¡HYANDI xi turämu̱i ꞌne hinte mä humu̱i pe̱ꞌtsi nuni rä metsi! Gehni rä Jose. Yä ku ja huadi bi mapäbi nuyu̱ yä jäꞌi ri ma pa Ejipto. Ja ma dä mꞌe̱goni rä Jose. ¿Por hanja bi ja nunä rä tsꞌo tꞌo̱tꞌe nuꞌu̱ yä ku? Ngeꞌä mi embidiabi rä Jose.

Rä Jakob, näꞌä rä dada nuꞌu̱ yä metsi, xi mi mädi rä Jose. Mi numäñho ꞌne bi hyokuäbi xa mähotho nꞌa rä hee xä maa. Mi hyandi nuꞌu̱ rꞌe̱tꞌa yä tꞌu̱ mädä hanja rä Jakob xa mi mädi rä Jose, bi mu̱di bi me̱ꞌtsuäbi rä embidia ꞌne bi u̱tsa rä Jose. Pe nuꞌu̱ ꞌnehe mi u̱tsa po mänꞌa rä raso.

Rä Jose bi me̱ꞌtsi yoho yä tꞌi. Ha nuꞌu̱ yoho yä tꞌi bi hyandi ge nuꞌu̱ yä ku mi ndäne rä Jose. Nuꞌmu̱ rä Jose bi xipi nuꞌu̱ yä ku näꞌä xki ꞌui, nuyu̱ mänꞌa xa bi u̱tsa rä Jose.

Nꞌa rä pa, nuꞌu̱ yä ku mädä rä Jose mi fadi nuꞌu̱ yä de̱ti rä dada. Nubye̱, rä Jakob bi me̱hni rä Jose pa dä ma dä handi te mi pe̱fi nuꞌu̱ yä ku. Mi hyandi nuꞌu̱ yä ku ge mi xä mani rä Jose, rꞌa de geꞌu̱ bi ꞌñenä: “¡Ma gä hohu̱!”, pe rä Ruben, näꞌä mädä, bi ꞌñenä: “¡Hinä, ogi o̱thu̱ njabu̱!”. Himbi hyo pe bi yꞌe̱ntꞌi rä Jose ha nꞌa rä poso himi po rä dehe. ꞌNepu̱ bi hñudi pa dä nuu te ma dä me̱fi ko rä Jose.

Nuꞌu̱ bi hyandi ge mi xä ꞌñehni rꞌa yä ismäelita. Rä Juda bi ꞌñembi nuꞌu̱ yä ho̱ku: “Ma gä papäbihu̱ yä ismäelita”. ꞌNe geꞌä bi me̱fi nuꞌu̱. ¡Bi uni rä Jose po 20 yä bojä de gä plata! ¡Himbi nja yä nhuekäte ꞌne xi nꞌa rä ntsꞌomꞌu̱i näꞌä bi me̱fi!

¿Te ma xä xipäbi yä dada? Nuꞌu̱ bi hyo nꞌa rä tꞌäxi ꞌne ko näꞌä rä ji xi bi thäni näꞌä rä hee rä Jose. ꞌNepu̱, nuꞌu̱ bi hñäꞌtsuäbi rä Jakob näꞌä rä hee rä Jose ꞌne bi ꞌñembäbi: “Hyandi te dä tinihee, hyandi mu̱ hingä gehnä rä hee rä Jose”.

Rä Jakob bi hyandi ge hää mi geꞌä rä hee rä Jose. Bi nzoni ꞌne bi ꞌñenä: “¡Hää, nꞌa rä tsꞌo zuꞌue bi hyo rä Jose!”. Nuꞌu̱ yä ku rä Jose geꞌä mi ne xä mbeni rä dada. Rä Jakob xa bi durämu̱i. Bi nzoni po ndunthi yä pa. Pe rä Jose hixki du. Ma gä handihu̱ te bi thogi ko rä Jose nuni habu̱ bi tsꞌitsꞌi.