Durante nunä rä tiempo xkä nxadi rä Biblia, nuꞌi xkä pädi ndunthi de rä Zi Dada Jeoba ꞌne geꞌä xä maxꞌäꞌi pa mänꞌa xä te näꞌä rä mhäte gi senti po Geꞌä. Tal vez asta ya xkä umbäbi ri te pa gi pe̱päbi o asta ya xkä nxixtehe. Pe mu̱ hinä, zäi ge ya gi beni gi jabu̱ mꞌe̱fa. Pe, ¿gi pädi? Ora di nxixtehe nꞌa rä jäꞌi, ja penä fu̱di nꞌa rä hogä ntsitsꞌi ko rä Zi Dada Jeoba. Hänge mꞌe̱fa de gi nxixtehe ma dä ja mꞌe̱di gi sigi gi tede näꞌä rä hogä ntsitsꞌi gi pe̱ꞌtsi Kongeꞌä. Geꞌä ma gi sigi gi pe̱fi tanto ha nunä bida di ꞌmu̱hu̱, ngu ha näꞌä rä bida xä ꞌñepu̱ nuua ha rä Xiꞌmhai. Ma gä handihu̱ hanja dä za gi ja.

1. ¿Por hanja di debe gi tede näꞌä rä ntsitsꞌi gi pe̱ꞌtsi ko rä Zi Dada Jeoba?

Pe̱ꞌtsi te gä o̱tꞌehu̱ ntsꞌe̱di po gä tedehu̱ näꞌä rä mhäte di sentihu̱ po rä Zi Dada Jeoba, ꞌne gä jamäsuhu̱ näꞌä rä hogä ntsitsꞌi di pe̱ꞌtsihu̱ Kongeꞌä. ¿Por hanja? «Pa njabu̱ nunka gä ꞌuengihu̱ de rä ꞌñuu» ꞌne nunka gä ꞌuegehu̱ de Geꞌä (Hebreos 2:​1, TNM). ¿Te ma dä maxkägihu̱ pa gä yꞌohu̱ mänjuäntho ha rä ꞌñuu rä Zi Dada Jeoba? Pe̱ꞌtsi te gä probechahu̱ gatꞌho näꞌä rä tiempo kohi pa gä predikahu̱ ꞌne gä utihu̱ märꞌa yä zi jäꞌi de rä Noya Äjuä. ꞌNehe, mähyoni gä honihu̱ märꞌa yä forma de hanja gä pe̱päbihu̱ mä ndunthi rä Zi Dada Jeoba (hñeti Filipenses 3:​16, TNM). ¡Gä pe̱päbihu̱ rä Zi Dada Jeoba geꞌä rä bida mänꞌa xä ñho! (Salmo 84:​10).

2. ¿Te mä nꞌa dä za gi sigi gi pe̱fi?

Ha nunä lección ja huadiua näꞌä rä ntꞌudi bi tꞌaꞌi de rä Mäkä Tꞌofo. Pe nunä rä ꞌñuu xkä ju̱u̱ pa gi pe̱päbi rä Zi Dada Jeoba, tobe di sigi. Rä Biblia enä: «Debe gi hyehu̱ näꞌä rä rꞌayꞌo mꞌu̱i ja ngu rä bolunta Äjuä» (Efesios 4:​23, 24, TNM). Mähyoni gi sigi gi nxadi rä Biblia ꞌne gi ntini ha yä mhuntsꞌi pa mänꞌa gi pädi tenguꞌä rä mꞌu̱i rä Zi Dada Jeoba. Rä Zi Dada Jeoba xa ma dä johya mu̱ dä hyandi ge gi sigi gi o̱tꞌe ntsꞌe̱di po gi de̱mbäbi rä mꞌu̱i.

3. ¿Hanja ma dä maxꞌäꞌi rä Zi Dada Jeoba pa gi sigi gi yꞌo ha rä ꞌñuu ꞌne gi bansa?

Rä Biblia enä: «Äjuä [...] go geꞌä ma dä huati ri entrenämientohu̱. Go geꞌä ma dä maxꞌähu̱ pa hingi tagihu̱, go geꞌä ma dä rꞌaꞌähu̱ rä tsꞌe̱di, ꞌne ma dä rꞌaꞌähu̱ nꞌa rä luga seguro pa dä za gi ꞌmaihu̱ xä ñho ꞌne hingi njuenihu̱» (1 Pedro 5:​10, TNM). Kada nꞌa de gekhu̱ di pe̱ꞌtsihu̱ yä xuñha ꞌne di ñhanduihu̱ yä tentasio. Pe mu̱ hingä he̱gihu̱ rä Zi Dada Jeoba, näꞌä ma dä rꞌakägihu̱ rä mfatsꞌi pa dä za gä ze̱tihu̱ (Salmo 139:​23, 24). ꞌNehe, rä Zi Dada Jeoba di prometeꞌi dä rꞌaꞌi tanto rä ganä ngu rä tsꞌe̱di pa gi pe̱päbi (hñeti Filipenses 2:​13, TNM).

 HANJA DÄ ZA DÄ MAXꞌÄꞌI RÄ NOYA ÄJUÄ

4. Sigi gi mplatikaui näꞌä toꞌo xa ri amigo

Gi nxadi rä Biblia ꞌne gi xatuäbi rä Zi Dada Jeoba, geꞌä xä maxꞌäꞌi pa gi pe̱ꞌtsi nꞌa rä hogä ntsitsꞌi Kongeꞌä. Pe, ¿hanja dä za gi usa mänꞌa xä ñho nuya yä mfatsꞌi pa tobe mänꞌa gi ñꞌamigoui?

Hñetihu̱ Salmo 62:8, ꞌnepu̱ thädihu̱ nunä rä ntꞌani:

• ¿Te dä za gi pe̱fi pa njabu̱ mänꞌa dä hogi nuꞌu̱ yä platika gi pe̱ꞌtsi ko rä Zi Dada Jeoba ora gi xatuäbi?

Hñetihu̱ Salmo 1:2, ꞌnepu̱ thädihu̱ nunä rä ntꞌani:

• Ora gi heti rä Biblia, ¿te dä za gi pe̱fi pa njabu̱ mänꞌa dä te näꞌä rä ntsitsꞌi gi pe̱ꞌtsi ko rä Zi Dada Jeoba?

¿Te dä za gi pe̱fi pa njabu̱ dä za gi nxadi mänꞌa xä ñho rä Biblia ꞌne mänꞌa gi benefisia? Pa gi hyandihu̱ rꞌa yä idea, yꞌe̱ntsꞌihu̱ rä BIDEO, ꞌnepu̱ thädihu̱ nuya yä ntꞌani:

• De näꞌä gä handi ha rä bideo, ¿te gi hohmä gi pe̱fi ꞌnehe?

• ¿Ngu te gi hohmä gi imbestiga mätsꞌu̱ ha rä Biblia?

 NÄꞌÄ DÄ PÄDIHU̱

Sigi gi yꞌo̱tꞌe ntsꞌe̱di po gi pe̱ꞌtsi nꞌa rä hogä ntsitsꞌi ko rä Zi Dada Jeoba, ꞌne sigi gi hyandi hanja dä za gi pe̱päbi mänꞌa xä ñho pa gi sigi gi bansa ha rä ꞌñuu. Mu̱ gi pe̱fi njabu̱, ¡ma dä za gi johya pa nzäntho!

Pa gä benihu̱

• ¿Por hanja dä za gi mꞌu̱i seguro ge rä Zi Dada Jeoba ma dä maxꞌäꞌi pa gi pe̱päbi ꞌne gi sigi gi yꞌo ha rä ꞌñuu?

• ¿Te dä za gi pe̱fi pa njabu̱ gi sigi gi tede näꞌä rä ntsitsꞌi gi pe̱ꞌtsi ko rä Zi Dada Jeoba?

• ¿Te dä za gi pe̱fi pa gi sigi gi bansa ha rä ꞌñuu rä Zi Dada Jeoba ꞌne gi pe̱päbi mänꞌa xä ñho?