Pa gi umbäbi ri te rä Zi Dada Jeoba, mähyoni gi ja nꞌa rä sadi habu̱ ma gi prometebi ge ho̱nse̱ꞌä ma gi xo̱kämbeni ꞌne ma gi ꞌmu̱i pa gi pe̱päbi rä bolunta (Salmo 40:8). ꞌNepu̱, pa gi ꞌñudi ante märꞌaa ge ya xkä umbäbi ri te rä Zi Dada Jeoba, nubye̱ mähyoni gi nxixtehe. Nꞌa rä jäꞌi näꞌä di desidi dä umbäbi rä te rä Zi Dada Jeoba ꞌne di nxixtehe, rä mꞌu̱i di mpadi pa gatꞌho rä bida. ¿Te ma dä maxꞌäꞌi gi uni nunä paso?

1. ¿Te japäbi nꞌa rä jäꞌi dä umbäbi rä te rä Zi Dada Jeoba?

Rä mhäte geꞌä ma dä japäbi nꞌa rä jäꞌi dä umbäbi rä te rä Zi Dada Jeoba (1 Juan 4:10, 19, TNM). Rä Biblia enä: «Mädi ri Zi Dada Jeoba ko ngatꞌho ri koraso, ꞌne ko ngatꞌho ri alma, ꞌne ko ngatꞌho ri mfeni, ꞌne ko ngatꞌho ri tsꞌe̱di» (Marcos 12:30, TNM). Mu̱ xa mäjuäni di mädihu̱ rä Zi Dada Jeoba, ma dä nheki tanto ko näꞌä di mäñhu̱ ngu ko näꞌä di pe̱fihu̱. Ora nꞌa rä tsꞌu̱ntꞌu̱ xa mäjuäni di mädi nꞌa rä nxutsi, hingä ma dä zu dä yꞌapäbi dä nthätui. Njabu̱ ꞌnehe, mu̱ xa mäjuäni di mädihu̱ rä Zi Dada Jeoba, hingä ma gä ntsuhu̱ gä umbäbihu̱ mä tehu̱ ꞌne gä nxixtehehu̱.

2. ¿Te mä jäpi ofrese rä Zi Dada Jeoba pa nuꞌu̱ desidi dä nxixtehe ngu yä Testigo?

Mu̱ gi nxixtehe, dende näꞌä oraꞌä ma gi pertenese ha näꞌä rä familia pe̱ꞌtsi rä Zi Dada Jeoba. Ma gi hyandi hängu di mäꞌi ꞌne mänꞌa ma dä te näꞌä rä ntsitsꞌi gi pe̱ꞌtsi Kongeꞌä (hñeti Malaquías 3:16-18). Rä Zi Dada Jeoba ma dä zo̱ho̱ dä nja nꞌa rä Dada pa geꞌi. ꞌNehe, ma gi pe̱ꞌtsi nꞌa rä däta familia po gatꞌho rä Xiꞌmhai nuꞌu̱ xa di mädi rä Zi Dada Jeoba ꞌne nuꞌu̱ xa ma dä mäꞌi ꞌnehe (hñeti Marcos 10:29, 30, TNM). Pe änte de gi nxixtehe mähyoni gi kumpli ko nuya yä rekisito: Nꞌaa, mähyoni gi pädi toꞌo rä Zi Dada Jeoba, gi mädi ꞌne gi kamfri näꞌä rä Tꞌu̱. Yoho, mähyoni gi xatuäbi rä Zi Dada Jeoba ꞌne gi xipäbi ge gi umbäbi ri te pa gi pe̱päbi rä bolunta. Mu̱ ya gä kumpli ko nuya yä rekisito, nubye̱ hää ya dä za gi nxixtehe. Gatꞌho nuꞌu̱ di nxixtehe, nubye̱ ꞌnehe pe̱ꞌtsi rä oportunida de dä mꞌu̱i pa nzäntho. Rä Noya Äjuä enä: «Rä xixtehe [...] geꞌä di salbaꞌihu̱ ꞌnehe» (1 Pedro 3:21, TNM).

 HANJA DÄ ZA DÄ MAXꞌÄꞌI RÄ NOYA ÄJUÄ

3. Nuju̱ pe̱ꞌtsi te gä huahnihu̱ toꞌo di ne gä pe̱päbihu̱

Mäyaꞌmu̱, ha rä hnini Israel mi ꞌmu̱i ndunthi yä jäꞌi nuꞌu̱ mi kamfri ge xä za xä xo̱kämbeni tanto rä Zi Dada Jeoba ngu näꞌä hyate zidada Baal. Pe rä Zi Dada Jeoba bi me̱hni rä profeta Elías pa bi korreji näꞌä mi mbeni nuꞌu̱ yä israelita. Hñetihu̱ 1 Reyes 18:21, ꞌnepu̱ thädihu̱ nunä rä ntꞌani:

• ¿Te bi tꞌembäbi yä israelita ge mi debe dä me̱fi?

Ja ngu yä israelita, nuju̱ ꞌnehe pe̱ꞌtsi te gä huahnihu̱ toꞌo ma gä pe̱päbihu̱. Hñetihu̱ Lucas 16:13, TNM, ꞌnepu̱ thädihu̱ nuya yä ntꞌani:

• ¿Por hanja hindä za gä mꞌe̱gohu̱ pa rä Zi Dada Jeoba ꞌne al mismo tiempo gä mꞌe̱gohu̱ pa mä nꞌa rä hmuu?

• ¿Te dä za gä pe̱fihu̱ pa njabu̱ gä udihu̱ ge ya dä huahnihu̱ gä xo̱kämbenihu̱ ꞌne gä pe̱päbihu̱ ho̱nse̱ rä Zi Dada Jeoba?

4. Hyandi hängu di mäkägihu̱ rä Zi Dada Jeoba

 5. Mu̱ gi umbäbi ri bida rä Zi Dada Jeoba pa gi pe̱päbi, Näꞌä ma dä rꞌaꞌi ndunthi yä jäpi

 NÄꞌÄ DÄ PÄDIHU̱

Näꞌä rä mhäte di sentihu̱ po rä Zi Dada Jeoba, geꞌä jakägihu̱ gä umbäbihu̱ mä bidahu̱ ꞌne gä nxixtehehu̱.

Pa gä benihu̱

• ¿Por hanja rä Zi Dada Jeoba di merese gä mädihu̱ ꞌne gä xo̱kämbenihu̱ ko ngatꞌho mä korasohu̱?

• ¿Hanja di jäpi rä Zi Dada Jeoba nuꞌu̱ yä jäꞌi di nxixtehe ngu yä Testigo?

• Xi nuꞌi, ¿gi hohmä gi umbäbi ri te rä Zi Dada Jeoba pa gi pe̱päbi rä bolunta?