RÄ Lot ꞌne rä familia mi ꞌmu̱hui rä Abraan ha rä hai Kanään. Nꞌa rä pa rä Abraan bi ꞌñembäbi rä Lot: “Nuua hingi ja ndunthi yä hai pa gatꞌho mä zuꞌuehu̱. Po rä mäte ma gä ꞌuegehu̱. Mu̱ ma gi ma ri njaua nuga gä ma ri njani”.

Rä Lot xa bi hyandi xä ñho nuꞌu̱ yä hai. Bi hyandi ge näꞌä rä Dähni Jordan xi xmä ñho, mi ja yä dehe ꞌne mi ja ndunthi yä tꞌe̱i pa yä de̱ti. Hänge rä Lot bi zitsꞌi rä familia ꞌne yä zuꞌue pa gehni. Mꞌe̱fa bi hyoki yä nguu ha rä hnini Sodomä.

Nuꞌu̱ yä jäꞌi mi ꞌmu̱i ha Sodomä xa mñä tsꞌomꞌu̱i. Rä Lot bi mfada ngeꞌä nuni mrä hojäꞌi. Äjuä ꞌnehe bi mfada. Pa ri uadi, Äjuä bi me̱hni yoho yä e̱nxe̱ pa bä xipäbi rä Lot ge ma xä huati näꞌä rä hnini Sodomä ꞌne näꞌä rä hnini Gomorra, ngeꞌä nuꞌu̱ yä jäꞌi xa mñä ntsꞌomꞌu̱i.

Nuꞌu̱ yä e̱nxe̱ bi ꞌñembäbi rä Lot: “¡Nxo̱ni! ¡Tsitsꞌi ri ꞌme̱hñä ꞌne nuꞌu̱ yoho ri tꞌixu ꞌne po̱nihu̱ de gekua!”. Rä Lot ꞌne rä familia himi xo̱ni dä bo̱ni, hänge nuꞌu̱ yä e̱nxe̱ bi mipä yä yꞌe̱ ꞌne bi gu̱ki de näꞌä rä hnini. Nubye̱ nꞌa de nuꞌu̱ yä e̱nxe̱ bi ꞌñembäbi: “¡Nxo̱nihu̱ pa gi ñänihu̱ ri tehu̱! Oxki ma gi ñegihu̱. Nextꞌihu̱ pa ha yä tꞌo̱ho̱ pa hingi tuhu̱”.

Rä Lot ꞌne yä tꞌixu bi yꞌo̱de ꞌne bi bo̱ni de Sodomä. Himbi ntsaya nixi nꞌa zi tu̱i ꞌne himbi ñegi. Pe rä ꞌme̱hñä rä Lot himbi yꞌo̱de. Nuꞌmu̱ ya xki bo̱ni zi yabu̱ de Sodomä, bi mꞌai ꞌne bi ñegi. Nubye̱ rä ꞌme̱hñä rä Lot bi mpu̱ngä doꞌu. ¿Dä za gi hyandi ha nunä rä kꞌoi?

¿Te dä za gä pädihu̱ de nunä rä thogi? Ge Äjuä di ñäni nuꞌu̱ yä jäꞌi yä yꞌo̱de, pe nuꞌu̱ toꞌo hingi o̱te Äjuä, di ꞌme̱di yä te.