Zi kuhu̱:

Näꞌä rä mhäte di pe̱ꞌspäbihu̱ Äjuä ꞌne yä jäꞌi, geꞌä jakägihu̱ gä o̱tehu̱ nunä mhända: «Hänge gri maha bä nzofohu̱ gatꞌho yä jäꞌi nuꞌu̱ mꞌu̱i ha rä ngu̱ni rä xiꞌmhai pa dä nxadi ꞌneheꞌu̱ ꞌne xiꞌtshu̱ꞌu̱» (Mat. 28:​19, 20; Mar. 12:​28-31). Näꞌä rä mhäte xa mäjuäni ja ndunthi rä tsꞌe̱di ꞌne dä za dä zo̱ni asta ha rä koraso gatꞌho nuꞌu̱ yä jäꞌi «xä thahni pa dä me̱ꞌtsä rä te pa nzäntho» (Hech. 13:48).

Mä mꞌe̱tꞌo ho̱nse̱ ndi mepye̱hu̱ näꞌä ndi xipäbihu̱ yä jäꞌi ꞌne ndi tsokuäbihu̱ yä he̱ꞌmi. Pe nubye̱ ja mꞌe̱di gä pädihu̱ hanja gä ñäuihu̱ yä jäꞌi. Rä mhäte geꞌä ma dä maxkägihu̱ pa gä handihu̱ näꞌä tupäbi yä mu̱i yä jäꞌi ꞌne gä ñähu̱ de geꞌä. Koꞌmu̱ kada nꞌa rä jäꞌi nꞌañꞌo näꞌä thogi ꞌne näꞌä tupäbi yä mu̱i, mähyoni gä o̱dehu̱ xä ñho näꞌä ma dä xikägihu̱ pa njabu̱ gä ñähu̱ de geꞌä. ¡Nunä zi he̱ꞌmi xä thoki pa dä ꞌñutkägihu̱ hanja gä ñähu̱ ko yä jäꞌi!

Nunä foyeto pe̱ꞌtsi 12 yä lección, ꞌnehe ma gä pädihu̱ ndaꞌu̱ nuꞌu̱ 12 yä hogä mꞌu̱i ma dä maxkägihu̱ pa gä udihu̱ rä mhäte ꞌne gä fatsꞌihu̱ yä jäꞌi dä nxixtehe. Ha kada nꞌa rä lección ehe nꞌa rä hogä mꞌu̱i de rä Hesu o nꞌa de nuꞌu̱ yä kristianu de rä mu̱di siglo de hanja bi ꞌñuti yä jäꞌi. Ya hingi ja mꞌe̱di gä mepye̱hu̱ yä presentasion, nubye̱ mähyoni gä honihu̱ hanja gä udihu̱ rä mhäte ko nuꞌu̱ yä jäꞌi di ñäuihu̱. Mäske xa mähyoni nuya yä hogä mꞌu̱i ehe ha nunä foyeto, rꞌa de geꞌu̱ mänꞌa ma dä maxkägihu̱ pa gä fu̱dihu̱ gä ñäuihu̱ yä jäꞌi, gä tso̱nihu̱ mänꞌaki ꞌne gä utihu̱ de rä Mäkä Tꞌofo.

Xki nxadi kada nꞌa rä lección beni xä ñho te mä hogä mꞌu̱i ma dä maxꞌäꞌi pa dä za gi ꞌñuti yä jäꞌi de rä Noya Äjuä. Näꞌä rä mhäte di sentihu̱ po rä Zi Dada Jeoba ꞌne yä zi jäꞌi geꞌä mänꞌa xa mähyoni pa gä udihu̱. Po rä ngeꞌä, japi dä ze̱di näꞌä rä mhäteꞌä pa njabu̱ dä za gi fatsꞌi yä zi jäꞌi dä me̱päbi Äjuä.

Xi nꞌa rä däta nsu gä pe̱päbihu̱ Äjuä mähye̱gi (Sof. 3:9). ¡Rä Zi Dada Jeoba dä jäpꞌäꞌihu̱ po gatꞌho näꞌä rä tsꞌe̱di gi o̱tꞌehu̱ pa gi fatsꞌihu̱ yä zi jäꞌi dä bädi de Geꞌä!