RÄ LECCIÓN 17
¿Tenguꞌä rä mꞌu̱i rä Hesu?
Entremäs gä pädihu̱ näꞌä bi mää ꞌne näꞌä bi me̱fi rä Hesu mi mꞌu̱kua ha rä Xiꞌmhai, mänꞌa ma gä mädihu̱ tanto nuꞌä ngu rä Zi Dada Jeoba. ¿Tenguꞌä rä mꞌu̱i rä Hesu ꞌne hanja dä za gä de̱mbäbihu̱ rä ejemplo?
1. ¿Hanja dä za gä eñhu̱ ge rä Hesu ri hñätsꞌi rä Dada?
Rä Hesu xä mꞌu̱i ha mähetsꞌi durante yä miyontho yä je̱ya. Hänge rä Hesu di mbeni, senti, ꞌne pe̱fi näꞌä pe̱fi rä Dada (hñeti Juan 5:19). Hää, rä Hesu udi gatꞌho nuꞌu̱ yä hogä mꞌu̱i pe̱ꞌtsi rä Dada. Nꞌa rä pa rä Hesu bi ꞌñenä: «Nuꞌä toꞌo xä hyanꞌgägi xä hyandä Äjuä mä Dada ꞌnehe» (Juan 14:9). Hänge entremäs gi konose rä Hesu, mänꞌa ma gi konose rä Zi Dada Jeoba. Por ejemplo, näꞌä rä nhuekäte bi ꞌñudi rä Hesu po yä jäꞌi, geꞌätho rä nhuekäte udi rä Zi Dada Jeoba po gekhu̱.
2. ¿Hanja xä ꞌñudi rä Hesu ge xa di mädi rä Zi Dada Jeoba?
Rä Hesu bi ꞌñenä: «Pa gatꞌho rä xiꞌmhai dä bädi ge di mädi mä Dada, nuga di pe̱fi gatꞌho näꞌä bi nkargogi gä pe̱fi» (Juan 14:31, TNM). Nuꞌmu̱ rä Hesu bi mꞌu̱kua ha rä Xiꞌmhai, bi ꞌñudi hängu di mädi rä Dada. ꞌNe mäske bi ñhandui ndunthi yä sufrimiento, näꞌä nzäntho bi yꞌo̱te rä Zi Dada Jeoba. ꞌNehe, rä Hesu xa mi ho dä ñä de rä Zi Dada Jeoba ꞌne bi matsꞌi yä jäꞌi pa dä me̱ꞌtsi nꞌa rä hogä ntsitsꞌi Kongeꞌä (Juan 14:23, TNM).
3. ¿Hanja xä ꞌñudi rä Hesu ge di mädi yä jäꞌi?
Rä Biblia enä ge rä Hesu «xa di mädi yä jäꞌi» (Proverbios 8:31). Geꞌä bi ꞌñudi rä Hesu mi mꞌu̱kua ha rä Xiꞌmhai. Näꞌä bi nupäbi yä mfeni ꞌne bi matsꞌi yä jäꞌi. Nuꞌmu̱ bi ja yä milagro, hingä ho̱nse̱ bi ꞌñudi hängu rä tsꞌe̱di pe̱ꞌtsi, ꞌnehe bi ꞌñudi hängu di mädi ꞌne di hueki yä jäꞌi (Marcos 1:40-42). Rä Hesu bi ñhojäꞌi ko ngatꞌho yä jäꞌi ꞌne himbi huahnitho toꞌo dä trata xä ñho ꞌne toꞌo hinä. Näꞌä mi mää bi nupäbi yä mfeni gatꞌho nuꞌu̱ yä jäꞌi xa mäjuäni mi ne dä bädi de Äjuä. Rä Hesu bi mꞌu̱i dispuesto dä sufri ꞌne dä du, ngeꞌä di mädi gatꞌho yä jäꞌi. ¿Pe gi pädi? Näꞌä mänꞌa di mädi nuꞌu̱ yä zi jäꞌi o̱tꞌe ntsꞌe̱di po dä de̱mbäbi rä ejemplo ꞌne pe̱fi näꞌä bi mända (hñeti Juan 15:13, 14).
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ mä nꞌa tu̱i tenguꞌä rä mꞌu̱i rä Hesu. ꞌNehe ma gä pädihu̱ hanja dä za gä de̱mbäbihu̱ rä ejemplo, ꞌne gä usahu̱ näꞌä di pe̱ꞌtsihu̱ pa gä fatsꞌihu̱ ꞌne gä nupäbihu̱ yä mfeni märꞌaa.
4. Rä Hesu xa di mädi rä Dada
Rä Hesu bi ꞌñudi hanja di debe gä mädihu̱ Äjuä. Hñetihu̱ Lucas 6:12, TNM, Juan 15:10, TNM ꞌne 17:26, TNM. Mꞌe̱fa de gi hñetihu̱ kada nꞌa de nuya yä testo, thädihu̱ nunä rä ntꞌani:
-
Xi nuju̱, ¿hanja di debe gä udihu̱ ge di mädihu̱ rä Zi Dada Jeoba ja ngu bi ja rä Hesu?
Rä Hesu bi ꞌñudi hängu mi mädi rä Dada ꞌne njatꞌä mi xatuäbi
5. Rä Hesu di hueki yä jäꞌi
Mi mꞌu̱kua rä Hesu ha rä Xiꞌmhai, bi ꞌñudi ge xa mi turämu̱i po yä zi jäꞌi ke po geꞌäse̱. Mäske rꞌabu̱ xa mi tsabi, nzäntho bi atiende nuꞌu̱ yä zi jäꞌi mi honi rä mfatsꞌi. Hñetihu̱ Marcos 6:30-44, TNM, ꞌnepu̱ thädihu̱ nuya yä ntꞌani:
-
¿Hanja bi ꞌñudi rä Hesu ge mänꞌa mi turämu̱i po märꞌaa ke po geꞌäse̱? (Hyandihu̱ mänꞌaki yä versículo 31, 34, 41 ꞌne 42).
-
¿Por hanja rä Hesu bi ne bi matsꞌi nuꞌu̱ yä zi jäꞌi? (Hyandihu̱ mänꞌaki rä versículo 34).
-
¿Te dä za gä pädihu̱ de rä Zi Dada Jeoba ora di handihu̱ gatꞌho näꞌä bi me̱fi rä Hesu?
-
Xi nuju̱, ¿hanja dä za gä udihu̱ ge di huekihu̱ ꞌne di tumämu̱ihu̱ po märꞌaa ja ngu bi ja rä Hesu?
6. Rä Hesu bi usa näꞌä mi pe̱ꞌtsi pa bi matsꞌi ꞌne bi nupäbi yä mfeni märꞌaa
Rä Hesu nzäntho bi hyoni hanja dä matsꞌi märꞌaa, mäske näꞌä himrä riko nixi mi pe̱ꞌtsi ndunthi yä kosa. Njabu̱, näꞌä bi zogägihu̱ nꞌa rä hogä ejemplo näꞌä mähyoni gä de̱nihu̱. Hñetihu̱ Hechos 20:35, TNM, ꞌnepu̱ thädihu̱ nunä rä ntꞌani:
-
¿Te bi mängä rä Hesu ge mänꞌa uni rä johya?
Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:
-
Mäske hindi pe̱ꞌtsihu̱ ndunthi rä bojä, ¿te dä za gä pe̱fihu̱ pa gä nupäbihu̱ yä mfeni o gä fatsꞌihu̱ märꞌaa?
¿Gi pädi?
Rä Biblia utkägihu̱ ge di debe gä xatuäbihu̱ rä Zi Dada Jeoba po mäde de rä thuhu rä Hesu (hñetihu̱ Juan 16:23, 24, TNM). Mu̱ gä jahu̱bu̱, ma gä udihu̱ ge di balorahu̱ näꞌä bi me̱fi rä Hesu. Ngeꞌä po näꞌä bi me̱fi, nuju̱ dä za gä o̱tꞌehu̱ mä amigohu̱ rä Zi Dada Jeoba.
RꞌA YÄ JÄꞌI ENÄ: «Äjuä hindi mportabi ua di ꞌmu̱ihu̱ xä ñho o di sufrihu̱».
-
¿Hanja dä za gä mäñhu̱ ge ko näꞌä bi me̱fi rä Hesu, bi ꞌñudi ge rä Zi Dada Jeoba ꞌnehe xa turämu̱i po gekhu̱?
NÄꞌÄ DÄ PÄDIHU̱
Rä Hesu xa di mädi rä Zi Dada Jeoba ꞌne di mädi yä jäꞌi. Näꞌä rä mꞌu̱i rä Hesu, njabu̱ ꞌnehe rä mꞌu̱i rä Zi Dada Jeoba. Hänge entremäs gä pädihu̱ tenguꞌä rä mꞌu̱i rä Hesu, mänꞌa ma gä pädihu̱ tenguꞌä rä mꞌu̱i rä Zi Dada Jeoba.
Pa gä benihu̱
-
¿Hanja dä za gä udihu̱ ge di mädihu̱ rä Zi Dada Jeoba ja ngu bi ja rä Hesu?
-
¿Hanja dä za gä udihu̱ ge di mädihu̱ yä jäꞌi ja ngu bi ja rä Hesu?
-
¿Te mänꞌa gi ho de rä mꞌu̱i rä Hesu?
HABU̱ DÄ ZA GI PÄDI MÄ NꞌA TU̱I
Hyandi hanja dä za gä de̱mbäbihu̱ rä mꞌu̱i rä Hesu.
Pädi te mä luga debe dä kupa rä Hesu ora di xatuäbihu̱ Äjuä.
¿Udi rä Biblia mi tenguꞌä rä ꞌmai rä Hesu?
¿Hanja bi hyandi ꞌne bi trata rä Hesu yä zi ꞌme̱hñä?
«Äjuä di respeta ꞌne di balora yä ꞌme̱hñä» (La Atalaya, 1 de septiembre de 2012)
Puede que también le interese
NÄꞌÄ DI ÑꞌANI YÄ JÄꞌI
¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Ora ma gi hñäni ri curso, nuꞌi dä za gi usa näꞌä rä Biblia go gi ne. ꞌNehe dä za gi mbitabi ri familia o nuꞌu̱ ri amigo pa dä nxadi rä Biblia kongeꞌi.
