¿GI HANDI te pe̱fi rä Abraan? Hñä nꞌa rä juai, ꞌne ꞌñenä ma dä hyo rä tꞌu̱. ¿Por hanja? Mꞌe̱tꞌo, ma gä handihu̱ hanja bi me̱ꞌtsi nꞌa rä tꞌu̱ rä Abraan ꞌne rä Sara.

Beni, Äjuä xki ñäꞌti rä Abraan ꞌne rä Sara ge ma xä me̱ꞌtsi nꞌa rä bätsi. Pe mi nheki ge hingä ma xä njabu̱, ngeꞌä rä Abraan ꞌne rä Sara ya mñä zi däta jäꞌi. Pe rä Abraan mi kamfri ge Äjuä hää xä za xä ja näꞌä xki ñäꞌti. Hänge, ¿te bi thogi?

Mi thogi nꞌa nje̱ya dende nuꞌmu̱ Äjuä xki ja näꞌä rä kohi, rä Abraan ꞌne rä Sara bi me̱ꞌtsi nꞌa rä zi ꞌue̱ne bi ꞌñembi rä Isak. Rä Abraan mi pe̱ꞌtsi 100 yä je̱ya ꞌne rä Sara mi pe̱ꞌtsi 90 yä je̱ya. ¡Äjuä bi kumpli näꞌä rä kohi!

Pe mi te rä Isak, Jeoba bi tsapi näꞌä rä jamfri mi pe̱ꞌtsi rä Abraan. Äjuä bi nzofo: “¡Abraan!”, ꞌne rä Abraan bi dädi: “¡Xi di ꞌmakua!”. Nuꞌmu̱ Äjuä bi ꞌñembi: “Ju̱ ri tꞌu̱, näꞌä ri rꞌatꞌu̱, rä Isak, ꞌne gi ma ha näꞌä rä tꞌo̱ho̱ ma gä utꞌäꞌi. Ja gehni gi hyo ri tꞌu̱ ꞌne ma gi uni ngu nꞌa rä ofrenda”.

¡Rä Abraan xa bi durämu̱i ngeꞌä xa mi mädi ndunthi rä tꞌu̱! ꞌNe beni, Äjuä xki ñäꞌti rä Abraan ge yä bätsi ma xä mꞌu̱i ha rä hai Kanään. Pe, ¿hanja ma xä thogi njabu̱ mu̱ xä du rä Isak? Rä Abraan himi pädi te ma xä thogi, pe mäske njabu̱ bi yꞌo̱te Äjuä.

Mi zo̱ni ha rä tꞌo̱ho̱, rä Abraan bi dätꞌi rä Isak ꞌne bi yꞌe̱ntsꞌi ha näꞌä rä altar xki hyoki. Nuꞌmu̱ bi hñäi rä juai pa dä hyo rä tꞌu̱. Pe nguntꞌä nꞌa rä e̱nxe̱ Äjuä bi nzofo: “¡Abraan, Abraan!”, ꞌne rä Abraan bi dädi: “¡Xi di ꞌmakua!”.

“Ote gi o̱ꞌtuäbi ri tꞌu̱”, bi ꞌñenä Äjuä. “Nubye̱ hää di pädi ge gi kamfrigi, ngeꞌä hingä hyo̱ke gi rꞌaki ri tꞌu̱, näꞌä ri rꞌatꞌu̱.”

¡Rä Abraan xa mi pe̱ꞌtsuäbi rä jamfri Äjuä! Mi pädi ge Jeoba xä za xä ja gatꞌho näꞌä go xä ne, ꞌne ge Jeoba xä za xä gu̱tsꞌi rä Isak de rä du. Pe Äjuä himi ne ge rä Abraan xa hyo rä Isak; hänge bi japi bi nꞌue̱tꞌi nꞌa rä de̱ti ha nꞌa rä tꞌu̱kä zaa, ꞌne bi ꞌñembi rä Abraan ge dä hyo ꞌne dä uni de gä ofrenda näꞌä rä de̱ti, hingä rä Isak.