HA RÄ Mäkä Tꞌofo ma gi tini nꞌa rä mfistꞌofo rä thuhu Rut. Pede nꞌa rä thogi bi me̱ꞌtsi nꞌa rä familia nuꞌmu̱ rä hnini Israel bi me̱ꞌtsi yä nzaya. Rä Rut mi nꞌa rä nxutsi mrä mengu Moab; hingä mrä mengu Israel, näꞌä rä hnini Äjuä. Pe mi bädi rä Rut de näꞌä rä Zi Dada xa mäjuäni rä thuhu Jeoba, rä Rut xi bi mädi. Rä Noemi mi nꞌa rä zi däta jäꞌi xki matsꞌi rä Rut dä bädi de Jeoba.

Rä Noemi mrä me Israel. Nuni ꞌne rä däme ko nuꞌu̱ yoho yä tꞌu̱, xki ma dä ꞌmu̱i ha Moab nuꞌmu̱ bi nja nꞌa rä thuhu ha Israel. Nꞌa rä pa, rä däme rä Noemi bi du. Mꞌe̱fa, yä tꞌu̱ bi nthäti ko yoho yä moabita mi yä thuhu Rut ꞌne Orpa. Pe mꞌe̱fa de 10 yä je̱ya, bi du nuꞌu̱ yoho yä tꞌu̱ rä Noemi. ¡Xi nꞌa rä däta dumu̱i pa nuya yä ꞌme̱hñä! Xibye̱, ¿te ma dä me̱fi rä Noemi?

Nꞌa rä pa, rä Noemi bi beni dä mengi ha rä hai ko nuꞌu̱ yä jäꞌi mi ꞌmu̱i yabu̱. Hänge bi gu̱ rä ꞌñuu bi ma. Rä Rut ꞌne rä Orpa himi ne dä ꞌuege de geꞌä hänge bi de̱ni. Mꞌe̱fa de xki ñꞌo ndunthi ha rä ꞌñuu, rä Noemi bi ꞌñembäbi rä Rut ꞌne Orpa: “Pengihu̱ ha ri haihu̱ ꞌne kohihu̱ ko ri nänähu̱”.

Rä Noemi bi netsꞌi ko nꞌa rä ntsu̱ꞌtsi nuꞌu̱ yä nxutsi. Nuyu̱ yä nxutsi bi mu̱di bi nzoni ngeꞌä mi mädi ndunthi rä Noemi, ꞌne bi ꞌñenä: “¡Hinä! Nuje ma gä mahe kongeꞌi ha bi ꞌmu̱ ri jäꞌi”. Pe rä Noemi bi ꞌñenä: “Mä zi tꞌixuꞌihu̱, nuꞌähu̱ pe̱ꞌtsi te gi pengihu̱. Mänꞌa ma gi ꞌmu̱ihu̱ xä ñho ko ri jäꞌihu̱”. Hänge rä Orpa bi gu̱ rä ꞌñuu bi mengi ha rä hai. Pe rä Rut himbi mengi.

Rä Noemi bi ꞌñembäbi rä Rut: “Rä Orpa ya bi mengi. Pengi ꞌnehe kongeꞌä”. Pe rä Rut bi ꞌñenä: “¡Ogi jakägi gä pengi! Hopkägi gä me̱e̱. Habu̱ gi ma, ja gä magani, ꞌne habu̱ gi ꞌmu̱i, ja gä ꞌmu̱kani. Ri hnini, geꞌä mä hnini, ꞌne ri Zi Dada, geꞌä mä Zi Dada. Habu̱ gi tu, ja gä tuni ꞌnehe, ꞌne ja gä ntꞌagini”. Mi ꞌñenä njabu̱ rä Rut, rä Noemi ya himbi koꞌtsi.

ꞌNepu̱ nuyu̱ yoho yä ꞌme̱hñä bi zo̱ni ha Israel, ꞌne ja bi mꞌu̱ini. Rä Rut nguntꞌä bi mu̱di bi mpe̱fi ha yä huähi, ngeꞌä ha nuꞌu̱ yä pa mi ja yä sofo de gä sebada. Nꞌa rä ñꞌo̱ho̱ mrä thuhu Boas bi hyopi rä Rut dä hyoni rä sebada ha yä huähi. ¿Gi pädi toꞌo mrä nänä rä Boas? Rä Raab, näꞌä mrä mengu ha Jeriko.

Nꞌa rä pa, rä Boas bi ꞌñembäbi rä Rut: “Xtä o̱de ndunthi de geꞌi, ge xa xkä ñhojäꞌi ko rä Noemi. Di pädi ge guä tsogi ri dada, ri nänä ꞌne ri hnini. ꞌNe xkuä ehe gi ꞌmu̱i ha nꞌa rä hnini hingä ngi pädi. ¡Rä Zi Dada Jeoba dä ñhojäꞌi kongeꞌi!”.

Rä Rut bi dädi: “Xa grä hojäꞌi kongeki. Ngeꞌä xkä hubgä mä mu̱i po näꞌä xkä xikägi”. Rä Boas xa mi numäñho rä Rut, ꞌne mꞌe̱fa bi nthäti kongeꞌä. ¡Hängu bi johya rä Noemi! Pe rä Noemi mänꞌa bi johya nuꞌmu̱ rä Rut ꞌne rä Boas bi me̱ꞌtsi rä mu̱di tꞌu̱, bi tꞌembi rä Obed. Mꞌe̱fa rä Obed bi me̱ꞌtsi nꞌa rä ꞌme̱to bi tꞌembi rä Dabid; mꞌe̱fa ma gä pädihu̱ mä nꞌa tu̱i de rä Dabid.