MꞌE̱FA de bi mu̱di bi mända Dabid ha Jerusalen, Jeoba bi matsꞌi Dabid pa bi dähä ndunthi yä tuhni. Jeoba xki xipi yä israelita ge ma xä umbäbi näꞌä hai Kanään. Nubye̱, ko rä mfatsꞌi Jeoba, yä israelita hää bi hñäni gatꞌho näꞌä haiꞌä.

Dabid xi mi nꞌa rä hogä ndä. Xa mi mädi rä Zi Dada Jeoba. Hänge mi hñäni näꞌä rä hnini Jerusalen, nguntꞌä bi hñätsꞌi näꞌä kaha de gä kohi pa gehni. Mi ne xä hyoki nꞌa templo pa ja xä me̱ꞌtsini näꞌä kaha de gä kohi.

Mi thogi rꞌa yä je̱ya, Dabid bi me̱fi nꞌa däta tsꞌoki. Mi pädi, ge hingä xä ñho xä datꞌi näꞌä hingä go rä me̱ti. Pe nꞌa ndee, nuꞌmu̱ mi to̱ge ha rä palasio, bi hñeꞌmi pa hai ꞌne bi hyandi nꞌa ꞌme̱hñä xa mähotho mi rä thuhu Batꞌseba, rä däme mi rä thuhu Urias, nꞌa rä soldado Dabid.

Dabid xa bi ho ndunthi Batꞌseba, hänge bi mända bä tsꞌimpäbi pa ha rä palasio. Urias, rä däme Batꞌseba, xki ma yabu̱ ha nꞌa tuhni. Nubye̱, Dabid bi ñꞌähui Batꞌseba. Mꞌe̱fa bi bädi ge Batꞌseba ma xä me̱ꞌtsi nꞌa rä bätsi. Hänge xa bi durämu̱i ꞌne bi mändabi Joab, näꞌä ndä de yä soldado pa bi hñutsꞌi Urias habu̱ xa mi ntsꞌe̱di rä tuhni pa njabu̱ bi tho. Mi du Urias, Dabid bi nthäti ko Batꞌseba.

Jeoba xa bi nkue̱, ꞌne bi me̱hni Nätan pa bi xipi Dabid nuꞌu̱ yä tsꞌoki xki me̱fi. Hyandi hanja Nätan ñäui Dabid. Dabid xa bi durämu̱i po nuꞌu̱ yä tsꞌoki xki me̱fi, hänge Jeoba bi pumbäbi nuꞌu̱ yä tsꞌoki ꞌne himbi hyo. Pe bi ꞌñembi: “Ngeꞌä gä o̱tꞌe nuya yä tsꞌoki, nubye̱ ma dä nja yä däta xuñha ha ri nguu”. ¡Dabid bi me̱ꞌtsi yä däta dumu̱i!

Mꞌe̱tꞌo, bi du näꞌä bätsi bi me̱ꞌtsi Batꞌseba. ꞌNepu̱ Amnon, näꞌä rä tꞌu̱ mädä Dabid, bi japi bi ñꞌähui näꞌä rä nju mi rä thuhu Tamär. Hänge Absalon, näꞌä mänꞌa rä tꞌu̱ Dabid, xa bi nkue̱ ꞌne bi hyo Amnon. Mꞌe̱fa, Absalon bi dähä rä mhäte yä jäꞌi, ꞌne bi thutsꞌi de gä ndä. Pe Dabid bi dähä näꞌä tuhni, ꞌne Absalon bi du. Dabid bi thogi xa ndunthi yä däta xuñha.

Ko gatꞌho nuya yä xuñha mi ja, Batꞌseba bi me̱ꞌtsi nꞌa rä bätsi näꞌä bi tꞌembi Salomon. Nuꞌmu̱ bi nxita ꞌne bi hñeni Dabid, näꞌä rä tꞌu̱ mi rä thuhu Adonias go mi ne xä hñudi de gä ndä. Hänge Dabid bi xipi nꞌa majhä mi rä thuhu Sadok, ge xä xiꞌspäbi rä aseite ha rä ñä Salomon pa njabu̱ xä fädi ge go geꞌä ma xä zo̱ho̱ xä ndä. Mꞌe̱fa, Dabid bi du nuꞌmu̱ mi pe̱ꞌtsi 70 yä je̱ya. Dabid bi mända po 40 yä je̱ya. Nubye̱, Salomon geꞌä bi zo̱ho̱ bi ndä.