¡HYANDI! Yä israelita di rꞌani rä däthe Jordan. Pe, ¿te bi thogi ko näꞌä rä dehe? Ha nuꞌu̱ yä zänä de rä je̱ya xa mi ja yä yꞌee. Hingä yaꞌä xa mi jatho yä nzo̱the, ¡pe nubye̱ gatꞌho nuꞌu̱ yä dehe bi xaa ꞌne rä hai bi yꞌotꞌi! Nubye̱, yä israelita bi mu̱di bi rꞌani ja ngu xki rꞌani ha rä mar Rojo. ¿Habu̱ bi ma gatꞌho nuꞌu̱ yä dehe? Ma gä handihu̱.

Mi zo̱ho̱ näꞌä rä pa habu̱ yä israelita ya ma xä rꞌani rä däthe Jordan, Jeoba bi ꞌñembi rä Josue ge xä xipi näꞌä rä hnini: “Nuꞌu̱ yä majhä pe̱ꞌtsi te dä ndu näꞌä rä kaha de gä kohi ꞌne dä mꞌe̱tꞌo de gekhu̱. Nuꞌmu̱ xti dintꞌi yä ua ha rä däthe Jordan, nuꞌu̱ yä dehe ma dä ntsaya”.

Nubye̱, nuꞌu̱ yä majhä bi gu̱tsꞌi näꞌä rä kaha de gä kohi ꞌne bi mꞌe̱tꞌo de nuꞌu̱ märꞌa yä jäꞌi. Mi zo̱ni ha rä däthe Jordan, nuꞌu̱ yä majhä bi yu̱tꞌi ha yä dehe. Xä mi thogi ntsꞌe̱di ꞌne xa mi xä ñhee näꞌä rä däthe. ¡Pe ngu bi dintꞌi yä ua nuꞌu̱ yä majhä ha rä däthe, nuꞌu̱ yä dehe bi ntsaya! ¡Nunä nꞌa rä milagro! ¡Näꞌä rä däthe bi yꞌotꞌi! Jeoba bä kotꞌi yä dehe yabu̱ de habu̱ bi thogi yä israelita.

Nuꞌu̱ yä majhä mi ndude näꞌä rä kaha de gä kohi bi mꞌai mäde de näꞌä rä däthe ya xki yꞌotꞌi. ¿Dä za gi hyandi ha rä kꞌoi? Nuꞌu̱ yä majhä ja bi mꞌahni, mientra yä israelita bi mu̱di bi rꞌani.

Mi uadi bi rꞌani gatꞌho yä israelita, Jeoba bi ꞌñembi rä Josue ge dä xipi 12 yä ñꞌo̱ho̱ nuꞌu̱ xa mi tse̱di: “Ri maha ha rä däthe habu̱ bi ꞌmai nuꞌu̱ yä majhä di ndu rä kaha de gä kohi. ꞌNe guä johu̱ de gehni 12 yä do ꞌne pohu̱ ha ma gi oxihu̱ nunä xui. Njabu̱, mꞌe̱fa nuꞌmu̱ ri bätsihu̱ dä ñꞌani te ri bo̱ni nuya yä do, pe̱ꞌtsi te gi xipäbihu̱ ge yä dehe bi ntsaya nuꞌmu̱ näꞌä rä kaha de gä kohi Äjuä, bi rꞌani ha rä Jordan. ¡Nuꞌu̱ yä do ma dä japi dä beni nunä rä milagro!”. Rä Josue ꞌnehe bi go 12 yä do ꞌne bi mogi ha rä däthe habu̱ bi mꞌai nuꞌu̱ yä majhä.

Nubye̱, rä Josue bi ꞌñembi nuꞌu̱ yä majhä mi ndude rä kaha de gä kohi: “Guä po̱nihu̱ de rä Jordan”. Mi bo̱ni nuꞌu̱ yä majhä, bi mu̱di bi nja yä nzo̱the mänꞌaki ha rä däthe.