Ora di muntsꞌihu̱ ko märꞌa yä ku, di sentihu̱ ngu rä rey David ora bi ꞌñenä: «¡Xa mähotho ꞌne xa ungä rä johya ora yä ku di muntsꞌi ꞌne ꞌmu̱i unido!» (Salmo 133:1). Pe näꞌä rä unida di nheki hinxä njabu̱se̱. Kada nꞌa de nuꞌu̱ yä ku di ntini ha rä mhuntsꞌi o̱tꞌe ntsꞌe̱di ꞌne faxte pa dä nja nꞌa rä hogä ntsitsꞌi entre gatꞌho.

1. ¿Hanja di nheki ge ꞌmu̱i unido yä testigo rä Jeoba de gatꞌho rä Xiꞌmhai?

Mu̱ nꞌa rä pa gi ma ha märꞌa yä luga de rä Xiꞌmhai ꞌne gi hyoni nꞌa rä mhuntsꞌi habu̱ gi ntini, nuꞌu̱ yä ku de näꞌä rä luga ma dä hyantꞌäꞌi ngu de rä familia mäske nuꞌu̱ ñä mä nꞌa rä idioma. ¿Por hanja? Ngeꞌä yä testigo rä Jeoba de gatꞌho rä Xiꞌmhai mähye̱gi nuꞌu̱ yä ntꞌudi häni de rä Noya Äjuä. ꞌNehe, gatꞌho o̱tꞌe ntsꞌe̱di po dä ꞌñudi rä mhäte nꞌa ngu mänꞌaa. Hindi mporta te mä luga de rä Xiꞌmhai ꞌmu̱i kada nꞌa de geꞌu̱, gatꞌho ꞌmu̱i unido ngeꞌä xo̱kämbeni ꞌne pe̱päbi mähye̱gi rä Zi Dada Jeoba (Sofonías 3:9; nota).

2. ¿Te dä za gi pe̱fi pa njabu̱ gi mfaxte dä nja nꞌa rä hogä ntsitsꞌi ꞌne rä unida ha rä mhuntsꞌi?

Rä Biblia enä: «Xa dä mädihu̱ nꞌa ngu mänꞌaa ko ngatꞌho ri korasohu̱» (1 Pedro 1:​22, TNM). ¿Hanja dä za gi pe̱fi nunä konseho? En lugar de gi hyandi ho̱nse̱ näꞌä hingi pe̱fi xä ñho märꞌaa, mänꞌa dä hogi gi hyandi te mä hogä mꞌu̱i udi yä ku. ꞌNehe, en lugar de gi ntsixkui ho̱nse̱ ko nuꞌu̱ pe̱ꞌtsi yä gusto ja ngu nuꞌi, dä hogi gi yꞌo̱tꞌe ntsꞌe̱di po gi konose gatꞌho yä ku de rä mhuntsꞌi, hindi mporta habu̱ yä mengu, te mä idioma ñä, o te mä gusto pe̱ꞌtsi. Mu̱ hindi numäñhohu̱ rꞌa mä kuhu̱ de ha rä mhuntsꞌi, mähyoni gä o̱tꞌehu̱ ntsꞌe̱di po gä häkihu̱ de ha mä ñäxuhu̱ ꞌne de ha mä korasohu̱ nuꞌu̱ yä mfeni xä ntsꞌo di pe̱ꞌtsihu̱ de geꞌu̱ (hñeti 1 Pedro 2:​17). a

3. ¿Te debe gi pe̱fi mu̱ gi pe̱ꞌtsi nꞌa rä xuñha ko mä nꞌa rä ku?

Mäske yä testigo rä Jeoba ꞌmu̱i unido, gatꞌho yä imperfecto. Hänge rꞌabu̱ dä za dä me̱fi nꞌa rä kosa näꞌä dä u̱mbäbi rä mfeni märꞌaa. Ora thogi njabu̱, rä Biblia xikägihu̱ ge di debe gä mpumbäbihu̱ nꞌa ngu mänꞌaa ja ngu rä Zi Dada Jeoba xä punꞌgägihu̱ (hñeti Colosenses 3:​13, TNM). Nuju̱ njatꞌä di u̱mbäbihu̱ rä mfeni rä Zi Dada Jeoba, pe mäske njabu̱ Näꞌä sigi di punꞌgägihu̱. Hänge rä Zi Dada Jeoba to̱ꞌmi gä pumbäbihu̱ mä kuhu̱ ora di ofendegihu̱. Mu̱ nuꞌi gi da ngue̱nda ge xkä ofende nꞌa rä ku, dä hogi gi ma guä honi nguntꞌä ꞌne gi yꞌapäbi rä mpumbäte (hñeti Mateo 5:​23, 24, TNM). b

 HANJA DÄ ZA DÄ MAXꞌÄꞌI RÄ NOYA ÄJUÄ

4. Ogi huahnitho toꞌo gi numäñho

Äjuä to̱ꞌmi ge nuju̱ gä mädihu̱ gatꞌho mä kuhu̱. Pe rꞌabu̱ di jakägihu̱ xä ñhei gä numäñhohu̱ nuꞌu̱ di handihu̱ o di sentihu̱ ge nꞌañꞌo de gekhu̱. ¿Te ma dä maxkägihu̱ pa gä numäñhohu̱ gatꞌho yä ku? Hñetihu̱ Hechos 10:​34, 35, TNM, ꞌnepu̱ thädihu̱ nuya yä ntꞌani:

• Mu̱ rä Zi Dada Jeoba di numäñho gatꞌho yä jäꞌi ꞌne hindi mportabi habu̱ yä mengu o tenguꞌu̱ yä ꞌmai, ¿hanja debe gi hyandi nuꞌu̱ yä ku gi senti ge nꞌañꞌo de geꞌi?

• Xi ha näꞌä rä komunida o hnini habu̱ gi ꞌmu̱i, ¿ꞌmu̱pu̱ rꞌa yä jäꞌi nuꞌu̱ hingi numäñho märꞌa yä jäꞌi ngeꞌä ñä mä nꞌa rä idioma, ngeꞌä yä mengu de mä nꞌa rä luga o po mä nꞌa rä raso? ¿Gi hohmä gi ebita nuꞌu̱ yä tsꞌo mfeniꞌu̱ ꞌne gi mädi gatꞌho yä jäꞌi ja ngu di ja rä Zi Dada Jeoba?

Hñetihu̱ 2 Corintios 6:​11-​13, TNM, ꞌnepu̱ thädihu̱ nunä rä ntꞌani:

• ¿Te gi kamfri ge dä za dä maxꞌäꞌi pa mänꞌa gi mädi gatꞌho yä ku?

5. Uni rä mpumbäte ꞌne mfaxte pa dä nja nꞌa rä hogä ntsitsꞌi ha rä mhuntsꞌi

Rä Zi Dada Jeoba nzäntho ꞌmu̱i dispuesto dä punꞌgägihu̱ mäske näꞌä nunka di japäbi mꞌe̱di te gä pumbäbihu̱. Hñetihu̱ Salmo 86:5, ꞌnepu̱ thädihu̱ nuya yä ntꞌani:

• ¿Te utkägihu̱ nunä testo de näꞌä rä mpumbäte uni rä Zi Dada Jeoba?

• Xi nuꞌi, ¿te gi senti nubye̱ gi pädi ge rä Zi Dada Jeoba ꞌmu̱i dispuesto dä punꞌäꞌi?

• ¿Hämꞌu̱ dä za dä jakägihu̱ xä ñhei gä ntsitsꞌihu̱ ko märꞌaa?

¿Te mä mꞌu̱i dä za gä pädihu̱ de rä Zi Dada Jeoba ꞌne geꞌä ma dä maxkägihu̱ gä ntsitsꞌihu̱ ko gatꞌho yä ku? Hñetihu̱ Proverbios 19:​11, ꞌnepu̱ thädihu̱ nunä rä ntꞌani:

• Ora toꞌo di ofendeꞌi, ¿te dä za gi pe̱fi pa njabu̱ hindä sigi dä te yä xuñha?

 Ora nuju̱ go di ofendehu̱ märꞌaa, ¿te di debe gä pe̱fihu̱? Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:

• Ja ngu dä handihu̱ ha rä bideo, ¿te bi me̱fi nꞌa rä nju pa bi resolbe nuꞌu̱ yä xuñha mi pe̱ꞌtsi ko mä nꞌa rä nju?

 NÄꞌÄ DÄ PÄDIHU̱

Mu̱ nuꞌi gi ꞌmu̱i dispuesto gi pumbäbi toꞌo di ofendeꞌi ꞌne gi mädi gatꞌho yä zi ku, ma gi mfaxte pa dä nja rä unida ha rä mhuntsꞌi.

Pa gä benihu̱

• ¿Te dä za gi pe̱fi pa gi numäñho ꞌne gi mädi gatꞌho yä ku?

• ¿Te dä za gi pe̱fi ora gi pe̱ꞌtsi yä xuñha ko mä nꞌa rä ku?

• ¿Gi hohmä gi de̱mbäbi rä ejemplo rä Zi Dada Jeoba ꞌne gi pumbäbi toꞌo di ofendeꞌi? ¿Por hanja?