YO NZÄNÄ mꞌe̱fa de xki bo̱ni yä israelita de Ejipto, bi zo̱ni ha mi ja rä tꞌo̱ho̱ Sinäi, tꞌembi ꞌnehe Oreb. Ja gekua Äjuä bi nzofo rä Moises dende näꞌä rä ꞌmai ꞌmini mi zo̱o̱. Ja bi ntsayaua ꞌne ja bi mꞌu̱kua rꞌa yä zänä nuꞌu̱ yä israelita.

Mientra yä israelita mi to̱ꞌmi. Rä Moises bi bo̱tsꞌe ha rä tꞌo̱ho̱ Sinäi. Ja gehni Jeoba bi ꞌñembi rä Moises ge Näꞌä mi ne ge yä israelita xä yꞌo̱de pa njabu̱ Jeoba xä zo̱ho̱ xä ꞌñembi Rä hnini näꞌä di mädi. Mi gäi rä Moises de ha rä tꞌo̱ho̱, bi xipi yä israelita gatꞌho näꞌä xki mängä Jeoba. Nuꞌu̱ yä israelita bi ꞌñenä ge hää ma xä yꞌo̱de, ngeꞌä nuꞌu̱ hää mi ne ge Jeoba xä zo̱ho̱ xä hyandi ngu rä hnini.

Nubye̱ Jeoba bi ja nꞌa rä däta tꞌo̱tꞌe. Jeoba bi japi bi bo̱ni yä ꞌmifi ha rä ndehe rä tꞌo̱ho̱ Sinäi, ꞌne bi japi bi nja yä hue̱i. ꞌNehe bi nzofo nuꞌu̱ yä israelita ꞌne bi ꞌñembi: “Nuga go geki Jeoba näꞌä ri Zi Dadahu̱ bä ju̱kꞌäꞌihu̱ de Ejipto”. ꞌNepu̱ bi umbäbi nunä rä mhända: “Oxki xo̱kämbeni märꞌa yä zidada nuꞌu̱ hingä geki”.

Äjuä bi umbäbi yä israelita mä gu̱to yä mhända o yä ley. Yä israelita xa bi ntsu. ꞌNe bi ꞌñembäbi rä Moises: “Nuꞌi go dä ñä kongekhe, ngeꞌä mu̱ go dä ñä Äjuä, di tsu gä tuhe”.

Mꞌe̱fa, Jeoba bi ꞌñembi rä Moises: “Po̱tsꞌe nuua ha rä tꞌo̱ho̱. Nuga ma gä rꞌaꞌi yoho yä nxindo habu̱ xtä ofo nuꞌu̱ yä mhända di ne dä me̱fi yä israelita”. Hänge rä Moises bi bo̱tsꞌe mänꞌaki ha rä tꞌo̱ho̱. ꞌNe ja bi gohini 40 yä pa ꞌne 40 yä xui.

Äjuä pe̱ꞌtsi ndunthi, pe xi ndunthi yä mhända pa rä hnini. Rä Moises bi yꞌofo nuꞌu̱ yä mhända. Äjuä ꞌnehe bi umbi rä Moises nuꞌu̱ yoho yä nxindo habu̱ Äjuä go xki yꞌofo nuꞌu̱ 10 yä mhända pa gatꞌho rä hnini. Nuyu̱ Rꞌe̱tꞌa yä Mhända tꞌembi yä Dies Mändamiento.

Nuꞌu̱ Rꞌe̱tꞌa yä Mhända ja ndunthi yä muui. Pe ꞌnehe ja rä muui nuꞌu̱ märꞌa yä mhända bi umbi Äjuä yä israelita. Nꞌa de nuyu̱ yä mhända enä: “Pe̱ꞌtsi te gi mädi ri Zi Dada Jeoba ko ngatꞌho ri koraso, ko ngatꞌho ri te, ko ngatꞌho ri mfeni ꞌne ko ngatꞌho ri tsꞌe̱di”. ꞌNe mä nꞌa rä mhända enä: “Pe̱ꞌtsi te gi mädi ri mikꞌei ja ngu gi mädise̱”. Ñhesukristo, rä Tꞌu̱ Äjuä, bi mää ge de gatꞌho, nuya gehya yoho yä däta mhända bi umbi Äjuä rä hnini Israel. Mꞌe̱fa ma gä pädihu̱ ndunthi yä tꞌo̱tꞌe ꞌne nuꞌu̱ yä ntꞌudi bi uni rä Tꞌu̱ Äjuä.