HYANDI nuyu̱ yä fruta di ndude nuyu̱ yä ñꞌo̱ho̱. Hyandi ge xi yä däta nuyu̱ yä obxi. Hänge yoho yä ñꞌo̱ho̱ di ndude ko nꞌa rä zaa. ꞌNe hyandi nuyu̱ yä igo ꞌne yä granäda. ¿Habu̱ bä hä nuyu̱ yä hogä fruta? Ha rä hai Kanään. Beni, ha Kanään ja mi ꞌmu̱ini rä Abraan, rä Isak ꞌne rä Jakob. Pe ko näꞌä rä däta thuhu bi nja, rä Jakob ꞌne rä familia bi ma pa Ejipto. Mꞌe̱fa de 216 yä je̱ya, rä Moises mi zi yä israelita pa dä mengi ha Kanään. Nubye̱, mi yꞌo ha Kades ha yä yꞌotꞌä hai.

Ha Kanään mi ꞌmu̱ yä tsꞌomꞌu̱i jäꞌi. Hänge rä Moises bi me̱hni 12 yä ñꞌo̱ho̱ pa Kanään ꞌne bi ꞌñembi: “Guä handihu̱ hängu yä jäꞌi bi ꞌmu̱ini, ꞌne hängu yä tsꞌe̱di pe̱ꞌtsi. Hyandihu̱ mu̱ näꞌä rä hai xä ñho pa dä ꞌmotꞌi. ꞌNe guä hähu̱ rꞌa de nuꞌu̱ yä fruta bi jani”.

Mi mengi nuꞌu̱ yä ñꞌo̱ho̱ ha Kades, bi ꞌñembäbi rä Moises: “Xa xä ñho näꞌä rä hnini”. Pa dä ꞌñudi ge xa mäjuäni, bi ꞌñuti rꞌa yä fruta xpi hä. Pe 10 de nuꞌu̱ yä ñꞌo̱ho̱ bi ꞌñenä: “Nuꞌu̱ yä jäꞌi bi ꞌmu̱hni xi yä däta ꞌne xi tse̱di. Mu̱ gä ne gä hämbäbihu̱ yä hnini, nuꞌu̱ ma dä hyogägihu̱”.

Mi yꞌo̱de njabu̱ yä israelita xi bi ntsu ꞌne bi ꞌñenä: “Mänꞌa xä ñho xtä tuhu̱ ha Ejipto o nuua ha yä yꞌotꞌä hai. Mu̱ gä ntuhnihu̱ kongeꞌu̱, ma gä tuhu̱, ha mä ꞌme̱hñähu̱ ꞌne mä bätsihu̱ ma dä tsꞌitsꞌi. ¡Ya hingä de̱nihu̱ rä Moises, ma gä honihu̱ mänꞌa toꞌo dä gu̱tꞌä rä ꞌñuu pa gä pengihu̱ ha Ejipto!”.

Pe yoho de nuꞌu̱ yä ñꞌo̱ho̱ bä pengi de Kanään, rä Josue ꞌne rä Kaleb, mi pädi ge Jeoba ma xä matsꞌi, ꞌne pa dä huꞌmpäbi yä mu̱i yä israelita bi ꞌñembi: “Ogi tsuhu̱. Jeoba ꞌmu̱i ko nuju̱, ꞌne nguntꞌä ma gä hänihu̱ näꞌä rä hai”. Pe yä israelita himbi yꞌo̱de. ꞌNe asta mi ne dä hyo rä Josue ꞌne rä Kaleb.

Hänge Jeoba xi bi nkue̱ ꞌne bi ꞌñembi rä Moises: “Gatꞌho nuꞌu̱ pe̱ꞌtsi 20 yä je̱ya pa ri bo̱tsꞌe, hingä ma dä yu̱tꞌi ha rä hai Kanään. Bi hyandi nuꞌu̱ yä milagro dä ja ha Ejipto ꞌne ha yä yꞌotꞌä hai, pe hingi pe̱skägitho rä jamfri. Hänge ma gi yꞌohu̱ de gä nani 40 yä je̱ya ha yä yꞌotꞌä hai asta dä du gatꞌho nuꞌu̱ ya dä mää. Se̱he̱ rä Josue ꞌne rä Kaleb ma dä yu̱tꞌi ha rä hai Kanään”.