TSO̱NI MÄNꞌAKI YÄ JÄꞌI
RÄ LECCIÓN 8
ꞌÑudi rä pasensia
Näꞌä udi rä Mäkä Tꞌofo: «Toꞌo pe̱ꞌtsä rä mhäte udi rä pasensia» (1 Cor. 13:4, TNM).
Näꞌä bi me̱fi rä Hesu
1. Hyandi rä BIDEO o hñeti Juan 7:3-5 ꞌne 1 Corintios 15:3, 4, 7, TNM. ꞌNepu̱ thädi nuya yä ntꞌani:
¿Te utkägihu̱ rä ejemplo rä Hesu?
2. Mähyoni gä pe̱ꞌtsihu̱ rä pasensia, ngeꞌä rꞌa yä jäꞌi mänꞌa japäbi xä ñhei dä asepta näꞌä xä bädi de rä Noya Äjuä.
De̱mbäbi rä ejemplo rä Hesu
3. Hyoni te mä nꞌa dä za gi pe̱fi. Mu̱ nꞌa rä jäꞌi hingi ne dä hñäni nꞌa rä curso de rä Mäkä Tꞌofo, ogi presionä. En lugar de geꞌä, kada gi tso̱ni ꞌñuti yä bideo o mä nꞌa rä imformäsio habu̱ udi tengu nuꞌu̱ yä curso di unihu̱ ꞌne hanja dä za dä benefisiabi. Xähmä ko rä tiempo dä ne dä nxadi rä Mäkä Tꞌofo.
4. Kada nꞌa rä jäꞌi di nꞌañꞌo. Hingä gatꞌho yä jäꞌi di mbeni mähye̱gi. Mu̱ nꞌa de ri familia o mä nꞌa rä jäꞌi hingi ne dä hñäni nꞌa rä curso de rä Mäkä Tꞌofo o di japäbi xä ñhei dä asepta nꞌa rä ntꞌudi, dä hogi gi ñꞌanise̱ por hanja. ¿Mꞌu̱pu̱ toꞌo o̱ꞌtuäbi rä burla o di presionä? ¿Di japäbi xä ñhei dä zopu̱ nꞌa de nuꞌu̱ yä nzäi pe̱ꞌtsi? Umbäbi rä tiempo pa dä mbeni xä ñho ꞌne dä desidi te dä me̱fi. Beni ge rꞌa yä jäꞌi mänꞌa japäpi mꞌe̱di mä ndunthi rä tiempo pa dä balora näꞌä xä bädi de rä Mäkä Tꞌofo.
5. No̱ni näꞌä zi jäꞌi ha ri sadi. Yꞌapäbi rä Zi Dada Jeoba dä maxꞌäꞌi pa gi sigi gi fatsꞌi näꞌä zi jäꞌi ko rä pasensia ꞌne rä tꞌekꞌei. ꞌNehe dä hogi gi xatuäbi Äjuä pa gi pädi hanja ꞌne hämꞌu̱ dä hogi gi hye̱pu̱, mu̱ gi handi ge hingi o̱tꞌe ntsꞌe̱di po dä me̱päbi Äjuä (1 Cor. 9:26).
