Rä Zi Dada Jeoba xä rꞌakägihu̱ nꞌa rä regalo xa mähotho. ¿Te mä regaloꞌä? ¡Rä Biblia! ꞌNehe fädi ngu rä Mäkä Tꞌofo o rä Noya Äjuä. Rä Biblia pe̱ꞌtsi 66 yä mfistꞌofo. Pe zäi ge gi ñꞌani: «¿Habu̱ xpä ehe rä Biblia? ¿Toꞌo go rä me̱ti?». Pa gä thädihu̱ nuya yä ntꞌani, mꞌe̱tꞌo ma gä handihu̱ hanja bi zo̱kägihu̱ rä Noya Äjuä.

1. Mu̱ yä jäꞌi go geꞌu̱ bi yꞌofo rä Biblia, ¿por hanja tꞌembäbi rä Noya Äjuä?

Bi mꞌu̱i 40 yä jäꞌi nuꞌu̱ bi yꞌofo rä Mäkä Tꞌofo. Pa geꞌä bi zitsꞌi ngu 1.600 yä je̱ya. Bi mu̱di bi tꞌofo dende rä je̱ya 1513 a.e.c., ꞌne bi uadi ngu po rä je̱ya 98 e.c. Nuꞌu̱ yä jäꞌi bi yꞌofo rä Biblia mi pe̱ꞌtsi rꞌa nꞌañꞌo yä mꞌu̱i ꞌne yä ofisio. Rꞌaa myä mayꞌo, märꞌa myä me̱huä ꞌne rꞌaa myä rey. Pe mäske nuyu̱ yä jäꞌi bi mꞌu̱i ha rꞌa nꞌañꞌo yä je̱ya ꞌne yä luga, dende fu̱di rä Mäkä Tꞌofo asta ri uadi, di nthe̱e̱ ꞌne o rä ꞌñuu näꞌä bi yꞌofoꞌu̱. ¿Gi pädi por hanja? Ngeꞌä Äjuä go rä me̱ti rä Biblia ꞌne go bi mända dä tꞌofo (hñeti 1 Tesalonicenses 2:13, TNM). Hänge nuꞌu̱ bi yꞌofo rä Biblia, himbi yꞌofo de yä mfenise̱, nuꞌu̱ yä jäꞌi «bi ñä po Äjuä ꞌne nuꞌu̱ bi yꞌofo ja ngu näꞌä mi xipä rä espiritu santo» (2 Pedro 1:21, TNM). a Äjuä bi usa rä espiritu santo pa njabu̱ bi xipäbi nuꞌu̱ yä jäꞌi näꞌä mi debe dä yꞌofo (2 Timoteo 3:16, TNM).

2. ¿Toꞌo dä za dä me̱ꞌtsi nꞌa rä Biblia pa dä bädi näꞌä udi?

«Gatꞌho nuꞌu̱ ꞌmu̱i ha rä xiꞌmhai» dä za dä me̱ꞌtsi nꞌa rä Biblia pa dä bädi te mä hogä notisia udi (hñeti Apocalipsis 14:6, TNM). Mäpaya, Äjuä go xä nkargo pa njabu̱ kasi gatꞌho yä jäꞌi dä me̱ꞌtsi nꞌa rä Biblia ha yä idioma. Otho mä nꞌa rä mfistꞌofo näꞌä xä thoki ha ndunthi yä idioma ja ngu rä Biblia. Hindi mporta habu̱ ꞌmu̱i o te mä idioma ñä, gatꞌho yä jäꞌi dä za dä bädi näꞌä udi rä Biblia.

3. ¿Te bi me̱fi Jeoba pa njabu̱ himbi hyopi bi mꞌe̱di rä Biblia?

Näꞌä rä mu̱di Biblia, bi tꞌofo ha yä xifri de ge zuꞌue fädi ngu yä pergamino, ꞌne ha yä xiza de gä arbol fädi ngu yä papiro. Pe nuya yä material himi dura ꞌne nguntꞌä mi yꞌaa. Pe bi mꞌu̱i rꞌa yä zi jäꞌi nuꞌu̱ xa mi mädi rä Noya Äjuä, ꞌne bi yꞌofo ndunthi yä kopia de gehnä. Mäske bi mꞌu̱i rꞌa yä tsꞌomꞌu̱i jäꞌi nuꞌu̱ mi ne dä destrui rä Biblia, bi mꞌu̱pu̱ rꞌa yä zi jäꞌi nuꞌu̱ bi ñäni rä Noya Äjuä; rꞌa de gehyu̱ asta bi tho po geꞌä. Hinto ma dä hñäkuäbi rä Zi Dada Jeoba de dä rꞌakägihu̱ nuꞌu̱ yä noya ꞌne yä konseho. Rä Biblia enä: «Rä noya Äjuä, ma dä dura pa nzäntho» (Isaías 40:8).

 HANJA DÄ ZA DÄ MAXꞌÄꞌI RÄ NOYA ÄJUÄ

5. Yä tsꞌomꞌu̱i jäꞌi himbi logra bi destrui rä Biblia

 6. Rä Biblia, nꞌa rä mfistꞌofo pa gatꞌho yä jäꞌi

Otho mä nꞌa rä mfistꞌofo näꞌä xä thoki ha ndunthi yä idioma ja ngu rä Biblia. Hñetihu̱ Hechos 10:34, 35, TNM, ꞌnepu̱ thädihu̱ nuya yä ntꞌani:

• ¿Por hanja gi kamfri ge Äjuä ne dä thoki rä Biblia ha ndunthi yä idioma?

• Xi nuꞌi, ¿te mänꞌa gi ho de rä Biblia?

 NÄꞌÄ DÄ PÄDIHU̱

Äjuä go rä me̱ti rä Biblia ꞌne go bi mända dä tꞌofo. Näꞌä go xä nkargo pa njabu̱ yä jäꞌi de gatꞌho rä Xiꞌmhai dä me̱ꞌtsi nꞌa rä Biblia.

Pa gä benihu̱

• ¿Por hanja dä za gä mäñhu̱ ge rä Biblia go rä me̱ti Äjuä mäske go bi yꞌofo yä jäꞌi?

• ¿Te di sorprendeꞌi ora gi handi ge rä Biblia hinxä za xä mꞌe̱di, ge xä thoki ha ndunthi yä idioma, ꞌne ge kasi gatꞌho yä jäꞌi ha rä Xiꞌmhai pe̱ꞌtsi nꞌaa?

• ¿Xi nubye̱ te gi senti ora gi pädi gatꞌho näꞌä xä me̱fi Äjuä kontal gi pätuäbi rä Noya?