RÄ LECCIÓN 47
Xi nuꞌi, ¿ya xkä ñhoki pa gi nxixtehe?
Durante nunä rä tiempo gi nxadi rä Biblia, nuꞌi ya xkä pädi ndunthi de rä Zi Dada Jeoba, ꞌne zäi ge gi o̱tꞌe ntsꞌe̱di po gi ꞌmu̱i ja ngu di ho. Pe, ¿tobe jabu̱ nꞌa rä kosa o xuñha näꞌä hingi hoꞌi gi umbäbi ri te rä Zi Dada Jeoba ꞌne gi nxixtehe? Ha nunä lección ma gä handihu̱ te dä za gi pe̱fi pa gi täpäbi nuꞌu̱ yä xuñha.
1. ¿Hängu rä mfädi mähyoni gi pe̱ꞌtsi pa dä za gi nxixtehe?
Pa dä za gi nxixtehe mähyoni “gi pädi xä ñho näꞌä xa mäjuäni” (1 Timoteo 2:4, TNM). Nunä hindi signifika ge pe̱ꞌtsi te gi pädi gatꞌho näꞌä huxä ha rä Biblia. Ngeꞌä asta nuꞌu̱ o̱tꞌe ndunthi yä je̱ya de xä nxixtehe, hingi pädi gatꞌho ꞌne sigi di nxadi rä Biblia (Colosenses 1:9, 10). Pe hää jabu̱ rꞌa yä ntꞌudi de rä Biblia nuꞌu̱ xa mähyoni gi ntiende. Nuꞌu̱ yä anciano de rä mhuntsꞌi habu̱ gi ntini, ma dä maxꞌäꞌi pa gi hyandi mu̱ ya gi pe̱ꞌtsi näꞌä rä mfädi mähyoni de rä Biblia.
2. ¿Te mähyoni gi pe̱fi änte de gi nxixtehe?
Änte de gi nxixtehe, mꞌe̱tꞌo mähyoni gi uni nuya yä paso: Nꞌaa, gi “arrepenti, ꞌne gi tsopu̱ näꞌä rä ꞌñuu xä ntsꞌo” (hñeti Hechos 3:19, TNM). Nunä signifika ge debe gi arrepenti ko ngatꞌho ri koraso po nuꞌu̱ yä pekado gä o̱tꞌe mä mꞌe̱tꞌo ꞌne gi yꞌapäbi rä Zi Dada Jeoba ge dä punꞌäꞌi. Yoho, mähyoni gi u̱tsa nuꞌu̱ yä kosa di u̱tsa rä Zi Dada Jeoba ꞌne gi ꞌmu̱i ja ngu di mända. Hñuu, mähyoni gi ntini ha yä mhuntsꞌi ꞌne gi po̱ni ko märꞌa yä publicador pa gi predika.
3. ¿Por hanja hindi debe gi hyopäbi ge rä ntsu dä hñäkꞌäꞌi de gi nxixtehe?
Rꞌa yä jäꞌi tsu dä nxixtehe. ¿Por hanja? Enä ge ngeꞌä tsu te dä yꞌo̱tꞌe ꞌne dä fayabi rä Zi Dada Jeoba. Koꞌmu̱ ninꞌa rä jäꞌi hingä rä perfecto, rꞌabu̱ hingä geꞌä ma gä pe̱fihu̱. Asta nuꞌu̱ yä ꞌme̱go Äjuä de mäyaꞌmu̱, rꞌabu̱ bi komete yä error (hñeti Salmo 103:13, 14). Rä Zi Dada Jeoba xa di johya ora handi ge gi o̱tꞌe ntsꞌe̱di po gi pe̱fi näꞌä di mändaꞌi ꞌne näꞌä ya xä ñhoki pa dä maxꞌäꞌi. Rä Biblia enä: «Hinto dä za dä ꞌuegägihu̱ de rä mhäte Äjuä» (hñeti Romanos 8:38, 39, TNM).
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä handihu̱ hanja mu̱ gi sigi gi yꞌo̱tꞌe ntsꞌe̱di po gi pädi xä ñho rä Zi Dada Jeoba ꞌne gi asepta näꞌä rä mfatsꞌi rꞌaꞌi, geꞌä ma dä maxꞌäꞌi gi täpäbi yä xuñha ꞌne ma dä za gi nxixtehe.
4. Konose xä ñho rä Zi Dada Jeoba
¿Hängu di debe gi konose rä Zi Dada Jeoba pa dä za gi nxixtehe? Mähyoni gi konose tenguꞌä rä mꞌu̱i pa dä za gi mädi ꞌne dä nja ri ganä gi pe̱fi näꞌä di ho. Yꞌe̱ntsꞌihu̱ rä BIDEO pa gi hyandihu̱ hanja po gatꞌho rä Xiꞌmhai, geꞌä xä me̱fi nuꞌu̱ yä zi jäꞌi xä nxadi rä Biblia. ꞌNepu̱ thädihu̱ nunä rä ntꞌani:
-
Ja ngu dä handihu̱ ha rä bideo, ¿te bi matsꞌi nuꞌu̱ yä zi jäꞌi mi nxadi rä Biblia pa bi desidi bi umbäbi yä te rä Zi Dada Jeoba ꞌne bi nxixtehe?
Hñetihu̱ Romanos 12:2, TNM, ꞌnepu̱ thädihu̱ nuya yä ntꞌani:
-
¿Tobe hingi kamfri ge mäjuäni näꞌä udi rä Biblia?, o ¿tobe hingi kamfri ge yä testigo rä Jeoba hää udi näꞌä mäjuäni?
-
Mu̱ gi thogi njabu̱, ¿te dä hogi gi pe̱fi?
5. Täpäbi nuꞌu̱ yä xuñha hingi hoꞌi gi nxixtehe
Gatꞌho di ñhanduihu̱ yä xuñha ora di desidihu̱ gä umbäbihu̱ mä tehu̱ rä Zi Dada Jeoba ꞌne gä nxixtehehu̱. Hyandi hanja geꞌä bi thogi nꞌa rä zi nxutsi. Yꞌe̱ntsꞌihu̱ rä BIDEO, ꞌnepu̱ thädihu̱ nuya yä ntꞌani:
-
¿Te mä xuñha bi ñhandui Narangerel nuꞌu̱ mi ne dä hñäkuäbi de dä me̱päbi rä Zi Dada Jeoba?
-
¿Te mi senti Narangerel po rä Zi Dada Jeoba ꞌne hanja geꞌä bi matsꞌi pa bi däpäbi nuꞌu̱ yä xuñha?
Hñetihu̱ Proverbios 29:25 ꞌne 2 Timoteo 1:7, TNM, ꞌnepu̱ thädihu̱ nunä rä ntꞌani:
-
¿Habu̱ dä za gä tinihu̱ rä balo pa gä täpäbihu̱ nuꞌu̱ yä xuñha hägägihu̱ de gä pe̱päbihu̱ rä Zi Dada Jeoba?
6. Rä Zi Dada Jeoba ne dä maxꞌäꞌi
Rä Zi Dada Jeoba hingä ma dä hye̱kꞌäse̱ ꞌne ma dä maxꞌäꞌi gi pe̱fi näꞌä di hoꞌä. Yꞌe̱ntsꞌihu̱ rä BIDEO, ꞌnepu̱ thädihu̱ nuya yä ntꞌani:
-
Ja ngu dä handihu̱ ha rä bideo, ¿por hanja himi ne dä nxixtehe nꞌa rä zi ñꞌo̱ho̱?
-
¿Te bi matsꞌi näꞌä zi ñꞌo̱ho̱ pa njabu̱ mänꞌa bi me̱ꞌspäbi rä komfiansa rä Zi Dada Jeoba?
Hñetihu̱ Isaías 41:10, 13, ꞌnepu̱ thädihu̱ nunä rä ntꞌani:
-
Mu̱ gi umbäbi ri te rä Zi Dada Jeoba ꞌne gi nxixtehe, ¿por hanja dä za gi mꞌu̱i seguro ge hää ma dä za gi kumpli ko näꞌä ri promesa ma gi ja?
7. Balora ꞌne jamädibi rä Zi Dada Jeoba po näꞌä rä mhäte xä ꞌñudi po geꞌi
Entremäs gi hñudi gi ntso̱ꞌmi ꞌne gi hyandi hängu di mäꞌi rä Zi Dada Jeoba, mänꞌa ma gi jamädibi po gatꞌho näꞌä xä me̱fi po geꞌi, ꞌne mänꞌa ma dä nja ri ganä gi pe̱päbi pa nzäntho. Hñetihu̱ Salmo 40:5, ꞌnepu̱ thädihu̱ nunä rä ntꞌani:
-
De gatꞌho nuꞌu̱ yä jäpi xä rꞌaꞌi rä Zi Dada Jeoba, ¿ndaꞌä mänꞌa gi balora ꞌne gi jamädibi?
Rä profeta Jeremías xa mi mädi rä Zi Dada Jeoba ꞌne mi mädibi rä Noya. ꞌNehe, xa mi balora näꞌä rä däta nsu mi pe̱ꞌtsi de dä mämbäbi rä thuhu. Näꞌä bi ꞌñenä: «Nuꞌu̱ ri noya xa bi japi bi johya mä koraso, ngeꞌä di hätsꞌi ri thuhu, oh Zi Dada Jeoba» (Jeremías 15:16). Thädihu̱ nuya yä ntꞌani:
-
¿Por hanja xi nꞌa rä däta nsu toꞌo dä zo̱ho̱ dä ntestigo rä Jeoba?
-
Xi nuꞌi, ¿gi hohmä gi nxixtehe ꞌne dä fäꞌi ngu nꞌa rä testigo rä Jeoba?
-
Pe, ¿jabu̱ te häkꞌäꞌi pa hingi nxixtehe?
-
¿Te gi kamfri ge dä hogi gi pe̱fi pa njabu̱ dä za gi nxixtehe?
RꞌA YÄ JÄꞌI ENÄ: «Nuga hindi ne gä nxixtehe xiꞌmu̱ hingä kumpli ko näꞌä ma gä prometebi rä Zi Dada Jeoba».
-
Xi nuꞌi, ¿gi senti njabu̱ ꞌnehe?
NÄꞌÄ DÄ PÄDIHU̱
Nuꞌi hingi ꞌmu̱se̱, ¡rä Zi Dada Jeoba ma dä maxꞌäꞌi pa gi täpäbi yä xuñha ꞌne njabu̱ dä za gi nxixtehe!
Pa gä benihu̱
-
¿Hängu di debe gi pädi de rä Biblia pa dä za gi nxixtehe?
-
¿Te mähyoni gi pe̱fi änte de gi nxixtehe?
-
¿Por hanja hindi debe gi hyopäbi ge rä ntsu dä hñäkꞌäꞌi de gi nxixtehe?
HABU̱ DÄ ZA GI PÄDI MÄ NꞌA TU̱I
Hyandi te debe dä senti po rä Zi Dada Jeoba nuꞌu̱ yä jäꞌi ne dä nxixtehe.
Hyandi te dä za dä hñäkꞌäꞌi pa hingi nxixtehe ꞌne hanja dä za gi täpäbi nuꞌu̱ yä trampa.
Hyandi hanja nꞌa rä zi jäꞌi bi za bi däpäbi näꞌä rä bisio mi pe̱ꞌtsi, ꞌne njabu̱ bi za bi nxixtehe.
Hyandi hanja nꞌa rä zi ñꞌo̱ho̱ rä thuhu Ataa por fin bi desidi bi nxixtehe.
Puede que también le interese
NÄꞌÄ DI ÑꞌANI YÄ JÄꞌI
¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Ora ma gi hñäni ri curso, nuꞌi dä za gi usa näꞌä rä Biblia go gi ne. ꞌNehe dä za gi mbitabi ri familia o nuꞌu̱ ri amigo pa dä nxadi rä Biblia kongeꞌi.
