¡HYANDI te agi nuni rä ñꞌo̱ho̱ ha rä nguu de gä dutu! Nꞌa rä hogä hee, nꞌa rä do de gä oro ꞌne rꞌa yä bojä de gä plata. Bä hä de Jeriko. Pe, ¿te xki tꞌembi dä me̱fi ko nuꞌu̱ yä tꞌo̱tꞌe mi ja ha Jeriko? ¿Gi beni?

Xki tꞌembi ge dä tsätꞌi, ꞌne xki tꞌembi ge näꞌä rä oro ꞌne rä plata xä thätsꞌi ha rä tabernäkulo pa rä Zi Dada Jeoba. Pe nuyu̱ yä jäꞌi himbi yꞌo̱te Äjuä. Bi bepäbi Äjuä. Nuni rä ñꞌo̱ho̱ rä thuhu Akan, ꞌne nuyu̱ märꞌaa, gehni rä ꞌme̱hñä ꞌne yä tꞌu̱. Ma gä handihu̱ te bi thogi.

Mꞌe̱fa de xki be rä Akan nuya yä tꞌo̱tꞌe, rä Josue bi me̱hni rꞌa yä ñꞌo̱ho̱ pa dä ntuhni kontra rä hnini Ai. Pe yä israelita bi ꞌme̱di näꞌä rä tuhni. Rꞌaa bi du, ha märꞌaa bi nextꞌi. Rä Josue xi bi durämu̱i. Bi ndandiñähmu, bi ntsꞌoꞌmi, bi xatuäbi Jeoba ꞌne bi ꞌñembi: “¿Por hanja gä hopi bi thogi njaua?”.

Jeoba bi dädi: “¡ꞌMai! Yä israelita xä yꞌo̱tꞌe nꞌa rä tsꞌoki. Xä be rꞌa yä tꞌo̱tꞌe nuꞌu̱ dä mända xä tsꞌätꞌi, ꞌne rꞌa de nuꞌu̱ ma xä thätsꞌi ha mä tabernäkulo. Xä be nꞌa rä hogä hee ꞌne hinxä mää. Hingä jäpꞌäꞌihu̱ asta gi tsätꞌihu̱ näꞌä rä hee ꞌne gi huatihu̱ näꞌä toꞌo xä be nuya yä tꞌo̱tꞌe”. Jeoba bi xipi rä Josue ge ma xä ꞌñuti toꞌo näꞌä rä be.

Hänge rä Josue bi muntsꞌi gatꞌho yä israelita, ꞌne Jeoba bi ꞌñudi näꞌä rä be, mrä thuhu Akan. Nubye̱ rä Akan bi ꞌñenä: “Di pe̱ꞌtsi rä tsꞌoki. Dä handi nꞌa rä hee xa mähotho, nꞌa rä do de gä oro, ꞌne rꞌa yä bojä de gä plata. Xa dä ho ndunthi nuya yä tꞌo̱tꞌe hänge dä hätsꞌi. Dä za guä tinihu̱ bi tꞌagi mbo ha mä nguu”.

Mi thini nuꞌu̱ yä tꞌo̱tꞌe, bä thämpäbi rä Josue, nubye̱ rä Josue bi ꞌñembäbi rä Akan: “¿Por hanja xkuä hänkägihe yä xuñha? ¡Nubye̱ Jeoba ma dä kastigaꞌi!”. ꞌNepu̱ gatꞌho yä jäꞌi bi hyo ko yä nkꞌahni rä Akan ꞌne rä familia. ¿Hänge kongehnä udi ge hinxä ñho gä hätsꞌihu̱ nuꞌu̱ yä tꞌo̱tꞌe hingä mä me̱tihu̱?

Mꞌe̱fa, yä israelita bi ma bä ntuhni mänꞌaki ko rä hnini Ai. Nubye̱ hää, Jeoba bi matsꞌi rä hnini, ꞌne bi dähä näꞌä rä tuhni.