Ora di nthäti nꞌa rä ñꞌo̱ho̱ ꞌne nꞌa rä ꞌme̱hñä, xa di johya ndunthi. Pe, ¿ma dä dura pa gatꞌho rä bida näꞌä rä johya di sentiꞌu̱? Ndunthi yä medinthäti xä jamäsu nuꞌu̱ yä konseho uni rä Biblia ꞌne xä da ngue̱nda ge hää dä za.

1. ¿Te mä konseho uni rä Biblia pa nuꞌu̱ yä ñꞌo̱ho̱ xä nthäti?

Ha nꞌa rä familia, rä Zi Dada Jeoba xä hñutsꞌi rä ñꞌo̱ho̱ ngu rä ñäxu (hñeti Efesios 5:​23, TNM). Rä Zi Dada Jeoba to̱ꞌmi ge nꞌa rä däme, dä tomä yä desision nuꞌu̱ ma dä benefisiabi rä familia. Rä Biblia embäbi yä däme: «Sigi gi mädi ri ꞌme̱hñähu̱» (Efesios 5:​25, TNM). Nꞌa rä däme näꞌä di mädi rä ꞌme̱hñä, di trata xä ñho tanto nuꞌmu̱ märꞌa yä jäꞌi handi ngu nuꞌmu̱ hinä. ꞌNehe di jamäsu rä ꞌme̱hñä, di mäntene, o̱tsꞌe ora ne dä mää te di senti ꞌne di komprendebi (1 Timoteo 5:​8, TNM). Nꞌa rä däme, ꞌnehe debe dä gu̱tꞌi rä ꞌñuu pa dä matsꞌi rä ꞌme̱hñä dä ñꞌo ha rä ꞌñuu Äjuä (Mateo 4:4). Por ejemplo, rä däme debe dä xatuäbi rä Zi Dada Jeoba ꞌne dä nxadi rä Biblia ko rä ꞌme̱hñä. Mu̱ nꞌa rä däme di su rä ꞌme̱hñä ja ngu ri ꞌñehe, nuꞌmu̱ ma dä sigi dä me̱ꞌtsi nꞌa rä hogä ntsitsꞌi ko rä Zi Dada Jeoba (hñeti 1 Pedro 3:7).

2. ¿Te mä konseho uni rä Biblia pa nuꞌu̱ yä ꞌme̱hñä xä nthäti?

Rä Biblia enä: «Rä ꞌme̱hñä pe̱ꞌtsi te dä umbäbi rä tꞌekꞌei rä däme» (Efesios 5:​33, TNM). ¿Te ma dä matsꞌi nꞌa rä ꞌme̱hñä pa dä za dä umbäbi rä tꞌekꞌei rä däme? Mähyoni dä hñudi dä ntso̱ꞌmi ꞌne dä hyandi nuꞌu̱ yä hogä mꞌu̱i pe̱ꞌtsi rä däme ꞌne dä balora gatꞌho näꞌä pe̱fi po dä mäntene rä familia. Nꞌa rä ꞌme̱hñä udi ge di respeta rä däme ora nzofo ko rä tꞌekꞌei, ñä xä ñho de geꞌä, ꞌne di apoya ora desidi te dä me̱fi mäske näꞌä däme hingi pe̱päbi rä Zi Dada Jeoba.

3. ¿Te dä za dä me̱fi nuꞌu̱ yä medinthäti pa dä ntsitsꞌi xä ñho?

Rä Biblia enä ge nuꞌu̱ yä medinthäti «ma dä zo̱ho̱ dä nꞌatho rä ngo̱» (Mateo 19:​5, TNM). ¿Te di signifika nuya yä noya? Ge hinto di debe dä hyopäbi—nixi nꞌa rä jäꞌi nixi nꞌa rä kosa—dä japäbi dä gätꞌi näꞌä rä mhäte pe̱ꞌtsi nꞌa ngu mänꞌaa. Pa geꞌä, tanto rä däme ngu rä ꞌme̱hñä debe dä ꞌueke rä tiempo pa dä kombibi ꞌne dä mplatika. Nꞌa rä jäꞌi näꞌä xä nthäti, debe dä prokura mꞌe̱tꞌo rä Zi Dada Jeoba. ꞌNepu̱ debe dä prokura rä däme o rä ꞌme̱hñä änte ke cualquiera mä nꞌa rä jäꞌi o mä nꞌa rä kosa. Nꞌa rä däme hindi debe dä ntsixkui ndunthi mä nꞌa rä ꞌme̱hñä näꞌä hingo rä ꞌme̱hñä. Nixi nꞌa rä ꞌme̱hñä hindi debe dä ntsixkui ndunthi mä nꞌa rä ñꞌo̱ho̱ näꞌä hingä go rä däme.

 HANJA DÄ ZA DÄ MAXꞌÄꞌI RÄ NOYA ÄJUÄ

4. Däme, mädi ꞌne su ri ꞌme̱hñä

5. ꞌMe̱hñä, mädi ꞌne pe̱ꞌspäbi rä tꞌekꞌei ri däme

Rä Biblia embäbi nꞌa rä ꞌme̱hñä ge di debe dä me̱ꞌspäbi rä tꞌekꞌei rä däme, tanto mu̱ näꞌä däme pe̱päbi rä Zi Dada Jeoba o hinä. Hñetihu̱ 1 Pedro 3:​1, 2, ꞌnepu̱ thädihu̱ nuya yä ntꞌani:

• Mu̱ ri däme hingi pe̱päbi rä Zi Dada Jeoba zäi ge xa gi desea ge nꞌa rä pa dä zo̱ho̱ dä mädi ꞌne dä me̱päbi ꞌnehe. Pe, ¿te gi kamfri ge ma dä matsꞌi? ¿Ma dä matsꞌi mu̱ nzäntho gi predikabi, o mänꞌa ma dä matsꞌi mu̱ nzäntho gi trata ko rä ñhojäꞌi ꞌne gi umbäbi rä tꞌekꞌei? ¿Por hanja gi kamfri ge mänꞌa xä ñho njabu̱?

Ndunthi yä mꞌiki, rä däme ko rä ꞌme̱hñä di mfatsꞌi pa dä desidi te ma dä me̱fi. Pe hingä nzäntho ma dä mꞌu̱i de acuerdo rä ꞌme̱hñä ko rä däme. Ora thogi njabu̱, dä hogi ge rä ꞌme̱hñä ko ndunthi rä tꞌekꞌei dä xipäbi rä däme te di mbeni ꞌne te di  senti. Pe rä ꞌme̱hñä nunka di debe dä pumfri toꞌo xä hñutsꞌi rä Zi Dada Jeoba pa dä tomä yä desision ha rä familia. Rä Zi Dada Jeoba to̱ꞌmi ge rä ꞌme̱hñä dä apoya rä däme pa njabu̱ dä nja rä johya ha rä familia. Hñetihu̱ 1 Pedro 3:​3-5, TNM, ꞌnepu̱ thädihu̱ nunä rä ntꞌani:

• ¿Te di senti rä Zi Dada Jeoba ora handi ge nꞌa rä ꞌme̱hñä pe̱ꞌspäbi rä tꞌekꞌei rä däme?

6. Dä za gi täpäbihu̱ yä xuñha

 NÄꞌÄ DÄ PÄDIHU̱

Nꞌa rä däme ꞌne nꞌa rä ꞌme̱hñä dä za dä mꞌu̱i ko rä johya mu̱ di mädi nꞌa ngu mänꞌaa, mu̱ di yoho udi rä tꞌekꞌei, ꞌne mu̱ pe̱fi nuꞌu̱ yä konseho uni rä Noya Äjuä.

Pa gä benihu̱

• ¿Te debe dä me̱fi nꞌa rä däme pa njabu̱ dä nja rä johya ha rä medinthäti?

• ¿Te debe dä me̱fi nꞌa rä ꞌme̱hñä pa njabu̱ dä nja rä johya ha rä medinthäti?

• Mu̱ nuꞌi ya xkä nthäti, ¿te mä konseho de rä Biblia dä za dä maxꞌäꞌi pa mänꞌa gi mädi näꞌä jäꞌi xkä nthätui?