¿TE GI handi nubye̱ ha nunä rä kꞌoi? Hää, gi handi yä jäꞌi. Rä mu̱di ñꞌo̱ho̱ ꞌne rä mu̱di ꞌme̱hñä. ¿Toꞌo bi hyoki? Äjuä. ¿Gi pädi te rä thuhu Äjuä? Rä thuhu Jeoba. Rä ñꞌo̱ho̱ bi tꞌembi Adan ꞌne rä ꞌme̱hñä bi tꞌembi Eba.

Jeoba bi hyoki rä ñꞌo̱ho̱ njaua: bi gu̱ rä hai ꞌne kongeꞌä bi hyoki nꞌa rä ñꞌo̱ho̱ xi mähotho. ꞌNepu̱ bi huiꞌtuäbi rä xiñu, ꞌne rä Adan bi mu̱di bi nja rä te ꞌne himi pe̱ꞌtsi rä tsꞌoki.

Äjuä mi pe̱ꞌtsi nꞌa rä ꞌme̱fi pa rä Adan. Bi ꞌñembi dä hñuꞌtsuäbi rä thuhu gatꞌho yä zuꞌue. Zäi ge rä Adan po ndunthi yä pa, mꞌe̱tꞌo bi hyandi xä ñho te mi pe̱fi nuꞌu̱ yä zuꞌue pa njabu̱ bi za bi hñuꞌtsuäbi yä thuhu. Mientra mi ja nunä rä ꞌme̱fi, rä Adan bi mu̱di bi hyandi nꞌa rä tꞌo̱tꞌe. ¿Gi pädi te mä tꞌo̱tꞌeꞌä?

Gatꞌho yä zuꞌue mi pe̱ꞌtsi yä ñꞌoui. Yä elefante ꞌne yä zate mi ꞌmu̱ yä ñꞌoui. Pe rä Adan hingä mi pe̱ꞌtsi nꞌa rä ñꞌoui. Hänge Jeoba bi japi bi ñꞌähä rä Adan, ꞌne bi hñäꞌmpäbi nꞌa rä ndoyꞌo de rä ꞌmo̱tsꞌe. Ko nunä rä ndoyꞌo, Jeoba bi hyoki nꞌa rä ꞌme̱hñä pa bi nthäti ko rä Adan.

¡Nubye̱ rä Adan xa mi johya! ꞌNe dä za gä mäñhu̱ ge rä Eba ꞌnehe xa mi johya ngeꞌä mi handi näꞌä rä uädri xa mähotho habu̱ ma dä mꞌu̱i. Nubye̱ nuyu̱ ma xä za xä me̱ꞌtsi yä bätsi ꞌne xä mꞌu̱i mähye̱gi ko ndunthi rä johya.

Jeoba mi ne ge rä Adan ꞌne rä Eba xä mꞌu̱i pa nzäntho. Mi ne ge nuyu̱ yä jäꞌi xä hyoki gatꞌho rä Xiꞌmhai tsꞌu̱ngänza ngu näꞌä rä uädri Eden. ¡Hängu rä johya bi me̱ꞌtsi rä Adan ꞌne rä Eba ngeꞌä bi tꞌembi njabu̱! ¿Xkä hohmä xkä mfaste pa gi hyoki de rä Xiꞌmhai nꞌa rä uädri tsꞌu̱ngänza? Pe rä johya rä Adan ꞌne rä Eba himbi dura po ndunthi yä je̱ya. Ma gä handihu̱ por hanja.