«¿Por hanja?». Gehnä rä ntꞌani o̱tꞌe yä jäꞌi ora thogi yä dumu̱i ꞌne yä sufrimiento. ¡Hängu rä johya di rꞌakägihu̱ gä handihu̱ ge rä Biblia xikägihu̱ por hanja ja yä sufrimiento ha rä Xiꞌmhai!

1. ¿Te bi me̱fi rä Zithu pa bi japi bi nja yä sufrimiento ha rä Xiꞌmhai?

Rä Zithu hingä ho̱nse̱ꞌä bi nju̱tsꞌi kontra rä Zi Dada Jeoba. ꞌNehe bi kadi Adán ꞌne Eva. Pa bi logra bi kadi nuyu̱ yä mu̱di jäꞌi, rä Zithu bi xipäbi nꞌa rä nkꞌuamba Eva (Génesis 3:1-5). Bi ꞌñembäbi ge rä Zi Dada Jeoba himi hombäbi yä ñho ꞌne ge mänꞌa ma xä mabi xä ñho nsi rä mfatsꞌiꞌä. Rä Zithu bi ꞌñembäbi Eva ge nuyu̱ hingä ma xä du mu̱ xä zi näꞌä rä fruta xki proibi rä Zi Dada Jeoba. Gehnä rä mu̱di nkꞌuamba bi mängä rä Zithu. Hänge rä Biblia enä ge rä Zithu «näꞌä rä kꞌuamba ꞌne rä dada de rä nkꞌuamba» (Juan 8:44, TNM).

2. ¿Te bi me̱fi Adán ꞌne Eva?

Rä Zi Dada Jeoba xki umbäbi gatꞌho näꞌä mi japäbi mꞌe̱di Adán ꞌne Eva pa xä me̱ꞌtsi nꞌa rä mꞌu̱i temäꞌentho. Näꞌä bi ꞌñembäbi ge de gatꞌho nuꞌu̱ yä fruta mi ja ha rä jardin de Edén, xä za xä zi. Pe ho̱nse̱ nꞌatho de nuꞌu̱ yä arbol himi debe xä zipäbi yä fruta (Génesis 2:15-17). Adán ꞌne Eva bi desidi himbi yꞌo̱te rä Zi Dada Jeoba ꞌne bi zi näꞌä fruta. Rä Biblia enä: «Näꞌä rä ꞌme̱hñä bi du̱ki näꞌä fruta ꞌne bi zi. Mꞌe̱fa, ꞌnehe bi umbi rä däme nuꞌmu̱ bi nthe̱ui ꞌne näꞌä bi mu̱di bi zi ꞌnehe» (Génesis 3:6). Adán ꞌne Eva myä perfecto, pe nuꞌu̱ bi desidi bi rechaza rä Zi Dada Jeoba ngu rä Gobernante. Näꞌä bi me̱fi Adán ꞌne Eva, bä hämpäbi ndunthi yä sufrimiento (Génesis 3:16-19).

3. ¿Hanja bi perjudikagihu̱ näꞌä bi me̱fi Adán ꞌne Eva?

Nuꞌmu̱ Adán ꞌne Eva bi peka kontra rä Zi Dada Jeoba, nuꞌu̱ bi hye̱gi de bi mperfecto ꞌne nuꞌmu̱ bi mꞌu̱i yä bätsi bi hyo̱xä näꞌä rä pekadoꞌä. Rä Biblia mää ge po näꞌä bi me̱fi Adán «rä du bi yu̱tꞌi ha gatꞌho yä jäꞌi» (Romanos 5:12).

Nuꞌmu̱ ¿por hanja di sufrihu̱? Di sufrihu̱ po nuya yä raso: Nꞌaa, di sufrihu̱ ora di huahnihu̱ nꞌa rä ꞌñuu xä ntsꞌo. Yoho, rꞌabu̱ di sufrihu̱ po yä tsꞌoki märꞌaa. ꞌNe hñuu, ngeꞌä rꞌabu̱ di yꞌohu̱ ha nꞌa rä luga ꞌne ha nꞌa rä ora näꞌä hinto to̱ꞌmi ge ma dä thogi nꞌa rä tsꞌo kosa (hñeti Eclesiastés 9:11).

 HANJA DÄ ZA DÄ MAXꞌÄꞌI RÄ NOYA ÄJUÄ

4. Näꞌä toꞌo tu rä tsꞌoki po gatꞌho nuꞌu̱ yä sufrimiento ja

Ndunthi yä jäꞌi kamfri ge Äjuä go geꞌä di mända ha rä Xiꞌmhai. ¿Pe mäjuäni njabu̱? Yꞌe̱ntsꞌihu̱ rä BIDEO.

Hñetihu̱ Santiago 1:13, TNM ꞌne 1 Juan 5:19, TNM, ꞌnepu̱ thädihu̱ nunä rä ntꞌani:

• ¿Tu rä tsꞌoki Äjuä po gatꞌho nuꞌu̱ yä ntsꞌomꞌu̱i ꞌne yä sufrimiento ja?

5. Näꞌä xä me̱fi rä Zithu

1. Nuꞌmu̱ bi thoki Adán ꞌne Eva, hinte mä pekado mi pe̱ꞌtsi ꞌne mi ꞌmu̱i ha nꞌa rä Paraiso. Pe en lugar go xä yꞌo̱te rä Zi Dada Jeoba, nuꞌu̱ go bi yꞌo̱te rä Zithu.

2.   Nuꞌmu̱ Adán ꞌne Eva bi peka kontra rä Zi Dada Jeoba, rä pekado, rä sufrimiento ꞌne rä du, bi yu̱tꞌi ha rä Xiꞌmhai.

3. Rä Zi Dada Jeoba ma dä hñäki de ha rä Xiꞌmhai rä pekado, rä sufrimiento ꞌne rä du. Mänꞌaki yä jäꞌi ma dä mperfecto ꞌne ma dä mꞌu̱i ha nꞌa rä Paraiso.

6. Näꞌä senti rä Zi Dada Jeoba ora di sufrihu̱

¿Di mportabi Äjuä ora handi ge yä jäꞌi di sufri? Hyandi te bi yꞌofo rä rey David ꞌne rä apostol Pedro. Hñetihu̱ Salmo 31:7 ꞌne 1 Pedro 5:7, TNM, ꞌnepu̱ thädihu̱ nunä rä ntꞌani:

• ¿Te gi senti nubye̱ gi pädi ge rä Zi Dada Jeoba turämu̱i ora handi ge di sufrihu̱?

 NÄꞌÄ DÄ PÄDIHU̱

Rä Zithu, Adán ꞌne Eva, go geꞌu̱ yä tsꞌoki po gatꞌho näꞌä rä sufrimiento ja ha rä Xiꞌmhai. Rä Zi Dada Jeoba xa turämu̱i ora handi ge di sufrihu̱. Hänge mänꞌitꞌho ma dä hñäki gatꞌho yä dumu̱i ꞌne yä sufrimiento.

Pa gä benihu̱

• ¿Te mä nkꞌuamba bi mängä rä Zithu nuꞌmu̱ bi ñäui Eva?

• ¿Te di thogihu̱ mäpaya po näꞌä bi me̱fi Adán ꞌne Eva?

• ¿Por hanja di pädihu̱ ge rä Zi Dada Jeoba tsamäñꞌu̱ ora handi ge di sufrihu̱?