¡HYANDI te thogi! Gehni rä Moises xä maki rä zaa ꞌne udi rä ndehe. Gatꞌho nuyu̱ yä jäꞌi ꞌmai ko rä Moises ha rä ñäni rä dehe gehyu̱ yä israelita. Pe rä Faraon ꞌne nuꞌu̱ yä soldado bi jätꞌi. Ma gä handihu̱ por hanja.

Ja ngu dä handihu̱, mꞌe̱fa de näꞌä rä plaga rꞌe̱tꞌa, rä Faraon bi ꞌñembi yä israelita ge dä bo̱ni de Ejipto. Bi bo̱ni 600,000 yä ñꞌo̱ho̱ mñä israelita, ndunthi yä ꞌme̱hñä ꞌne yä bätsi. ꞌNehe, bi bo̱ni ndunthi yä jäꞌi nuꞌu̱ hingä mñä israelita pe xki gamfri Jeoba. Gatꞌho nuyu̱ bi bo̱ni ko yä de̱ti, yä tꞌäxi ꞌne märꞌa yä zuꞌue.

Änte dä bo̱ni, yä israelita bi yꞌapi yä ejipsio yä dutu ꞌne märꞌa yä tꞌo̱tꞌe de gä oro ꞌne de gä plata. Yä ejipsio xi bi ntsu po näꞌä rä gäxä plaga xki zu̱di. Hänge bi umbäbi yä israelita gatꞌho näꞌä bi yꞌadi.

Mꞌe̱fa de rꞌa yä pa, yä israelita bi zo̱ni ha rä mar Rojo. Ja bi ntsayani. Pe nubye̱, rä Faraon ꞌne nuꞌu̱ yä soldado bi mu̱di bi yobri ngeꞌä xki hyopi dä bo̱ni yä israelita. ꞌNe bi ꞌñenä: “¡Dä hopäbihu̱ bi bo̱ni mä ꞌme̱gohu̱!”.

Nubye̱, rä Faraon mänꞌaki bi paati näꞌä mi mbeni. Nguntꞌä bi gu̱ rä tsanza ꞌne bi ꞌñembi dä ñhoki nuꞌu̱ yä soldado. ꞌNepu̱ bi mu̱di bi nte̱hui nuꞌu̱ yä israelita. Bi zixä 600 yä hogä tsanza de gä tuhni ꞌne gatꞌho nuꞌu̱ yä tsanza mi ja ha Ejipto.

Mi hyandi yä israelita ge mi xä mani rä Faraon ꞌne nuꞌu̱ yä soldado, xi bi ntsu ndunthi. Himi ja habu̱ dä ma. Rꞌandi de geꞌu̱ mi kohi rä mar Rojo, ha nuꞌu̱ yä ejipsio mi ꞌme̱fa. Pe rä Zi Dada Jeoba bi juti nuꞌu̱ yä israelita ko nꞌa rä gui. Hänge nuꞌu̱ yä ejipsio himi tsa dä hyandi habu̱ mi yꞌo yä israelita pa dä hyo.

Nubye̱, Jeoba bi ꞌñembi rä Moises ge xä maki rä zaa ꞌne xä ꞌñudi rä mar Rojo. Mi jabu̱ rä Moises, nubye̱ Jeoba bi japi bä ehe de ha rä mbo̱xhyadi nꞌa rä bu̱nthi xi ntsꞌe̱di. Rä mar Rojo bi hege, bi gohi ngu yä jädo, ꞌne himbi dämä njotꞌi nuꞌu̱ yä dehe.

Nubye̱, yä israelita bi mu̱di bi rꞌani ha näꞌä rä ꞌñuu bi nja nuꞌmu̱ bi hege rä mar Rojo. Bi zitsꞌi ndunthi yä ora pa njabu̱ bi za bi rꞌani nuꞌu̱ yä mꞌo de gä mꞌotho yä jäꞌi ko gatꞌho nuꞌu̱ yä zuꞌue. Mꞌe̱fa, yä ejipsio bi za bi hyandi mänꞌaki nuꞌu̱ yä israelita, ꞌne bi mu̱di bi rꞌani ꞌnehe ha rä mar Rojo pa dä zu̱di.

Pe mi mu̱di bi rꞌani, Äjuä bi japi bi kꞌotꞌi yä rueda nuꞌu̱ yä tsanza. Nuꞌu̱ yä ejipsio xi bi ntsu ꞌne bi mu̱di bi mafi ꞌne bi ꞌñenä: “Jeoba go geꞌä di ntuhni po yä israelita kontra nuju̱. ¡Maha de gekua!”. Pe ya himbi za te bi yꞌo̱tꞌe.

Nubye̱, Jeoba bi ꞌñembi rä Moises ge dä maki rä zaa ꞌne dä ꞌñudi rä mar Rojo ja ngu gi handi ha rä kꞌoi. Nubye̱ nuꞌu̱ yä dehe bi njotꞌi mänꞌaki ꞌne bi goꞌmi yä ejipsio ꞌne yä tsanza. Gatꞌho ya xki yu̱tꞌi ha rä ndehe. ¡Ninꞌä rä ejipsio himbi bongi!

¡Hängu rä johya bi me̱ꞌtsi rä hnini Äjuä ngeꞌä bi bongi! Pa bi umbäbi njamädi Jeoba, yä ñꞌo̱ho̱ bi tuti nꞌa rä thuhu näꞌä mi enä: “Jeoba xä dähä nꞌa rä däta tuhni. Bi yꞌe̱ntꞌä ha yä dehe yä fani ꞌne yä to̱ge”. Rä Miriam, rä nju rä Moises, bi gu̱ki rä pandereta pa bi me̱i. Nuꞌu̱ märꞌa yä ꞌme̱hñä bi gu̱ki ꞌnehe yä pandereta pa bi me̱i. ꞌNe ko ndunthi rä johya bi nei ꞌne bi ntuhu njaua ꞌnehe: “Jeoba xä dähä nꞌa rä däta tuhni. Bi yꞌe̱ntꞌä ha yä dehe yä fani ꞌne yä to̱ge”.