RÄ LECCIÓN 38
Balora ri bida ꞌne yä bida märꞌaa
Rä bida xa mähotho. Mäske rꞌabu̱ di thogihu̱ yä xuñha ꞌne yä dumu̱i, ja ndunthi yä kosa xa mähotho nuꞌu̱ dä za gä pe̱fihu̱ ꞌne njabu̱ gä disfrutahu̱ de rä bida. ¿Hanja dä za gä utihu̱ rä Zi Dada Jeoba ge di balorahu̱ rä te? ¿Te mä raso di pe̱ꞌtsihu̱ pa gä balorahu̱ rä te?
1. ¿Por hanja xa mähyoni gä balorahu̱ rä te?
Xa mähyoni gä balorahu̱ rä te, ngeꞌä rä Zi Dada Jeoba go geꞌä xä rꞌakägihu̱ rä te ngu nꞌa rä regalo. Rä Biblia enä ge de rä Zi Dada Jeoba ja bi po̱ho̱ni rä te (Salmo 36:9). «Go gese̱ꞌä di rꞌakhu̱ rä te ꞌne rä ndähi pa gä ju̱ntsꞌihu̱, ꞌne gatꞌho yä tꞌo̱tꞌe nuꞌä di hoñhu̱» (Hechos 17:25, 28). Hää, rä Zi Dada Jeoba go geꞌä xä rꞌakägihu̱ rä te ꞌne gatꞌho näꞌä di honihu̱ pa gä disfrutahu̱ de rä bida (hñeti Hechos 14:17, TNM).
2. ¿Hanja dä za gä utihu̱ rä Zi Dada Jeoba ge di handihu̱ ngu nꞌa rä däta regalo näꞌä rä te xä uni?
¿Gi pädi? Dende nuꞌmu̱ gä fu̱di gä po̱ho̱ ha rä mu̱i ri nänä, rä Zi Dada Jeoba bi nuꞌäꞌi ꞌne bi suꞌi. Ha rä Biblia hutsꞌi nꞌa rä sadi bi ja rä rey David habu̱ bi ꞌñenä: «Ri da bi hyandi nuꞌmu̱ dä fu̱di dä po̱ho̱ ha rä mu̱i mä nänä» (Salmo 139:16). Hää, rä Zi Dada Jeoba xa di balora ri bida (hñeti Mateo 10:29-31, TNM). Hänge ora handi ge nꞌa rä jäꞌi häkse̱ rä bida o häkuäbi yä bida märꞌaa, Näꞌä xa di u̱ rä koraso (Éxodo 20:13). a ꞌNehe, hingi ho dä hyandi ora nꞌa rä jäꞌi u̱ni o hutsꞌi en peligro rä bida o yä bida märꞌaa. Pe mu̱ di su mä tehu̱ ꞌne di supäbihu̱ yä bida märꞌaa, nuꞌmu̱ di udihu̱ hängu di balorahu̱ nunä rä regalo xä rꞌakägihu̱ rä Zi Dada Jeoba.
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä handihu̱ te dä za gä pe̱fihu̱ pa gä utihu̱ rä Zi Dada Jeoba ge di balorahu̱ mä bidahu̱ ꞌne yä bida märꞌaa.
3. Su ri ndoyꞌo
Rä Zi Dada Jeoba to̱ꞌmi ge nuꞌu̱ xa mäjuäni yä kristianu dä usa yä te pa dä me̱päbi. Ngeꞌä nuꞌu̱ yä bida ya hingo di pertenesebi, sino ke ya xä umbäbi rä Zi Dada Jeoba ngu nꞌa rä sacrificio. Hñetihu̱ Romanos 12:1, 2, TNM, ꞌnepu̱ thädihu̱ nuya yä ntꞌani:
-
¿Por hanja di debe gi su ri ndoyꞌo?
-
¿Te dä za gi pe̱fi pa gi su ri ndoyꞌo?
4. Nzäntho su ri bida ꞌne yä bida märꞌaa
Rä Biblia di mändagihu̱ gä häkihu̱ o gä ꞌuegehu̱ de yä peligro. Yꞌe̱ntsꞌihu̱ rä BIDEO pa gä handihu̱ te mähyoni gä pe̱fihu̱ pa gä su mä bidahu̱ ꞌne yä bida märꞌaa.
Hñetihu̱ Proverbios 22:3, ꞌnepu̱ thädihu̱ nuya yä ntꞌani: ¿Te dä za gä pe̱fihu̱ pa njabu̱ hindä nja yä aksidente...
-
... ha mä nguhu̱?
-
... habu̱ di mpe̱fihu̱?
-
... ora di ñꞌenihu̱ o di jahu̱ nꞌa rä deporte?
-
... ora di yꞌe̱tꞌihu̱ nꞌa rä karro o nuꞌmu̱ di pahu̱ de gä pasajero?
5. Respetabi rä bida yä zi bätsi mäske tobe hinxä mꞌu̱i
Nꞌa rä pa, rä rey David bi mää hanja rä Zi Dada Jeoba ꞌmu̱i al tanto ꞌne di jamäsu nꞌa rä zi bätsi mientra yꞌo ri te ha rä mu̱i rä nänä. Hñetihu̱ Salmo 139:13-17, ꞌnepu̱ thädihu̱ nunä rä ntꞌani:
-
Pa rä Zi Dada Jeoba, ¿hämꞌu̱ fu̱di rä te nꞌa rä zi bätsi: dende nuꞌmu̱ bi mu̱di bi bo̱ho̱ ha rä mu̱i rä nänä o asta nuꞌmu̱ ya bi mꞌu̱i?
Nuꞌu̱ yä ley bi uni rä Zi Dada Jeoba pa rä hnini Israel, ꞌnehe mi defende nuꞌu̱ yä ꞌme̱hñä mi datꞌhi ꞌne nuꞌu̱ yä zi bätsi mi o ha yä mu̱i. Hñetihu̱ Éxodo 21:22, 23, ꞌnepu̱ thädihu̱ nuya yä ntꞌani:
-
¿Te mi senti rä Zi Dada Jeoba ora mi handi ge nꞌa rä jäꞌi mäske himi ja a propósito, mi entꞌi nꞌa rä ꞌme̱hñä näꞌä mi datꞌhi ꞌne po rängeꞌä mi tu näꞌä rä zi bätsi mi o ha rä mu̱i?
-
Xi mäpaya, ¿te senti rä Zi Dada Jeoba ora handi ge a propósito thäkuäbi yä te nuꞌu̱ yä zi bätsi o mbo ha yä mu̱i yä nänä? b
-
Xi nuꞌi, ¿te di pareseꞌi näꞌä di mbeni rä Zi Dada Jeoba?
Nꞌa rä ꞌme̱hñä näꞌä di balora rä bida ꞌne pädi te di mbeni rä Zi Dada Jeoba de gehnä, rꞌabu̱ dä za dä thogi yä xuñha ꞌne dä mbeni ge mänꞌa dä hogi dä aborta. Hñetihu̱ Isaías 41:10, ꞌnepu̱ thädihu̱ nuya yä ntꞌani:
-
Mu̱ nꞌa rä ꞌme̱hñä dä ñhandui yä xuñha ꞌne dä tꞌembäbi ge mänꞌa dä hogi dä aborta, ¿toꞌo di debe dä yꞌapäbi rä mfatsꞌi? ¿Por hanja?
RꞌA YÄ JÄꞌI ENÄ: «Yä ꞌme̱hñä pe̱ꞌtsi nderecho dä desidi mu̱ dä aborta o hinä».
-
¿Te di kombenseꞌi ge rä Zi Dada Jeoba xa mäjuäni di mportabi tanto rä bida näꞌä ꞌme̱hñä datꞌhi, ngu rä bida näꞌä zi bätsi o ha rä mu̱i?
NÄꞌÄ DÄ PÄDIHU̱
Rä Biblia utkägihu̱ ge rä Zi Dada Jeoba go geꞌä xä uni rä te ngu nꞌa rä regalo. Hänge mähyoni gä mädihu̱, gä respetahu̱, ꞌne gä suhu̱ tanto mä bidahu̱ ngu yä bida märꞌaa.
Pa gä benihu̱
-
¿Hanja di pädihu̱ ge rä Zi Dada Jeoba di balora yä bida gatꞌho yä jäꞌi?
-
¿Te di senti rä Zi Dada Jeoba ora nꞌa rä jäꞌi häkse̱ rä bida o häkuäbi rä bida mä nꞌa rä jäꞌi?
-
Xi nuꞌi, ¿te mänꞌa gi ho de näꞌä rä bida xä rꞌakägihu̱ Äjuä?
HABU̱ DÄ ZA GI PÄDI MÄ NꞌA TU̱I
¿Hanja dä za gä jamädibihu̱ rä Zi Dada Jeoba po näꞌä rä bida xä uni?
¿Äjuä dä za dä pumbäbi nuꞌu̱ yä ꞌme̱hñä xä aborta yä bätsi?
Pädi hanja handi Äjuä näꞌä rä bida xä uni, ꞌne hyandi hanja dä za dä maxꞌäꞌi ora gi huahni nꞌa rä deporte o mä nꞌa rä dibersio.
Hyandi hanja rä Biblia dä za dä matsꞌi nꞌa rä jäꞌi mu̱ di mbeni dä ñhose̱.
a Rä Zi Dada Jeoba xa turämu̱i po nuꞌu̱ yä zi jäꞌi xa ꞌmu̱i desanimädo, ꞌne po nuꞌu̱ ne dä hñäkise̱ yä bida po ränge yä dumu̱i ꞌne yä xuñha (Salmo 34:18). Näꞌä di ntiende xä ñho te thogi nuꞌu̱ yä zi jäꞌi di senti njabu̱ ꞌne ꞌmu̱i dispuesto dä umbäbi rä mfatsꞌi. Ha rä ngätsꞌi de nunä lección xiꞌi ge dä za gi tini mä nꞌa tu̱i rä imformäsio ha näꞌä rä artikulo rä thuhu «Di ne gä ñhose̱: ¿Dä za dä maxkägi rä Biblia gä häki de mä ñäxu nuya yä tsꞌo mfeni di pe̱ꞌtsi?».
b Rä Zi Dada Jeoba dä za dä pumbäbi nꞌa rä jäꞌi näꞌä xä ja nꞌa rä aborto mä mꞌe̱tꞌo. Ha rä ngätsꞌi de nunä lección xiꞌi ge dä za gi tini mä nꞌa tu̱i rä imformäsio ha näꞌä rä artikulo rä thuhu «¿Te udi rä Biblia de rä aborto?».
Puede que también le interese
NÄꞌÄ DI ÑꞌANI YÄ JÄꞌI
¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Ora ma gi hñäni ri curso, nuꞌi dä za gi usa näꞌä rä Biblia go gi ne. ꞌNehe dä za gi mbitabi ri familia o nuꞌu̱ ri amigo pa dä nxadi rä Biblia kongeꞌi.
