi umbäbi ri te rä Zi Dada Jeoba pa gi pe̱päbi?

¹⁹ Rä Zi Dada Jeoba hingi adi gi mperfecto ꞌne hingä ma dä yꞌadi näꞌä hindä za gi pe̱fi (Salmo 103:14). Näꞌä di promete ge hingä ma dä hye̱kꞌäse̱ ꞌne ma dä maxꞌäꞌi gi pe̱fi näꞌä xä ñho (Isaías 41:10). Mu̱ gi pe̱ꞌspäbi rä komfiansa rä Zi Dada Jeoba ko ngatꞌho ri koraso, «Näꞌä ma dä gu̱hnäꞌi ha ri ꞌñuu» (Proverbios 3:5, 6).

20. ¿Te di sigibye̱ mu̱ ya gä ja ri sadi ꞌne gä xipäbi Jeoba ge gi umbäbi ri te?

²⁰ Xi nuꞌi, ¿ya gä ja ri sadi ꞌne gä xipäbi rä Zi Dada Jeoba ge gi umbäbi ri te pa gi pe̱päbi rä bolunta? Mu̱ hää, nubye̱ ho̱nse̱ di ja mꞌe̱di gi nxixtehe.

21, 22. ¿Hanja dä za gi ꞌñudi ge gi kamfri rä Zi Dada Jeoba ꞌne ge xkä desidi gi pe̱päbi?

²¹ Xipäbi näꞌä rä coordinador de yä ansiano de rä mhuntsꞌi ge nuꞌi ya gä umbäbi ri te rä Zi Dada Jeoba, ꞌne ge nubye̱ gi ne gi nxixtehe. Näꞌä ku, ma dä xipäbi rꞌa yä  ansiano dä ñä kongeꞌi ꞌne dä beñꞌäꞌi rꞌa yä ntꞌudi de rä Biblia. Mu̱ nuꞌu̱ yä ansiano dä hyandi ge ya hinte hu̱kꞌäꞌi, nuꞌu̱ ma dä xiꞌi ge ya dä za gi nxixtehe xti nja nꞌa rä däta mhuntsꞌi de yä testigo rä Jeoba. Ha näꞌä däta mhuntsꞌiꞌä, nꞌa rä ku ma dä uni nꞌa rä discurso habu̱ ma dä mää te di signifika rä nxixtehe. ꞌNepu̱, näꞌä kuꞌä ma dä yꞌo̱tꞌe yoho yä ntꞌani pa gatꞌho nuꞌu̱ ma dä nxixtehe. Xki thädi nuꞌu̱ yä ntꞌaniꞌu̱, nuꞌi ma gi ꞌñudi ante gatꞌho nuꞌu̱ xä ntini ge nuꞌi  gi kamfri rä Zi Dada Jeoba, ꞌne ge xkä desidi gi pe̱päbi (Mateo 10:32).

²² Ora ma gi nxixtehe, ma dä ju̱ꞌmi gatꞌho ri ndoyꞌo ha rä dehe. Kongeꞌä ma gi ꞌñuti gatꞌho nuꞌu̱ xä ntini ge nuꞌi ya xkä umbäbi ri te rä Zi Dada Jeoba ꞌne nubye̱ ma dä fädi ge nuꞌi ya grä testigo rä Jeoba.

23. ¿Te ri bo̱ni gä nxixtehehu̱ «po rä thuhu rä Dada, rä Tꞌu̱, ꞌne rä espiritu santo»?

²³ Rä Hesu bi xipi yä de̱ni ge xä nxixtehe «po rä thuhu rä Dada, rä Tꞌu̱, ꞌne rä espiritu santo» (hñeti Mateo 28:19, TNM). ¿Te ri bo̱ni nuya yä noya? Nꞌaa, ge toꞌo ma dä nxixtehe pe̱ꞌtsi te dä rekonose ge rä Zi Dada Jeoba go geꞌä pe̱ꞌtsi rä derecho de dä mända tanto ha mähetsꞌi ngu ha rä Xiꞌmhai. Yoho, ge toꞌo ma dä nxixtehe pe̱ꞌtsi te dä rekonose näꞌä rä däta nsu xä umbäbi Jeoba rä Hesu. ꞌNe hñuu, ge toꞌo ma dä nxixtehe debe dä rekonose ge rä espiritu santo geꞌä rä tsꞌe̱di Äjuä di usa pa dä kumpli rä bolunta (Salmo 83:18; Mateo 28:18; Gálatas 5:22, 23, TNM; 2 Pedro 1:21).

24, 25. a) ¿Te signifika rä nxixtehe? b) ¿Te ma gä pädihu̱ ha näꞌä rä ntheke xä ꞌñepu̱?

²⁴ Ora gi nxixtehe ꞌne dä ju̱ꞌmi gatꞌho ri ndoyꞌo ha rä dehe, signifika ge ya bi du näꞌä ri mꞌu̱i ngi pe̱ꞌtsi mä mꞌe̱tꞌo. Ora ya gi po̱tsꞌe de ha rä dehe, signifika ge nubye̱ ya gä fu̱ti nꞌa rä rꞌayꞌo mꞌu̱i ꞌne ge dende näꞌä oraꞌä, nubye̱ ma gi mꞌu̱i pa gi pe̱päbi rä bolunta rä Zi Dada Jeoba. Beni ge nuꞌi gä umbäbi ri te rä Zi Dada Jeoba, hingä nꞌa rä jäꞌi, nixi nꞌa rä ꞌme̱fi o nꞌa rä organización.

²⁵ Ora gi umbäbi ri te rä Zi Dada Jeoba ꞌne gi nxixtehe, mänꞌa ma dä ze̱di ri ntsitsꞌi Kongeꞌä (Salmo 25:14). Pe hingi signifika ge toꞌo dä nxixtehe ya kongeꞌä ma dä ñäni rä te. Rä Hesu bi ꞌñenä: «Toꞌo dä ze̱ti asta rä fin geꞌä ma dä bongi» (Mateo 24:13, TNM). Ora di nxixtehehu̱, ꞌñenä ja di fu̱dihu̱ di yꞌohu̱ ha rä ꞌñuu Äjuä. Pe, ¿te ma dä maxꞌäꞌi pa nunka gi hye̱gi de gi ñꞌamigoui rä Zi Dada Jeoba? Geꞌä ma gä pädihu̱ ha näꞌä rä ntheke xä ꞌñepu̱.