¿GI PÄDI te mrä thuhu näꞌä rä ñꞌo̱ho̱ xa mi tse̱di de gatꞌho nuꞌu̱ yä ñꞌo̱ho̱ xä mꞌu̱i? Nꞌa rä nzaya mrä thuhu Sanson. Jeoba go geꞌä xki umbi rä tsꞌe̱di rä Sanson. Änte dä mꞌu̱i rä Sanson, Jeoba xki xipäbi näꞌä rä nänä: “Nguntꞌä ma gi pe̱ꞌtsi nꞌa ri tꞌu̱. Go geꞌä ma dä gu̱tꞌi rä ꞌñuu pa dä ñäni yä israelita de yä filisteo”.

Yä filisteo mñä tsꞌomꞌu̱i jäꞌi mi ꞌmu̱i ha Kanään. Mi pe̱ꞌtsi ndunthi yä soldado, ꞌne mi o̱ꞌtuäbi ndunthi rä tsꞌomꞌu̱i yä israelita. Nꞌa rä pa, rä Sanson bi ma habu̱ mi ꞌmu̱i yä filisteo, ꞌne ha rä ꞌñuu bi bo̱ni nꞌa rä däta zate mi ne dä za. Pe rä Sanson se̱he̱ ko yä yꞌe̱ bi hyo näꞌä rä zate. ꞌNehe bi hyo yä nthebetho nuꞌu̱ yä nduxte filisteo.

Mꞌe̱fa, rä Sanson xi bi mädi nꞌa rä ꞌme̱hñä mrä thuhu Dalila. Pe nuꞌu̱ yä ñꞌo̱ho̱ mi gu̱tꞌi rä ꞌñuu ha rä hnini Filistea bi ꞌñembi rä Dalila ge mu̱ dä mää habu̱ mi ehe rä tsꞌe̱di rä Sanson, kada nꞌa de geꞌu̱ ma xä umbäbi 1,100 yä bojä de gä plata. Rä Dalila hää mi ne näꞌä rä bojä, hingä xa mäjuäni mi mädi rä Sanson nixi mi mädi näꞌä rä hnini Äjuä. Hänge rä Dalila bi sigi bi yꞌambäbi rä Sanson habu̱ mi ehe näꞌä rä tsꞌe̱di mi pe̱ꞌtsi.

Rä Dalila bi uadi bi japäbi rä Sanson dä mää habu̱ mi ehe näꞌä rä tsꞌe̱di mi pe̱ꞌtsi. Rä Sanson bi ꞌñenä: “Nunka xä tꞌäxkägi. Dende xa dä ꞌmu̱i, Äjuä bi huankägi pa gä pe̱päbi ngu nꞌa rä näsareo. Pe mu̱ dä tꞌäxkägi, nuꞌmu̱ ma gä ꞌme̱di mä tsꞌe̱di”.

Mi yꞌo̱de njabu̱ rä Dalila, bi kai rä Sanson pa bi ñꞌähä ha rä ngo̱de. ꞌNe bi nzofo nꞌa rä ñꞌo̱ho̱ pa bi ꞌñäxi rä Sanson. Mi nuhu rä Sanson, ya xki ꞌme̱di rä tsꞌe̱di. Nubye̱, bi yu̱tꞌi yä filisteo ꞌne bi gu̱ rä Sanson. Bi hñäꞌmpäbi yä da, ꞌne bi zitsꞌi pa dä mꞌe̱go.

Nꞌa rä pa, yä filisteo bi me̱ꞌtsi nꞌa rä dängo pa bi xo̱kämbeni näꞌä rä zidada hingä mäjuäni, mi rä thuhu Dagon. ꞌNe bi gu̱ki rä Sanson de rä fadi pa xa bi deni. Rä Sanson ya xki te mänꞌaki rä xtää. Rä Sanson bi ꞌñembäbi näꞌä rä metsi mi gu̱hni: “Hyopkägi gä thani nuꞌu̱ yä nꞌo̱tse rä to̱nꞌgu”. Nubye̱, rä Sanson bi xatuäbi rä Zi Dada Jeoba pa bi yꞌapäbi dä umbä rä tsꞌe̱di, bi mihi nuꞌu̱ yä nꞌo̱tse, ꞌne bi mafi: “Hyopkägi gä tu ko yä filisteo”. Xki ntini 3,000 yä filisteo ha näꞌä rä dängo, ꞌne mi yꞌentꞌi rä Sanson nuꞌu̱ yä nꞌo̱tse, näꞌä rä to̱nꞌgu bi dagi ꞌne bi hyo gatꞌho nuyu̱ yä bo̱ka jäꞌi.