Rä Biblia enä ge yä e̱nxe̱ «yä tꞌu̱ Äjuä» (Job 38:7). Hää, yä e̱nxe̱ pertenese ha näꞌä rä familia rä Zi Dada Jeoba bi pe̱ꞌtsi ha mähetsꞌi, ꞌne Näꞌä ne gä konosehu̱ toꞌoꞌu̱. ¿Te udi rä Biblia de yä e̱nxe̱? ¿ꞌMu̱i yä e̱nxe̱ yä hojäꞌi? ¿ꞌMu̱i yä e̱nxe̱ yä tsꞌomꞌu̱i? ¿Gatꞌho yä e̱nxe̱ di pertenese ha näꞌä rä familia pe̱ꞌtsi rä Zi Dada Jeoba?

1. ¿Tenguꞌu̱ yä e̱nxe̱ ꞌne te pe̱fi?

Rä Zi Dada Jeoba bi hyoki yä e̱nxe̱ änte de xä hyoki rä Xiꞌmhai. Tanto rä Zi Dada Jeoba ngu yä e̱nxe̱, nuꞌu̱ hindä za gä handihu̱ ngeꞌä nuꞌu̱ yä espiritu ꞌne bi ꞌmu̱i ha mähetsꞌi (Hebreos 1:14, TNM). Yä miyontho yä e̱nxe̱ nuꞌu̱ bi ꞌmu̱i ha mähetsꞌi. Kada nꞌa de geꞌu̱ rꞌa nꞌañꞌo yä mꞌu̱i (Apocalipsis 5:11). Nuꞌu̱ yä e̱nxe̱ bi ꞌmu̱i ha mähetsꞌi, pe̱päbi rä bolunta rä Zi Dada Jeoba (Salmo 103:20). Mäyaꞌmu̱ rä Zi Dada Jeoba mi usa yä e̱nxe̱ de gä mensajero. ꞌNehe, mi usa yä e̱nxe̱ pa mi fatsꞌi ꞌne mi ñäni nuꞌu̱ yä ꞌme̱go. Mäpaya, yä e̱nxe̱ gu̱hni nuꞌu̱ xa mäjuäni yä kristianu pa fatsꞌi honi nuꞌu̱ yä zi jäꞌi ne dä bädi de Äjuä.

2. ¿Toꞌo näꞌä rä Zithu ꞌne nuꞌu̱ yä u̱xjua?

Rꞌa yä e̱nxe̱ bi desidi hindä sigi dä yꞌo̱te rä Zi Dada Jeoba. Näꞌä mu̱di e̱nxe̱ himbi yꞌo̱te rä Zi Dada Jeoba, geꞌä bi tꞌembäbi «Diablo ꞌne Satanas» ꞌne nubye̱ di dedika «hatꞌi gatꞌho yä mexiꞌmhai» (Apocalipsis 12:9, TNM). Näꞌä tsꞌo e̱nxe̱ꞌä bi hyoni toꞌo dä mfaxhui, hänge bi hyatꞌi Adán ꞌne Eva, nuꞌu̱ yä mu̱di jäꞌi. ꞌNepu̱ bi gu̱tꞌi märꞌa yä e̱nxe̱ pa dä mfaxhui dä u̱tsa rä Zi Dada Jeoba. Nuꞌu̱ yä e̱nxe̱ di mfaxhui rä Zithu geꞌu̱ tꞌembäbi yä u̱xjua. Pe rä Zi Dada Jeoba bä e̱ni de mähetsꞌi tanto rä Zithu ꞌne nuꞌu̱ yä u̱xjua, ꞌne mänꞌitꞌho ma dä hñäki de nuua ha rä Xiꞌmhai (hñeti Apocalipsis 12:9, 12, TNM).

3. ¿Te pe̱fi rä Zithu ꞌne nuꞌu̱ yä u̱xjua pa dä kadi ꞌne dä hyatꞌi yä jäꞌi?

Rä Zithu ꞌne nuꞌu̱ yä u̱xjua di usa rä ntꞌete o rä adivinación pa hatꞌi yä jäꞌi. Ndunthi yä jäꞌi tagi ha nunä trampa ora honi yä bruho pa dä yꞌo̱the, o yä ꞌñete pa adivinabi yä suerte, pa dä bädi te ma dä thogi mꞌe̱fa, o pa dä yꞌo̱tpäbi yä ntsꞌomꞌu̱i märꞌaa. Rä Zithu ꞌne nuꞌu̱ yä u̱xjua usa mä nꞌa rä trampa: Nuꞌu̱ ne dä jakägihu̱ gä mbenihu̱ ge tsa gä ñähu̱ ko nuꞌu̱ yä jäꞌi xä du. a Pe rä Zi Dada Jeoba xikägihu̱ ge gatꞌho nuya kosa, bi ehe de rä Zithu ꞌne de nuꞌu̱ yä u̱xjua. Hänge pa dä ñängägihu̱ de geꞌu̱, rä Zi Dada Jeoba di mändagihu̱: «Ogi honihu̱ nuꞌu̱ yä jäꞌi di ho dä ñäui yä espiritu, nixi nuꞌu̱ enä ge di adivina» (Levítico 19:31). Hää, rä Zithu ꞌne nuꞌu̱ yä u̱xjua xa di u̱tsagihu̱ ꞌne honi te dä yꞌo̱tkägihu̱. Pe rä Zi Dada Jeoba näꞌä ne dä sugägihu̱.

 HANJA DÄ ZA DÄ MAXꞌÄꞌI RÄ NOYA ÄJUÄ

6. Täpäbi rä Zithu ꞌne yä u̱xjua

Rä Zithu go geꞌä di mända gatꞌho yä u̱xjua. Pe rä Hesu go geꞌä di diriji gatꞌho nuꞌu̱ yä hogä e̱nxe̱ bi ꞌmu̱i ha mähetsꞌi. Po rängeꞌä, rä Biblia enä ge rä Hesu ꞌnehe rä thuhu arcángel Miguel. ¿Hängu rä tsꞌe̱di pe̱ꞌtsi rä arcángel Miguel? Hñetihu̱ Apocalipsis 12:7-9, TNM, ꞌnepu̱ thädihu̱ nuya yä ntꞌani:

• ¿Toꞌo mänꞌa ja yä tsꞌe̱di: Miguel ꞌne nuꞌu̱ yä e̱nxe̱ o rä Zithu ꞌne nuꞌu̱ yä u̱xjua?

• ¿Gi kamfri ge nuꞌu̱ yä de̱ni rä Hesu debe dä me̱ꞌspäbi rä ntsu rä Zithu ꞌne nuꞌu̱ yä u̱xjua?

Nuꞌi dä za gi täpäbi rä Zithu ꞌne nuꞌu̱ yä u̱xjua. Hñetihu̱ Santiago 4:7, TNM, ꞌnepu̱ thädihu̱ nunä rä ntꞌani:

• ¿Te mähyoni gi pe̱fi pa njabu̱ hindä uaꞌi rä Diablo ꞌne nuꞌu̱ yä u̱xjua?

 NÄꞌÄ DÄ PÄDIHU̱

Nuꞌu̱ yä hogä e̱nxe̱ dä za dä maxkägihu̱ ndunthi. Rä Zithu ꞌne nuꞌu̱ yä u̱xjua geꞌu̱ yä nkontra rä Zi Dada Jeoba, ꞌne di usa yä espiritismo, yä ntꞌete ꞌne yä brujería pa kadi ꞌne hatꞌi yä jäꞌi.

Pa gä benihu̱

• ¿Te pe̱fi nuꞌu̱ yä e̱nxe̱ rä Zi Dada Jeoba pa fatsꞌi yä jäꞌi dä bädi de Geꞌä?

• ¿Toꞌo näꞌä rä Zithu ꞌne nuꞌu̱ yä u̱xjua?

• ¿Por hanja xa mähyoni gi u̱tsa gatꞌho nuꞌu̱ yä kosa di ñꞌoui yä espiritismo, yä mäjia, yä brujería ꞌne gatꞌho nuꞌu̱ yä kosa bi ehe de yä u̱xjua?