MI ME̱ꞌTSI yä xuñha yä israelita, bi yꞌapäbi rä mfatsꞌi Jeoba. Jeoba bi yꞌo̱de ꞌne bi me̱hni rꞌa yä jäꞌi nuꞌu̱ himi tsu pa bi matsꞌi yä israelita. Rä Mäkä Tꞌofo embi yä nzaya nuyu̱ yä jäꞌi. Rä Josue geꞌä bi mu̱di bi nzaya, ꞌne mꞌe̱fa de geꞌä, bi mꞌu̱ nuyu̱ yä nzaya: Otniel, Eud ꞌne rä Samgar. Pe ꞌnehe bi mꞌu̱ yoho yä ꞌme̱hñä nuꞌu̱ bi matsꞌi rä hnini Israel. Nuyu̱ mi yä thuhu Debora ꞌne Jael.

Rä Debora mi rä mꞌe̱hni Jeoba. Jeoba mi xipäbi te ma dä thogi mꞌe̱fa, njabu̱ rä Debora mi xipi yä jäꞌi näꞌä mi mää Jeoba. Rä Debora ꞌnehe bi nzaya. Mi ꞌmu̱i ha nꞌa rä tꞌo̱ho̱. Mi hudi ha rä xudi nꞌa rä ꞌmahi, ꞌne mi fatsꞌi yä jäꞌi nuꞌmu̱ mi ehe pa mi xipäbi yä xuñha.

Pa nuya yä pa, rä Jabin geꞌä mi rä ndä de Kanään. Mi pe̱ꞌtsi 900 yä tsanza de gä tuhni. Rä Jabin ꞌne yä soldado xi mi ja yä tsꞌe̱di. Xki yꞌo̱tꞌe yä ꞌme̱go ndunthi yä israelita. Rä Sisara geꞌä mi rä ndä de nuꞌu̱ yä soldado rä Jabin.

Nꞌa rä pa, rä Debora bi me̱mpäbi raso dä ehe rä Barak ꞌne bi ꞌñembi: “Jeoba xä mää: «Huahni 10,000 yä ñꞌo̱ho̱ ꞌne tsitsꞌi ha rä tꞌo̱ho̱ Tabor. Ma gä japi ja dä mani rä Sisara. ꞌNe ma gä faxꞌäꞌi gi täpi rä Sisara ꞌne nuꞌu̱ yä soldado»”.

Rä Barak bi ꞌñembi rä Debora: “Mu̱ nuꞌi gi ma, gä maga ꞌnehe”. Hänge rä Debora bi ma, pe bi ꞌñembäbi rä Barak: “Nuꞌi hingä ma dä za gi mää ge go gä tähä näꞌä rä tuhni, ngeꞌä Jeoba ma dä ja ge nꞌa rä ꞌme̱hñä go geꞌä dä hyo rä Sisara”. ꞌNe xa geꞌä bi thogi.

Rä Barak bi gäi de rä tꞌo̱ho̱ Tabor pa bi zu̱di nuꞌu̱ yä soldado rä Sisara. Nse̱kitho, Jeoba bi japi bi dagi nꞌa rä däyꞌe ꞌne bi nja nꞌa rä nzo̱the, ꞌne bi jätꞌi ndunthi de nuꞌu̱ yä nkontra. Nubye̱, rä Sisara bi gäi de rä tsanza ꞌne bi nextꞌi bi ma.

Mꞌe̱fa, rä Sisara bi zo̱ni ha rä nguu de gä dutu rä Jael. Rä Jael bi thoki pa dä ntsaya, ꞌne bi umbi nꞌa tu̱i ꞌma pa bi zi. Kongehnä, nguntꞌä bi doꞌmi rä tꞌähä. Nubye̱, rä Jael bi gu̱ nꞌa rä zaa xä ntsꞌää ꞌne bi mu̱ꞌmpi ha rä ñäxu. Mi zo̱ho̱ rä Barak, rä Jael bi ꞌñuti ge näꞌä rä Sisara ya xki du. Xa bi thogi ja ngu xki mää rä Debora.

Pa ri uadi, bi tho ꞌnehe rä Jabin, näꞌä mi rä ndä. Nubye̱, po ndunthi yä je̱ya, yä israelita bi mꞌu̱i xä ñho ꞌne himbi me̱ꞌtsi yä tuhni.