NUYU̱ yoho yä metsi gi handi, di nꞌañꞌo, ¿hänge hää? ¿Gi pädi te yä thuhu? Nuni metsi ju̱ yä zuꞌue rä thuhu Esau, ha nuni metsi di su yä de̱ti rä thuhu Jakob.

Rä Esau ꞌne rä Jakob mñä tꞌu̱ rä Isak ꞌne rä Rebeka. Rä Isak mi numäñho rä Esau ngeꞌä xa mi pädi dä gu̱ yä zuꞌue ꞌne mi hä te dä tsꞌi ha rä nguu. Pe rä Rebeka mänꞌa mi mädi rä Jakob ngeꞌä mrä hogä metsi ꞌne himi honi yä tuhni.

Mi tetho rä Abraan näꞌä rä xita rä Esau ꞌne rä Jakob. Dä za gä mäñhu̱ ge rä Jakob xi mi ho dä yꞌo̱de rä Abraan nuꞌmu̱ mi ñä de Jeoba. Rä Abraan bi du nuꞌmu̱ mi pe̱ꞌtsi 175 yä je̱ya, ꞌne nuꞌu̱ yä jemelo mi pe̱ꞌtsi 15 yä je̱ya.

Nuꞌmu̱ rä Esau mi pe̱ꞌtsi 40 yä je̱ya, bi nthätui yoho yä ꞌme̱hñä mñä me Kanään. Rä Isak ꞌne rä Rebeka xa bi durämu̱i, ngeꞌä nuꞌu̱ yä ꞌme̱hñä himi xo̱kämbeni Jeoba.

ꞌNepu̱, nꞌa rä pa bi nja nꞌa rä thogi näꞌä bi japi rä Esau bi nkue̱ ndunthi ko rä Jakob. Bi zo̱ho̱ rä pa nuꞌmu̱ rä Isak ma dä umbi nꞌa rä jäpi näꞌä rä tꞌu̱ mädä. Rä Esau mi to̱ꞌmi go xä tꞌumbi näꞌä rä jäpi ngeꞌä mi mädä de rä Jakob, pe rä Esau ya xki mapäbi rä Jakob näꞌä rä jäpi. Änte dä mꞌu̱i nuꞌu̱ yä jemelo, Äjuä ya xki mää ge rä Jakob go geꞌä ma xä hñäni näꞌä rä jäpi. ꞌNe geꞌä bi thogi. Rä Isak bi jäpi rä Jakob.

Mi bädi rä Esau, xa bi nkue̱ ko rä Jakob. Xa mi tsu̱di rä kue̱ ꞌne bi ꞌñenä ge ma xä hyo rä Jakob. Mi bädi rä Rebeka, xa bi durämu̱i. Hänge bi ꞌñembäbi rä däme: “Mu̱ rä Jakob dä nthäti ꞌnehe ko nꞌa rä ꞌme̱hñä rä me Kanään, nuga hindä za gä ze̱ti”.

Hänge rä Isak bi nzofo rä Jakob ꞌne bi ꞌñembäbi: “Ogi nthätui nꞌa rä ꞌme̱hñä rä me Kanään. Mänꞌa xä ñho gi ma ha Aran, ha rä ngu ri xita Betuel. Nthäti ko nꞌa rä tꞌixu rä Laban, näꞌä rä tꞌu̱ Betuel”.

Xi mi yabu̱ habu̱ mi ꞌmu̱i nuyu̱ yä pariente. Pe rä Jakob bi yꞌo̱te rä dada ꞌne nguntꞌä bi gu̱ rä ꞌñuu ꞌne bi ma pa Aran.