NUBYE̱ hyandi rä Kain ꞌne rä Abel. Nuyu̱ ya xä te. Rä Kain mi potꞌi rä hai. Mi potꞌi yä ndaa, yä fruta ꞌne märꞌa yä ꞌmotꞌi.

Rä Abel mi su yä de̱ti. Näꞌä mi ho dä su yä tꞌu̱tudi. ꞌNe nuyu̱ bi te xa rꞌa yä däta de̱ti, ꞌne nguntꞌä bi me̱ꞌtsi nꞌa rä taxo de gä de̱ti näꞌä mi fadi.

Nꞌa rä pa rä Kain ꞌne rä Abel bi hñäꞌtsuäbi nꞌa rä hogä ntꞌuni Äjuä. Rä Kain bi hñäꞌtsuäbi näꞌä xki motꞌi. Rä Abel bi hñäꞌtsuäbi nꞌa rä de̱ti näꞌä xa xmä ñho de gatꞌho. Jeoba bi ho näꞌä bi uni rä Abel. Pe himbi ho näꞌä bi uni rä Kain. ¿Gi pädi por hanja?

Mäjuäni ge näꞌä bi uni rä Abel mänꞌa xmä ñho ke näꞌä bi ungä rä Kain. Pe rä Abel ꞌnehe mrä hojäꞌi. Mi mädi Jeoba ꞌne rä ku. Pe rä Kain näꞌä mrä tsꞌomꞌu̱i; hingä mi mädi rä ku.

Hänge Äjuä bi ꞌñembäbi rä Kain ge pe̱ꞌtsi dä paati näꞌä rä tsꞌo mfeni. Pe rä Kain himbi ne bi yꞌo̱te Jeoba. Xa bi nkue̱ ngeꞌä Jeoba go mi handi xä ñho rä Abel. Mꞌe̱fa de geꞌä rä Kain bi ꞌñembäbi rä Abel: “Me̱e̱ ha rä mbonthi”. ꞌNe nuꞌmu̱ mi yꞌose̱ ha rä mbonthi ꞌne hinto mi handiꞌu̱, rä Kain bi yu̱ntꞌi xi ntsꞌe̱di rä ku asta xa bi hyo. ¿Hänge xi xä ntsꞌo näꞌä rä tꞌo̱tꞌe bi me̱fi rä Kain?

Mäske rä Abel bi du, Äjuä hinxä pumfri. Rä Abel mrä hojäꞌi ꞌne Jeoba nunka di pumfri nuꞌu̱ yä jäꞌi njabu̱. Hänge nꞌa rä pa Jeoba ma dä japi rä Abel dä me̱ꞌtsi rä te mänꞌaki, ꞌne nunka ma dä du. Ma dä za dä mꞌu̱i nuua ha rä Xiꞌmhai pa nzäntho. ¿Hänge ma dä hogi gä pädihu̱ nuꞌu̱ yä jäꞌi ngu rä Abel?

Pe Äjuä hindi ho nuꞌu̱ yä jäꞌi ngu rä Kain. Hänge mꞌe̱fa de bi hyo rä ku, Äjuä bi kastiga rä Kain ꞌne bi me̱hni yabu̱ de rä nguu. Rä Kain bi ma bä ꞌmu̱i ha mänꞌa rä luga de rä Xiꞌmhai, bi zitsꞌi nꞌa de nuꞌu̱ yä nju ꞌne mꞌe̱fa bi nthäti kongeꞌä.

Mꞌe̱fa, rä Kain ꞌne rä ꞌme̱hñä bi mu̱di bi me̱ꞌtsi yä bätsi. Nuꞌu̱ märꞌa yä tꞌu̱ ꞌne yä tꞌixu rä Adan ꞌne rä Eba, ꞌnehe bi nthäti ꞌne bi me̱ꞌtsi yä bätsi. Hänge nguntꞌä bi xu yä jäꞌi ha rä Xiꞌmhai. Ma gä pädihu̱ rꞌa de nuyu̱ yä jäꞌi.