RÄ LECCIÓN 42
¿Te mä konseho uni rä Biblia pa yä soltero ꞌne pa nuꞌu̱ xä nthäti?
Ndunthi yä jäꞌi kamfri ge nꞌa rä ñꞌo̱ho̱ o nꞌa rä ꞌme̱hñä pe̱ꞌtsi te dä nthäti pa njabu̱ dä mꞌu̱i ko rä johya. ¿Pe gi pädi? Hingä gatꞌho nuꞌu̱ xä nthäti pe̱ꞌtsi rä johya, nixi gatꞌho yä soltero ꞌme̱päbi rä johya. Rä Biblia udi ge tanto yä soltero ngu nuꞌu̱ xä nthäti pe̱ꞌtsi ndunthi yä bentaja. Nuya yä bentaja nꞌa rä regalo xa mähotho näꞌä bi ehe de rä Zi Dada Jeoba.
1. ¿Te mä bentaja o benefisio pe̱ꞌtsi yä soltero?
Rä Biblia enä: «Toꞌo di nthäti pe̱fi xä ñho, pe toꞌo desidi hindä nthäti mänꞌa pe̱fi xä ñho» (hñeti 1 Corintios 7:32, 33, 38, TNM). ¿Te ne dä mää rä Biblia ora enä ge nꞌa rä soltero «mänꞌa pe̱fi xä ñho» ora desidi hindä nthäti? Ne dä mää ge yä soltero ꞌne yä soltera hingi pe̱ꞌtsi nuꞌu̱ yä dumu̱i pe̱ꞌtsi nuꞌu̱ xä nthäti. Yä soltero mänꞌa pe̱ꞌtsi rä liberta pa dä me̱päbi mä ndunthi rä Zi Dada Jeoba. Por ejemplo, dä za dä ma habu̱ go dä ne pa dä ꞌñuti märꞌa yä zi jäꞌi de rä Noya Äjuä. ꞌNehe, yä soltero mänꞌa pe̱ꞌtsi ndunthi rä tiempo pa dä tede yä ntsitsꞌi ko rä Zi Dada Jeoba.
2. ¿Te mä bentaja o benefisio pe̱ꞌtsi nuꞌu̱ xä nthäti ante rä ley?
Nuꞌu̱ xä nthäti ꞌnehe pe̱ꞌtsi yä bentaja ꞌne yä benefisio. Rä Noya Äjuä enä: «Mänꞌa xä ñho yoho ke nꞌatho» (Eclesiastés 4:9). Nuya yä noya mäjuäni ora nuꞌu̱ yä medinthäti jamäsu nuꞌu̱ yä konseho uni rä Zi Dada Jeoba. Nꞌa rä ñꞌo̱ho̱ näꞌä xä nthäti ko nꞌa rä ꞌme̱hñä, mähye̱gi xä promete ante rä ley ꞌne ante yä da Äjuä, ge ma dä mädi, ma dä ꞌñudi rä tꞌekꞌei ꞌne ma dä nsu nꞌa ngu mänꞌaa. Hänge nuꞌu̱ xä nthäti ante rä ley mänꞌa pe̱ꞌtsi ndunthi yä benefisio ke nuꞌu̱ xä juntatho. ꞌNe mu̱ mꞌe̱fa dä me̱ꞌtsi yä zi bätsi, gatꞌho ma dä senti seguro ngeꞌä ma dä mꞌu̱i ha nꞌa rä familia näꞌä pe̱ꞌtsi nꞌa rä hogä simiento.
3. ¿Hanja handi rä Zi Dada Jeoba rä nthäti?
Nuꞌmu̱ rä Zi Dada Jeoba bi thäti näꞌä rä mu̱di ñꞌo̱ho̱ ko näꞌä rä mu̱di ꞌme̱hñä, näꞌä bi ꞌñenä: «Rä ñꞌo̱ho̱ ma dä zoogi rä dada ꞌne rä nänä, ꞌne pe̱ꞌtsi te dä mꞌu̱hui rä ꞌme̱hñä» (Génesis 2:24). Rä Zi Dada Jeoba ne ge nuꞌu̱ xä nthäti, dä mädi nꞌa ngu mänꞌaa ꞌne dä mꞌu̱i mähye̱gi pa gatꞌho rä bida. Rä Biblia mää ge nꞌa rä däme o nꞌa rä ꞌme̱hñä dä za dä diborsia ho̱nse̱ mu̱ näꞌä toꞌo xä nthätui bi mꞌe̱ngui mä nꞌa rä jäꞌi. Rä Zi Dada Jeoba umbäbi rä derecho de dä desidi mu̱ dä diborsia o hinä näꞌä jäꞌi toꞌo bi thatꞌi (Mateo 19:9, TNM). a Rä Zi Dada Jeoba di proibi ge nꞌa rä ñꞌo̱ho̱ dä me̱ꞌtsi ndunthi yä ꞌme̱hñä, o nꞌa rä ꞌme̱hñä dä me̱ꞌtsi ndunthi yä däme (1 Timoteo 3:2, TNM).
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ te dä za gi pe̱fi, pa hindi mporta ua grä soltero o ya xkä nthäti, nuꞌi dä za gi mꞌu̱i ko rä johya ꞌne dä za gi johyabi rä koraso rä Zi Dada Jeoba.
4. Mu̱ grä soltero, probecha xä ñho nuꞌu̱ yä bentaja ꞌne yä benefisio gi pe̱ꞌtsi
Rä Hesu nunka bi nthäti ꞌne bi hyandi ngu nꞌa rä regalo nuꞌu̱ yä bentaja ꞌne yä benefisio mi pe̱ꞌtsi (Mateo 19:11, 12, TNM). Hñetihu̱ Mateo 4:23, TNM, ꞌnepu̱ thädihu̱ nunä rä ntꞌani:
-
Koꞌmu̱ rä Hesu nunka bi nthäti, ¿hanja bi probecha xä ñho nuꞌu̱ yä bentaja mi pe̱ꞌtsi pa bi me̱päbi rä Zi Dada Jeoba ꞌne bi matsꞌi yä zi jäꞌi?
Tanto yä soltero ngu yä soltera, dä za dä me̱ꞌtsi ndunthi rä johya mu̱ dä probecha nuꞌu̱ yä bentaja pe̱ꞌtsi ja ngu bi ja rä Hesu. Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:
-
¿Hanja dä za yä soltero dä probecha nuꞌu̱ yä bentaja pe̱ꞌtsi?
¿Gi pädi?
Rä Biblia hingi mää hängu nje̱ya debe dä me̱ꞌtsi nꞌa rä jäꞌi pa dä za dä nthäti. Pe rä Biblia hää di animäbi nꞌa rä tsꞌu̱ntꞌu̱ ꞌne nꞌa rä nxutsi ge dä nthäti asta nuꞌmu̱ ya dä nja yä je̱ya, ngeꞌä nuꞌmu̱ xa bäsjäꞌitho mänꞌa tse̱di nuꞌu̱ yä nkꞌatꞌä jäꞌi tsu̱di, ꞌne rꞌabu̱ hingi pädi näꞌä pe̱fi (1 Corintios 7:36, TNM).
5. Huahni xä ñho toꞌo ma gi nthätui
Rä nthäti näꞌä pa gatꞌho rä bida, hänge mähyoni gi huahni xä ñho kontoꞌo ma gi nthätui. Hñetihu̱ Mateo 19:4-6, 9, TNM, ꞌnepu̱ thädihu̱ nunä rä ntꞌani:
-
¿Por hanja nꞌa rä ñꞌo̱ho̱ o nꞌa rä ꞌme̱hñä di debe xa dä mbeni xä ñho mꞌe̱tꞌo änte de dä nthäti?
Rä Biblia udi te mä hogä mꞌu̱i debe dä me̱ꞌtsi nꞌa rä hogä däme ꞌne nꞌa rä hogä ꞌme̱hñä. Hänge nꞌa rä kristianu näꞌä ne dä nthäti, debe dä hyoni nꞌa rä jäꞌi näꞌä pe̱päbi ꞌnehe rä Zi Dada Jeoba. b Hñetihu̱ 1 Corintios 7:39, TNM ꞌne 2 Corintios 6:14, TNM, ꞌnepu̱ thädihu̱ nuya yä ntꞌani:
-
¿Por hanja nꞌa rä kristianu debe dä nthäti ho̱nse̱ ko nꞌa rä jäꞌi näꞌä pe̱päbi ꞌne di mädi ndunthi rä Zi Dada Jeoba?
-
¿Hanja gi kamfri ge ma dä senti rä Zi Dada Jeoba mu̱ nꞌa rä kristianu dä nthäti ko nꞌa rä jäꞌi näꞌä hingi pe̱päbi nixi di mädi rä Zi Dada Jeoba?
Mu̱ dä thuti rä yugo yoho yä zuꞌue nuꞌu̱ hingä mähye̱gi, di yoho ma dä sufri. Njabu̱ ꞌnehe, mu̱ nꞌa rä kristianu dä nthätui nꞌa rä jäꞌi näꞌä hingi mädi rä Zi Dada Jeoba, di yoho ma dä me̱ꞌtsi yä xuñha ꞌne xa ma dä sufri.
6. Hyandi rä nthäti ja ngu handi rä Zi Dada Jeoba
Mäyaꞌmu̱, ha rä hnini Israel bi mꞌu̱ rꞌa yä ñꞌo̱ho̱ nuꞌu̱ mi diborsia de yä ꞌme̱hñä ho̱nse̱ ngeꞌä mi umbäbi yä ganä. Hñetihu̱ Malaquías 2:13, 14, 16, ꞌnepu̱ thädihu̱ nunä rä ntꞌani:
-
Rꞌa yä däme o yä ꞌme̱hñä di desidi dä diborsia mäske näꞌä toꞌo xä nthätui, hinte mä pekado o adulterio xä yꞌo̱tꞌe. ¿Por hanja rä Zi Dada Jeoba xa di u̱tsa ora handi njabu̱?
Rä adulterio ꞌne rä diborsio japäbi xa dä sufri yä bätsi ꞌne näꞌä rä däme o näꞌä rä ꞌme̱hñä toꞌo bi thatꞌi.
Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:
-
Mu̱ nuꞌi xkä nthätui nꞌa rä jäꞌi näꞌä hingi mädi rä Zi Dada Jeoba, ¿te debe gi pe̱fi pa njabu̱ dä za gi ꞌmu̱ihu̱ ko rä johya?
7. Pe̱fi nuꞌu̱ yä konseho xä uni rä Zi Dada Jeoba pa yä medinthäti
Mu̱ rꞌabu̱ di jaꞌi xä ñhei gi pe̱fi nuꞌu̱ yä konseho uni rä Zi Dada Jeoba pa yä medinthäti, c beni ge näꞌä di prometeꞌi dä rꞌaꞌi ndunthi yä jäpi mu̱ gi yꞌo̱tꞌe ntsꞌe̱di po gi pe̱fi nuꞌu̱ yä mhända. Yꞌe̱ntsꞌihu̱ rä BIDEO.
Hñetihu̱ Hebreos 13:4, TNM, ꞌnepu̱ thädihu̱ nuya yä ntꞌani:
-
¿Gi kamfri ge nuꞌu̱ yä mhända uni rä Zi Dada Jeoba pa yä medinthäti hää dä za gä pe̱fihu̱? ¿Por hanja?
Mu̱ nꞌa rä kristianu ne dä nthäti, rä Zi Dada Jeoba di mändabi ge dä ma dä nthäti ante rä ley. ꞌNehe, ora ja nꞌa rä diborsio mähyoni ge dä ma dä diborsia ante rä ley pa dä nja nꞌa rä he̱ꞌmi. Po gatꞌho rä Xiꞌmhai, geꞌä ꞌnehe adi kasi gatꞌho yä gobiernu ꞌne yä autorida. Hñetihu̱ Tito 3:1, TNM, ꞌnepu̱ thädihu̱ nunä rä ntꞌani:
-
Mu̱ nuꞌi xkä nthäti, ¿gi ꞌmu̱i seguro ge näꞌä ri acta de gä nthäti, bi thoki xä ñho ꞌne hää di bale ante rä ley?
RꞌA YÄ JÄꞌI ENÄ: «Pa te mꞌe̱tꞌo toꞌo dä nthäti. Mientra di mädi nꞌa rä ñꞌo̱ho̱ ꞌne nꞌa rä ꞌme̱hñä dä za dä njuntatho».
-
Xiꞌmu̱ toꞌo dä xiꞌi njabu̱, ¿te ma gi thädi?
NÄꞌÄ DÄ PÄDIHU̱
Rä Biblia udi ge tanto yä soltero ngu nuꞌu̱ xä nthäti pe̱ꞌtsi ndunthi yä bentaja. Mu̱ dä probecha xä ñho nuꞌu̱ yä bentaja, ma dä zo̱ho̱ dä nja ngu nꞌa rä regalo xa mähotho näꞌä bi ehe de rä Zi Dada Jeoba.
Pa gä benihu̱
-
¿Hanja dä za dä probecha xä ñho nuꞌu̱ yä bentaja ꞌne yä benefisio pe̱ꞌtsi yä soltero ꞌne yä soltera?
-
¿Por hanja rä Biblia enä ge nꞌa rä kristianu näꞌä ne dä nthäti, debe dä nthätui nꞌa rä jäꞌi näꞌä ꞌnehe mädi ꞌne pe̱päbi rä Zi Dada Jeoba?
-
¿Ho̱nse̱ hämꞌu̱ di permiti rä Biblia dä nja nꞌa rä diborsio?
HABU̱ DÄ ZA GI PÄDI MÄ NꞌA TU̱I
¿Te di signifika ora rä Biblia enä ge nꞌa rä kristianu debe dä nthäti ko nꞌa rä jäꞌi näꞌä «pe̱päbi Äjuä ꞌnehe»?
«Nuꞌu̱ yä ntꞌani o̱tꞌe rꞌa yä jäꞌi» (La Atalaya, 1 de julio de 2004)
Hyandi te bi me̱fi yoho yä kristianu pa bi jamäsu nuꞌu̱ yä konseho uni rä Zi Dada Jeoba de rä nthäti.
Näꞌä mähyoni gi yꞌo̱tꞌe ngue̱nda mu̱ gi ne gi nthäti (11:53)
Pädi por hanja nꞌa rä ku enä ge nuꞌu̱ yä jäpi xä hñäni de rä Zi Dada Jeoba, mänꞌa di bale ndunthi ke gatꞌho näꞌä bi renunsia.
Nuga ndi to̱ꞌmi ge näꞌä nxutsi xä ne xä bädi de rä Zi Dada Jeoba (1:56)
¿Te debe dä yꞌo̱tꞌe ngue̱nda nꞌa rä jäꞌi änte de dä beni dä separa o dä diborsia de näꞌä jäꞌi xä nthätui?
«Ma gä udihu̱ rä tꞌekꞌei po näꞌä xä pe̱hnä Äjuä» (La Atalaya, diciembre de 2018)
a Hyandi rä nota 4 habu̱ mää te mä raso dä za dä me̱ꞌtsi nꞌa rä ñꞌo̱ho̱ o nꞌa rä ꞌme̱hñä pa dä zopu̱ näꞌä toꞌo xä nthätui, mäske hinte mä adulterio bi nja.
b Ha rꞌa yä luga, yä dada go geꞌu̱ huahni toꞌo dä nthätui yä tꞌu̱ o yä tꞌixu. Hänge nuꞌu̱ yä dada di mädi yä bätsi, pe̱ꞌtsi te dä hyandi nꞌa rä jäꞌi näꞌä di mädi rä Zi Dada Jeoba, hingä ma dä hyandi hängu rä bojä pe̱ꞌtsi o mu̱ pe̱ꞌtsi nꞌa rä däta nsu.
c Mu̱ nuꞌi gi ꞌmu̱hui nꞌa rä jäꞌi näꞌä hixkä nthätui, nuꞌi go ma gi desidi mu̱ gi nthätui o gi hye̱pu̱ näꞌä rä jäꞌi.
Puede que también le interese
NÄꞌÄ DI ÑꞌANI YÄ JÄꞌI
¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Ora ma gi hñäni ri curso, nuꞌi dä za gi usa näꞌä rä Biblia go gi ne. ꞌNehe dä za gi mbitabi ri familia o nuꞌu̱ ri amigo pa dä nxadi rä Biblia kongeꞌi.
