¿GI PÄDI toꞌo nuni rä ꞌme̱hñä hutsꞌi hä rä kꞌoi? Rä thuhu Rebeka. Rä Rebeka ma dä tsu̱di nuni rä ñꞌo̱ho̱ rä thuhu Isak. Rä Rebeka ma dä nthätui rä Isak. ¿Hanja bi thogi?

Rä Abraan, rä dada rä Isak, mi ne nꞌa rä hogä ꞌme̱hñä pa rä tꞌu̱. Himi ne ge rä Isak xa nthätui ko nꞌa de nuꞌu̱ yä ꞌme̱hñä mñä mengu Kanään, ngeꞌä nuꞌu̱ yä jäꞌi mi xo̱kämbeni nuꞌu̱ yä zidada hingä mäjuäni. Hänge rä Abraan bi nzofo nꞌa de nuꞌu̱ yä ꞌme̱go ꞌne bi ꞌñembäbi: “Di ne gi pengi ha Aran, habu̱ bi ꞌmu̱i nuꞌu̱ mä pariente ꞌne guä honi nꞌa rä ꞌme̱hñä pa mä tꞌu̱ Isak”.

Rä ꞌme̱go rä Abraan nguntꞌä bi gu̱ rꞌe̱tꞌa yä kameyo, bi gu̱ rä ꞌñuu ꞌne bi ma xi yabu̱. Nuꞌmu̱ ya ma xä zo̱ni habu̱ mi ꞌmu̱i yä pariente rä Abraan, bi ntsaya ha nꞌa rä poso. Ya xki yu̱i rä Hyadi, nuꞌmu̱ yä ꞌme̱hñä de näꞌä rä hnini mi pa mi ai yä dehe. Hänge rä ꞌme̱go rä Abraan bi xatuäbi Jeoba ꞌne bi ꞌñembäbi: “Näꞌä rä ꞌme̱hñä dä yꞌai rä dehe pa geki ꞌne pa yä kameyo, geꞌä gi huahni pa dä nthätui rä Isak”.

Nguntꞌä bi zo̱ho̱ rä Rebeka pa bi yꞌai rä dehe. Näꞌä rä ꞌme̱go rä Abraan bi yꞌadi rä dehe, ꞌne rä Rebeka bi umbäbi. ꞌNehe bi yꞌai ndunthi rä dehe pa gatꞌho nuꞌu̱ yä kameyo xa mi tuthe. Koꞌmu̱ yä kameyo tsithe ndunthi, rä Rebeka bi yꞌai xi ndunthi yä dehe.

Mi uadi rä Rebeka bi yꞌai yä dehe, rä ꞌme̱go rä Abraan bi yꞌambäbi toꞌo rä dada. ꞌNehe bi yꞌambäbi mu̱ xä za xä ñꞌoxi ha rä nguu. Rä Rebeka bi dädi: “Mä dada rä thuhu Betuel, ꞌne ha rä nguu ja habu̱ gi ñꞌoxi”. Rä ꞌme̱go rä Abraan mi pädi ge rä Näkor geꞌä mrä dada rä Betuel, näꞌä rä ku rä Abraan. Hänge bi ndandiñähmu ꞌne bi umbä njamädi Jeoba ngeꞌä xki zitsꞌi ko nuꞌu̱ yä pariente rä Abraan.

Näꞌä rä xuiꞌä, rä ꞌme̱go rä Abraan bi xipäbi rä Betuel ꞌne rä Laban, näꞌä rä ku rä Rebeka por hanja xki zo̱ni. Nuyu̱ yoho bi ꞌñembäbi ge hää xä za xä zitsꞌi rä Rebeka pa dä nthätui rä Isak. ¿Te bi dädi rä Rebeka nuꞌmu̱ bi tꞌambäbi? Bi ꞌñenä ge hää mi ne dä ma. Hänge rä hyaxꞌä bi hñuxä ha yä kameyo ꞌne bi gu̱ rä ꞌñuu pa bi mengi ha Kanään.

Mi zo̱ni ha Kanään ya xki yu̱i rä Hyadi. Rä Rebeka bi hyandi nꞌa rä ñꞌo̱ho̱ mi yꞌo ha rä bonthi. Mi geꞌä rä Isak. Nuni bi johya mi hyandi rä Rebeka. Rä Sara, rä nänä rä Isak, mi o̱tꞌe hñu nje̱ya de xki du, ꞌne rä Isak mi pe̱ꞌtsitho rä dumu̱i. Pe nubye̱ rä Isak bi zo̱ho̱ bi mädi ndunthi rä Rebeka ꞌne bi johya mänꞌaki.