Jeoba, näꞌä nꞌa rä Zi Dada näꞌä di ho rä orden (1 Corintios 14:33, TNM). Hänge dä za gä ntiendehu̱ por hanja rä Zi Dada Jeoba to̱ꞌmi ge rä hnini ꞌnehe dri ꞌmu̱i organisado. ¿Hanja ꞌmu̱i organisado nuꞌu̱ xa mäjuäni yä kristianu? ¿Te dä za gä pe̱fihu̱ pa njabu̱ gä mfaxtehu̱ dä nja rä orden ha rä hnini Äjuä?

1. ¿Toꞌo näꞌä rä lider de yä testigo rä Jeoba?

«Rä Kristo geꞌä rä ñäxu de rä mhuntsꞌi» (Efesios 5:23, TNM). Dende mähetsꞌi, rä Hesu di diriji nuꞌu̱ yä ꞌme̱fi di tꞌo̱tꞌe ha rä hnini rä Zi Dada Jeoba nuua ha rä Xiꞌmhai. Rä Hesu xä huahni nuua ha rä Xiꞌmhai nꞌa rä tꞌu̱kä grupo de nuꞌu̱ yä anciano pe̱ꞌtsi ndunthi rä esperiensia. Rä Biblia embäbi nunä tꞌu̱kä grupo «rä ꞌme̱go, rä hogä yꞌo̱de ꞌne xa ja rä mfeni», fädi ꞌnehe ngu rä Cuerpo Gobernante (hñeti Mateo 24:45-47, TNM). Ha rä mu̱di siglo, yä apostol ꞌne nuꞌu̱ yä anciano mi ꞌmu̱i ha Jerusalén, go geꞌu̱ mi diriji nuꞌu̱ yä mu̱di kristianu. Njabu̱ ꞌnehe mäpaya, rä Cuerpo Gobernante go geꞌä diriji rä hnini Äjuä (Hechos 15:2, TNM). Pe nuyu̱ yä ñꞌo̱ho̱ hingo gehyu̱ yä lider. Nuyu̱ nzäntho di nxadi rä Biblia pa dä hyoni rä mfatsꞌi rä Zi Dada Jeoba, ꞌne handi rä Hesu ngu rä lider ꞌne ꞌmu̱i dispuesto dä yꞌo̱te.

2. ¿Te mä ꞌme̱fi xrä nkargobi yä anciano?

Rꞌa yä zi ku nuꞌu̱ pe̱ꞌtsi ndunthi rä esperiensia ꞌne pe̱ꞌtsi ndunthi rä mfädi de rä Noya Äjuä, geꞌu̱ xä thutsꞌi ngu yä anciano ꞌne yä mayꞌo de ha yä mhuntsꞌi. Nuyu̱ nupäbi yä mfeni nuꞌu̱ märꞌa yä kristianu pe̱päbi rä Zi Dada Jeoba. Nuyu̱ yä ku, hingi adi rä bojä po näꞌä pe̱fi ha rä mhuntsꞌi, sino di jamäsu nunä tsꞌofo uni rä Biblia ora enä: «Fadibihu̱ näꞌä rä taxo Äjuä xä nkargoꞌihu̱ [...] pe hingä ngeꞌä toꞌo di obligaꞌihu̱, sino de ri boluntase̱hu̱ ꞌne ko ngatꞌho ri ganähu̱ ante rä thandi Äjuä; hingä pa gi yꞌadihu̱ yä bojä» (1 Pedro 5:1, 2, TNM). ꞌMu̱i märꞌa yä zi ku nuꞌu̱ tꞌembäbi yä siervo ministerial. Nuyu̱ yä zi ku umbäbi rä mfatsꞌi nuꞌu̱ yä anciano ko nuꞌu̱ yä ꞌme̱fi ja ha rä mhuntsꞌi. Ko rä tiempo, mu̱ nuyu̱ yä ku dä kumpli ko nuꞌu̱ yä rekisito adi rä Biblia, ꞌnehe dä za dä mfaxte ngu yä anciano.

Rä Cuerpo Gobernante go geꞌä huahni rꞌa yä anciano pa dä mfaxte ngu yä superintendente de gä circuito. Nuyu̱ yä kristianu, tso̱ni yä mhuntsꞌi pa njabu̱ di nupäbi yä mfeni yä ku ꞌne umbäbi yä tsꞌofo ora di ja mꞌe̱di. Yä superintendente de gä circuito ꞌnehe huahni toꞌo dä za dä mfaxte de gä anciano o de gä siervo ministerial ha rä mhuntsꞌi. Pa geꞌä, handi mu̱ nuyu̱ yä ku di kumpli ko nuꞌu̱ yä rekisito adi rä Biblia (1 Timoteo 3:1-10, 12, TNM; Tito 1:5-9, TNM).

3. ¿Te mä responsabilida pe̱ꞌtsi kada nꞌa rä testigo rä Jeoba?

Nuꞌu̱ xa mäjuäni yä kristianu pe̱fi gatꞌho näꞌä tsu̱päbi yä tsꞌe̱di pa di “nsundabi rä thuhu rä Zi Dada Jeoba”. Por ejemplo, ora di ntini ha yä mhuntsꞌi uni yä komentario, uni yä thoꞌtsi, ꞌnehe po̱ni di predika ꞌne uti yä jäꞌi de rä Noya Äjuä (hñeti Salmo 148:12, 13).

 HANJA DÄ ZA DÄ MAXꞌÄꞌI RÄ NOYA ÄJUÄ

4. Rä Hesu näꞌä nꞌa rä lider näꞌä nupkägihu̱ mä mfenihu̱

Rä Hesu bi uni nꞌa rä imbitasio. Hñetihu̱ Mateo 11:28-30, TNM, ꞌnepu̱ thädihu̱ nunä rä ntꞌani:

• ¿Te ne gä sentihu̱ rä Hesu ora di de̱nihu̱ ngu nꞌa rä lider?

5. Yä anciano udi ko rä ejemplo

1. Yä anciano nzäntho su yä ntsitsꞌi ko rä Zi Dada Jeoba ꞌne fatsꞌi yä familia dä me̱fi njabu̱ ꞌnehe.

2. Yä anciano tuyämu̱i po gatꞌho yä ku de rä mhuntsꞌi.

3.   Yä anciano ꞌnehe di predika

4. Yä anciano geꞌu̱ yä xahnäte de rä Noya Äjuä ha rä mhuntsꞌi. Pe ꞌnehe faxte ha märꞌa yä ꞌme̱fi, ngu ora dri maxtꞌi ꞌne dri su̱ki rä Ngu de gä Mhuntsꞌi.

6. Hanja dä za gä apoyahu̱ yä anciano

Rä Biblia xikägihu̱ por hanja di debe gä apoyahu̱ yä anciano. Hñetihu̱ Hebreos 13:17, TNM, ꞌnepu̱ thädihu̱ nuya yä ntꞌani:

• ¿Gi kamfri ge pe̱ꞌtsi nraso rä Biblia ora engägihu̱ ge di debe gä o̱tehu̱ nuꞌu̱ gu̱tꞌi rä ꞌñuu ha rä mhuntsꞌi? ¿Por hanja?

Hñetihu̱ Lucas 16:10, TNM, ꞌnepu̱ thädihu̱ nunä rä ntꞌani:

• ¿Por hanja debe gä o̱tehu̱ yä anciano mäske rꞌabu̱ di handihu̱ ge näꞌä adi hingä xa mähyoni?

 NÄꞌÄ DÄ PÄDIHU̱

Rä Hesu go geꞌä rä ñäxu ꞌne rä lider de gatꞌho yä congregación. Rä Hesu xä nkargobi yä anciano dä sugägihu̱ ꞌne dä nupkägihu̱ mä mfenihu̱. ꞌNehe, nuyu̱ yä ku utkägihu̱ nꞌa rä hogä ejemplo. Hänge ko rä johya di o̱tehu̱ yä anciano ꞌne di apoyahu̱.

Pa gä benihu̱

• ¿Toꞌo näꞌä rä ñäxu ꞌne rä lider de gatꞌho yä mhuntsꞌi?

• ¿Te mä mfatsꞌi uni yä anciano ha yä mhuntsꞌi?

• ¿Te mä responsabilida pe̱ꞌtsi kada nꞌa rä testigo rä Jeoba?