¿TE BI japi bi dagi nuyu̱ yä jädo de rä hnini Jeriko? ꞌÑenä bi dagi nꞌa rä däta bomba ha nuyu̱ yä jädo. Pe geꞌmu̱ himi ja yä bomba; ha nixi mi ja yä däta nzafi. ¡Gehnä mänꞌa rä milagro bi ja Jeoba! Ma gä handihu̱ hanja bi thogi.

Yꞌo̱de näꞌä bi xipäbi Jeoba rä Josue: “Nuꞌi ꞌne nuꞌu̱ ri soldado thetꞌihu̱ ha rä hnini. Kada nꞌa rä pa thetꞌihu̱ nꞌa rä mꞌiki, jahu̱ njabu̱ po rꞌato yä pa. Hñätsꞌihu̱ rä kaha de gä kohi. ꞌNe pe̱ꞌtsi te dä mꞌe̱tꞌo de näꞌä rä kaha de gä kohi yoto yä majhä ꞌne dä pixti yä ndäni”.

“Ha näꞌä rä yoto rä pa, thetꞌihu̱ ha rä hnini yoto yä mꞌiki. Pa ri uadi, ma gi pixtihu̱ xi ntsꞌe̱di yä ndäni, ꞌne gatꞌho gi unihu̱ nꞌa rä däta mhafi de gä tuhni. ¡ꞌNe nuꞌu̱ yä jädo ma dä dagi!”

Josue ꞌne nuꞌu̱ yä soldado bi me̱fi näꞌä xki mängä Jeoba. Mientra mi thetꞌi ha rä hnini, hinto mi ñä. Se̱he̱ mi ntꞌo̱de nuꞌu̱ yä ua mi njohni ꞌne nuꞌu̱ yä ndäni mi pixti. Zäi ge xi bi ntsu nuꞌu̱ yä me Jeriko. ¿Gi handi nuni rä the̱ngä nthähi zu̱di ha rä bentanä? ¿Toꞌo rä me̱ti nuni rä bentanä? Hää, rä Raab bi me̱fi näꞌä xki xipäbi nuꞌu̱ yoho yä ñꞌo̱ho̱. Rä Raab ꞌne gatꞌho rä familia, mi o mbo ha rä nguu ꞌne mi handi näꞌä mi thogi.

Pa ri uadi, ha näꞌä rä yoto rä pa, mꞌe̱fa de bi thetꞌi yoto yä mꞌiki ha rä hnini, nuꞌu̱ yä majhä bi mixti yä ndäni, ꞌne nuꞌu̱ yä soldado bi mafi. Nubye̱, nuꞌu̱ yä jädo bi dagi. ꞌNepu̱ rä Josue bi ꞌñenä: “Hyohu̱ yä jäꞌi ꞌne tsätꞌihu̱ gatꞌho rä hnini, pe ogi tsätꞌihu̱ rä plata, rä oro, rä kobre nixi rä asero, ngeꞌä nuyu̱ ma gi hñätsꞌihu̱ ha rä tabernäkulo pa rä Zi Dada Jeoba”.

Rä Josue bi ꞌñembäbi nuꞌu̱ yoho yä ñꞌo̱ho̱: “Ju̱kihu̱ rä Raab ꞌne gatꞌho rä familia de ha rä nguu”. Nuyu̱ himbi du, ja ngu xki jura nuꞌu̱ yoho yä ñꞌo̱ho̱.