RÄ LECCIÓN 34
¿Hanja dä za gä utihu̱ rä Zi Dada Jeoba ge di mädihu̱?
Durante nunä tiempo gi nxadi rä Biblia, ¿gi senti ge mänꞌa xkä joni ko Äjuä? ¿Gi hohmä mänꞌa gi ñꞌamigoui? Mu̱ hää, beni ge entremäs dä hyandi rä Zi Dada Jeoba hängu gi mädi, Näꞌä ꞌnehe mänꞌa ma dä mäꞌi ꞌne ma dä suꞌi. Pe, ¿hanja dä za gi ꞌñuti rä Zi Dada Jeoba ge xa gi mädi?
1. ¿Hanja dä za gä utihu̱ rä Zi Dada Jeoba ge di mädihu̱?
Dä za gä utihu̱ hängu di mädihu̱ ora di o̱tehu̱ näꞌä di mändagihu̱ (hñeti 1 Juan 5:3, TNM). ¿Pe gi pädi? Rä Zi Dada Jeoba hinto di obligabi dä yꞌo̱te nuꞌu̱ yä mhända. Näꞌä rꞌakägihu̱ kada nꞌa de gekhu̱ rä oportunida de gä huahnihu̱ mu̱ di ne gä o̱tehu̱ o hinä. ¿Por hanja? Ngeꞌä rä Zi Dada Jeoba ne gä o̱tehu̱ “ko ngatꞌho mä korasohu̱” (Romanos 6:17, TNM). Hää, rä Zi Dada Jeoba hingi ne gä o̱tehu̱ por obligasion, sino ngeꞌä di mädihu̱. Yä ntheke 3 ꞌne 4 de nunä mfistꞌofo, xä thoki pa dä maxꞌäꞌi gi ꞌñudi rä mhäte po rä Zi Dada Jeoba de yoho yä forma: Gi pe̱fi näꞌä di ho ꞌne gi ꞌuege de nuꞌu̱ yä kosa di u̱tsa.
2. ¿Por hanja rꞌabu̱ jakägihu̱ xä ñhei gä utihu̱ rä Zi Dada Jeoba ge di mädihu̱?
Rä Biblia enä: «Xi ndunthi nuꞌu̱ yä xuñha thogi yä hojäꞌi» (Salmo 34:19). Koꞌmu̱ gatꞌho xtä mꞌu̱ihu̱ ko rä pekado, rꞌabu̱ xa di jakägihu̱ xä ñhei gä pe̱fihu̱ näꞌä xä ñho. Pe hingä ho̱nse̱ꞌä, rꞌabu̱ ꞌnehe di thogihu̱ yä ñꞌäbojä, yä dumu̱i, yä injustisia ꞌne märꞌa yä tsꞌo tꞌo̱tꞌe. Ora di thogihu̱ nuya yä xuñha, geꞌmu̱ tobe mänꞌa jakägihu̱ xä ñhei gä pe̱fihu̱ näꞌä di ho rä Zi Dada Jeoba. Hää, gä pe̱fihu̱ näꞌä xä ñho mänꞌa xä ñhei ke näꞌä hinä. Pe mu̱ gi yꞌo̱tꞌe ntsꞌe̱di po gi pe̱fi näꞌä xä ñho mäske rꞌabu̱ xä ñhei o gi thogi yä xuñha, ma gi ꞌñudi hängu gi mädi rä Zi Dada Jeoba. ¿ꞌNe gi pädi? Näꞌä ꞌnehe ma dä yꞌo̱de ora gi zofo, ma dä maxꞌäꞌi ꞌne nunka ma dä hye̱kꞌäse̱ (hñeti Salmo 4:3).
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ por hanja rä Zi Dada Jeoba hää di mportabi mu̱ gi o̱te o hinä. ꞌNehe ma gä pädihu̱ te ma dä maxꞌäꞌi pa gi ñꞌo ha rä ꞌñuu rä Zi Dada Jeoba ꞌne njabu̱ gi johyabi rä mfeni ꞌne rä koraso.
3. Rä Zithu ꞌnehe di akusaꞌi
Ha rä Biblia, ha rä mfistꞌofo Job, udi ge rä Zithu hingä ho̱nse̱ bi akusa näꞌä rä zi ñꞌo̱ho̱ mrä thuhu Job. ꞌNehe di akusa gatꞌho nuꞌu̱ yä jäꞌi ne dä me̱päbi rä Zi Dada Jeoba. Hñetihu̱ Job 1:1 ꞌne 1:6–2:10, ꞌnepu̱ thädihu̱ nuya yä ntꞌani:
-
¿Te mä raso bi ꞌñenä rä Zithu ge mi pe̱ꞌtsi Job pa mi pe̱päbi rä Zi Dada Jeoba? (Hyandihu̱ mänꞌaki Job 1:9-11).
-
¿Te bi mängä rä Zithu de gatꞌho yä jäꞌi ꞌne de geꞌi? (Hyandihu̱ mänꞌaki Job 2:4).
Hñetihu̱ Job 27:5b, ꞌnepu̱ thädihu̱ nunä rä ntꞌani:
-
¿Hanja bi ꞌñudi Job ge xa mäjuäni mi mädi rä Zi Dada Jeoba?
Mäske Job bi thogi xi ndunthi yä dumu̱i ꞌne yä xuñha, näꞌä nunka bi ꞌuege de rä Zi Dada Jeoba ꞌne njabu̱ bi ꞌñuti hängu mi mädi.
Ora di pe̱fihu̱ näꞌä di ho rä Zi Dada Jeoba ꞌne hindi ꞌuegehu̱ de rä ꞌñuu, di utihu̱ hängu di mädihu̱.
4. Johyabi rä koraso rä Zi Dada Jeoba
Hñetihu̱ Proverbios 27:11, ꞌnepu̱ thädihu̱ nuya yä ntꞌani:
-
¿Hanja gi kamfri ge di senti rä Zi Dada Jeoba ora handi ge gi pe̱fi näꞌä di ho? ¿Por hanja gi kamfri ge di senti njabu̱?
5. Nuꞌi dä za gi mꞌu̱i de rä lado rä Zi Dada Jeoba
Näꞌä rä mhäte di pe̱ꞌspäbihu̱ rä Zi Dada Jeoba, geꞌä jakägihu̱ gä xipäbihu̱ märꞌa yä jäꞌi de Geꞌä. ꞌNe mäske rꞌabu̱ dä za gä thogihu̱ yä xuñha ngeꞌä di udihu̱ de Geꞌä, nuju̱ di ꞌmu̱ihu̱ desidido gä mämbäbihu̱ rä thuhu. Yꞌe̱ntsꞌihu̱ rä BIDEO, ꞌnepu̱ thädihu̱ nuya yä ntꞌani:
-
Xi nuꞌi, ¿di jaꞌi xä ñhei gi xipäbi märꞌaa de rä Zi Dada Jeoba?
-
Ja ngu dä handihu̱ ha rä bideo, ¿te bi matsꞌi rä ku Grayson pa bi gu̱ rä balo ꞌne bi däpäbi rä ntsu?
Hingä ma dä jakägihu̱ xä ñhei gä yꞌohu̱ ha rä ꞌñuu rä Zi Dada Jeoba, mu̱ di mädihu̱ näꞌä di mädi ꞌne di u̱tsahu̱ näꞌä di u̱tsa. Hñetihu̱ Salmo 97:10, ꞌnepu̱ thädihu̱ nuya yä ntꞌani:
-
Durante nunä tiempo gi nxadi rä Biblia, ¿te mä kosa xkä pädi ge di ho rä Zi Dada Jeoba? ¿Te mä kosa xkä pädi ge di u̱tsa?
-
¿Te dä za gi pe̱fi pa njabu̱ dä te ri mhäte po näꞌä xä ñho? ¿Te dä za gi pe̱fi pa mänꞌa gi u̱tsa näꞌä xä ntsꞌo?
6. Pa mä ñhouise̱hu̱ ora di o̱tehu̱ rä Zi Dada Jeoba
Di hänihu̱ ndunthi yä benefisio ora di o̱tehu̱ rä Zi Dada Jeoba. Hñetihu̱ Isaías 48:17, 18, ꞌnepu̱ thädihu̱ nuya yä ntꞌani:
-
¿Gi kamfri ge rä Zi Dada Jeoba go mänꞌa pädi ndaꞌä mä ñhouihu̱? ¿Por hanja?
-
¿Te mä benefisio xkä häni de gi nxadi rä Biblia ꞌne gi pädi toꞌo rä Zi Dada Jeoba?
RꞌA YÄ JÄꞌI ENÄ: «¿Mäjuäni ge mu̱ gä pe̱fi näꞌä xä ñho ma gä johyabi rä koraso Äjuä?».
-
¿Te mä testo dä za gi usa pa gi esplikabi nꞌa rä jäꞌi ge ora di pe̱fihu̱ näꞌä xä ñho di johyabihu̱ rä koraso rä Zi Dada Jeoba? ¿Te mä testo dä za gi usa pa gi esplikabi nꞌa rä jäꞌi ge ora di pe̱fihu̱ näꞌä xä ntsꞌo di u̱mbäbihu̱ rä mfeni rä Zi Dada Jeoba?
NÄꞌÄ DÄ PÄDIHU̱
Nuꞌi gi uti rä Zi Dada Jeoba ge xa mäjuäni gi mädi, ora gi o̱te nuꞌu̱ yä mhända mäske rꞌabu̱ gi thogi yä xuñha.
Pa gä benihu̱
-
¿Te dä za gi pädi de näꞌä rä hogä ejemplo bi zoogi Job?
-
¿Hanja dä za gi ꞌñuti rä Zi Dada Jeoba ge xa mäjuäni gi mädi?
-
¿Te ma dä maxꞌäꞌi pa njabu̱ nzäntho gi yꞌo̱te rä Zi Dada Jeoba ꞌne hingi ꞌuege de rä ꞌñuu?
HABU̱ DÄ ZA GI PÄDI MÄ NꞌA TU̱I
Hyandi hanja dä za gi pe̱fi näꞌä di ho rä Zi Dada Jeoba ha rä hnini.
Pädi mä nꞌa tu̱i näꞌä bi mängä rä Zithu kontra yä jäꞌi.
«Rä Job bi ñꞌo ha rä ꞌñuu Äjuä» (Rä Mäkä Tꞌofo—¿Te mä noya hutsꞌi?, rä ntheke 6)
Hyandi hanja asta yä zi bätsi dä za dä ꞌñudi ge di mädi rä Zi Dada Jeoba.
Ora yä bäsjäꞌi dri presionä pa dä me̱fi näꞌä xä ntsꞌo, ¿te dä za dä me̱fi pa njabu̱ hindä fayabi rä Zi Dada Jeoba?
Puede que también le interese
NÄꞌÄ DI ÑꞌANI YÄ JÄꞌI
¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Ora ma gi hñäni ri curso, nuꞌi dä za gi usa näꞌä rä Biblia go gi ne. ꞌNehe dä za gi mbitabi ri familia o nuꞌu̱ ri amigo pa dä nxadi rä Biblia kongeꞌi.
