RÄ LECCIÓN 15
¿Toꞌo Ñhesukristo?
Durante nuꞌu̱ yä nthebetho yä je̱ya xä thogi, hinxä mꞌu̱i mä nꞌa rä jäꞌi ngu Ñhesukristo, ꞌne po gatꞌho rä Xiꞌmhai yä jäꞌi xä yꞌo̱de de geꞌä. Pe mäske njabu̱, ndunthi yä jäꞌi hingi pädi xä ñho toꞌoꞌä. Pe, ¿te udi rä Biblia de geꞌä?
1. ¿Toꞌo Ñhesukristo?
Rä Hesu bi ꞌmu̱i ha mähetsꞌi ngu nꞌa rä e̱nxe̱ näꞌä xi ja ndunthi rä tsꞌe̱di. Rä Zi Dada Jeoba bi hyoki rä Hesu änte de xä hyoki yä e̱nxe̱, yä jäꞌi, ꞌne gatꞌho märꞌa yä kosa. Po rängeꞌä rä Biblia enä ge rä Hesu tꞌembäbi rä Primogénito o «rä Mu̱di Tꞌu̱ de gatꞌho näꞌä bi thoki» (Colosenses 1:15, TNM). Rä Biblia ꞌnehe embäbi rä Hesu rä Unigénito o rä «rꞌa Tꞌu̱» Äjuä, ngeꞌä rä Zi Dada Jeoba bi hyokise̱ rä Hesu ꞌne hinto bi matsꞌi (Juan 3:16, TNM). Mꞌe̱fa, rä Hesu nubye̱ bi matsꞌi rä Zi Dada Jeoba pa bi hyoki gatꞌho märꞌa yä tꞌo̱tꞌe (hñeti Proverbios 8:30). Mäpaya, rä Hesu ꞌne rä Zi Dada Jeoba sigi di mädi nꞌa ngu mänꞌaa ꞌne ja nꞌa rä hogä ntsitsꞌi entre geꞌu̱. Rä Hesu sigi o̱te ꞌne pe̱päbi ko ndunthi rä johya rä Zi Dada Jeoba. ꞌNehe, rä Hesu tꞌembäbi la Palabra o «rä Noya» ngeꞌä go geꞌä di nkargo dä ntrega nuꞌu̱ yä mensaje ꞌne yä mhända rä Zi Dada Jeoba (Juan 1:14).
2. ¿Pa te bä ehe rä Hesu ha rä Xiꞌmhai?
O̱tꞌe ngu 2.000 yä je̱ya, rä Zi Dada Jeoba bi usa rä espiritu santo pa bi ja nꞌa rä milagro. ¿Te mä milagroꞌä? Bi pombäbi rä te rä Hesu dende mähetsꞌi pa ha rä mu̱i nꞌa rä nxutsi mrä thuhu María. Njabu̱ rä Hesu bi mꞌu̱i nuua ha rä Xiꞌmhai ngu nꞌa rä zi ꞌue̱ne (hñeti Lucas 1:34, 35, TNM). Rä Hesu go geꞌä rä Mesia o rä Kristo bä ꞌme̱hni ha rä Xiꞌmhai pa dä ñäni yä jäꞌi. a Gatꞌho näꞌä mängä rä Biblia de rä Mesia, geꞌä gatꞌho bi me̱fi ꞌne bi thogi rä Hesu. Njabu̱, yä jäꞌi bi da ngue̱nda ge rä Hesu, mi geꞌä rä Mesia o Kristo, näꞌä rä Tꞌu̱ Äjuä (Mateo 16:16).
3. ¿Habu̱ bi ꞌmu̱ibye̱ rä Hesu?
Mi du rä Hesu ngu nꞌa rä jäꞌi, rä Zi Dada Jeoba bi gu̱tsꞌi de rä du ꞌne bi umbäbi rä te mänꞌaki ngu nꞌa rä espiritu pa njabu̱ bi za bi mengi ha mähetsꞌi. Rä Biblia enä: «Äjuä bi umbäbi nꞌa rä däta nsu ꞌne [...] nꞌa rä thuhu näꞌä ꞌmu̱i po mäñä de gatꞌho märꞌa yä thuhu» (Filipenses 2:9, TNM). Tanto ha mähetsꞌi ngu ha rä Xiꞌmhai, ho̱nse̱ rä Zi Dada Jeoba pe̱ꞌtsi gatꞌho rä tsꞌe̱di. Pe mꞌe̱fa de Geꞌä, xä hñutsꞌi rä Hesu ꞌne xä umbäbi ndunthi rä autorida.
HANJA DÄ ZA DÄ MAXꞌÄꞌI RÄ NOYA ÄJUÄ
Nubye̱ ma gä pädihu̱ mä nꞌa tu̱i de rä Hesu, ꞌne ma gä handihu̱ por hanja xa mähyoni gä konosehu̱ xä ñho.
4. Rä Hesu hingä go geꞌä Äjuä
Rä Biblia udi ge mäske rä Hesu bi ꞌmu̱i ha mähetsꞌi ꞌne bi pe̱ꞌtsi ndunthi rä autorida, näꞌä ko rä johya o̱te ꞌne pe̱päbi rä Zi Dada Jeoba. ¿Por hanja dä za gä kamfrihu̱ ge mäjuäni njabu̱? Yꞌe̱ntsꞌihu̱ rä BIDEO pa gi hyandihu̱ te udi rä Biblia de näꞌä rä luga bi pe̱ꞌtsi rä Hesu ha mähetsꞌi, ꞌne de näꞌä rä luga pe̱ꞌtsi rä Zi Dada Jeoba.
Nuya yä testo ma gä handihu̱, ma dä maxkägihu̱ gä ntiendehu̱ te rä njaui rä Hesu rä Zi Dada Jeoba. Hñetihu̱ kada nꞌa de nuya yä testo, ꞌnepu̱ thädihu̱ nuya yä ntꞌani:
Hñetihu̱ Lucas 1:30-32, TNM.
-
¿Hanja di handihu̱ ge näꞌä rä e̱nxe̱ bi zofo María, bi ꞌñudi ge rä Hesu di nꞌañꞌo de rä Zi Dada Jeoba?
Hñetihu̱ Mateo 3:16, 17.
-
Nuꞌmu̱ bi nxixtehe rä Hesu, ¿te bi mängä näꞌä rä voz bi ntꞌo̱de ha mähetsꞌi?
-
¿Toꞌo gi kamfri ge rä voz näꞌä bi ntꞌo̱de ha mähetsꞌi?
Hñetihu̱ Juan 14:28, TNM.
-
Toꞌo go mädä ꞌne mänꞌa pe̱ꞌtsi rä autorida, ¿nꞌa rä dada o nꞌa rä tꞌu̱?
-
Rä Hesu bi ꞌñenä: «Grä ma ko rä Dada, ngeꞌä rä Dada mädä ke geki». ¿Te dä za gä pädihu̱ de gehnä?
Hñetihu̱ Juan 12:49.
-
Mi mꞌu̱kua rä Hesu ha rä Xiꞌmhai, ¿hage bi ꞌñenä ge go mi geꞌä rä Dada? ¿Xi nuꞌi te gi mbeni?
5. Rä Hesu bi ꞌñudi ge mi geꞌä rä Mesia
Rä Biblia hutsꞌi ndunthi yä profecía de rä Mesia. Geꞌä xä matsꞌi yä jäꞌi pa dä bädi toꞌo rä Mesia, näꞌä xä huahni Äjuä pa dä ñäni yä jäꞌi. Yꞌe̱ntsꞌihu̱ rä BIDEO pa gi hyandihu̱ rꞌa de nuꞌu̱ yä profecía bi kumpli rä Hesu mi mꞌu̱kua ha rä Xiꞌmhai.
Hñetihu̱ ha rä Biblia nuya yä profecía, ꞌnepu̱ thädihu̱ nuya yä ntꞌani:
Hñetihu̱ Miqueas 5:2 pa gi hyandihu̱ hanja rä Biblia ya xki mää dende änte habu̱ ma xä mꞌu̱i rä Mesia. b
-
Rä Biblia ya xki mää dende änte habu̱ ma xä mꞌu̱i rä Hesu. ¿Hää bi thogi njabu̱ o hinä? (Hyandi te mää Mateo 2:1, TNM).
Hñetihu̱ Salmo 34:20 ꞌne Zacarías 12:10, pa gi hyandihu̱ hanja rä Biblia ya xki mää dende änte rꞌa yä detalle de rä du rä Mesia.
-
¿Bi kumpli nuya yä profecía? (Hyandi te mää Juan 19:33-37, TNM).
-
¿Gi kamfri ge rä Hesu go geꞌä bi desidise̱ dä thogi gatꞌho näꞌä bi thogi kontal dä kumpli näꞌä ya xki tꞌofo ha rä Biblia de rä Mesia?
-
Ko näꞌä ya dä handihu̱, ¿gi kamfri ge rä Hesu hää go geꞌä rä Mesia? ¿Por hanja?
6. Gä pädihu̱ toꞌo rä Hesu di benefisiagihu̱ ndunthi
Rä Biblia di animägihu̱ gä pädihu̱ xä ñho toꞌo rä Hesu ꞌne te mä ꞌme̱fi o te mä puesto pe̱ꞌtsi mäpaya. Hñetihu̱ Juan 14:6, TNM ꞌne 17:3, TNM, ꞌnepu̱ thädihu̱ nunä rä ntꞌani:
-
¿Por Hanja xa mähyoni gä pädihu̱ xä ñho toꞌoꞌä rä Hesu?
Rä Hesu bi xoki rä ꞌñuu pa dä za gä jonihu̱ ko Äjuä. ꞌNehe bi ꞌñudi näꞌä mäjuäni de rä Zi Dada Jeoba. Po mäde de rä Hesu, dä za gä pe̱ꞌtsihu̱ nꞌa rä te pa nzäntho.
RꞌA YÄ JÄꞌI ENÄ: «¿Por hanja yä testigo rä Jeoba hingi kamfri rä Hesu?».
-
Xiꞌmu̱ toꞌo dä xiꞌi njabu̱, ¿te ma gi xipäbi?
NÄꞌÄ DÄ PÄDIHU̱
Rä Hesu näꞌä nꞌa rä espiritu o nꞌa rä e̱nxe̱ näꞌä xi pe̱ꞌtsi ndunthi rä tsꞌe̱di. Näꞌä rä Tꞌu̱ Äjuä ꞌne go geꞌä rä Mesia.
Pa gä benihu̱
-
¿Por hanja rä Hesu tꞌembäbi rä Primogénito o «rä Mu̱di Tꞌu̱ de gatꞌho näꞌä bi thoki»?
-
¿Te mi pe̱fi rä Hesu ha mähetsꞌi änte de xä ꞌñehe ha rä Xiꞌmhai?
-
¿Por hanja di pädihu̱ ge rä Hesu hää go geꞌä rä Mesia?
HABU̱ DÄ ZA GI PÄDI MÄ NꞌA TU̱I
Hyandi märꞌa yä prueba nuꞌu̱ udi ge rä Hesu go geꞌä rä Mesia.
«¿Te mä prueba uni rä Biblia ge rä Hesu go geꞌä rä Mesia?» (Ehe ha jw.org)
Pädi mä nꞌa tu̱i näꞌä udi rä Biblia de rä Hesu ꞌne te rä njaui Äjuä.
Hyandi hanja rä Biblia hinte udi de rä trinida.
Hyandi hanja nꞌa rä zi ꞌme̱hñä bi paati näꞌä mi mbeni nuꞌmu̱ bi bädi te udi rä Biblia de rä Hesu.
«Nꞌa rä zi ꞌme̱hñä rä judía mää por hanja bi gamfri rä Hesu» (¡Despertad!, mayo de 2013)
a Ha yä lección 26 ꞌne 27, ma gä pädihu̱ por hanja yä jäꞌi mi japäbi mꞌe̱di toꞌo dä ñäni, ꞌne hanja rä Hesu go geꞌä bi za bi ñängägihu̱.
Puede que también le interese
NÄꞌÄ DI ÑꞌANI YÄ JÄꞌI
¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Ora ma gi hñäni ri curso, nuꞌi dä za gi usa näꞌä rä Biblia go gi ne. ꞌNehe dä za gi mbitabi ri familia o nuꞌu̱ ri amigo pa dä nxadi rä Biblia kongeꞌi.
