YA XKI thogi ngu 10 yä je̱ya dende nuꞌmu̱ Näbukodonosor bi zitsꞌi pa Babilonia nuꞌu̱ yä israelita xa mi ja yä fädi. ¡Nubye̱ hyandi! Jerusalen yꞌo ri zätꞌi, ꞌne nuyu̱ yä israelita himbi du bi tsꞌitsꞌi pa dä mꞌe̱go ha Babilonia.

Beni, nuꞌu̱ yä mꞌe̱hni Äjuä geꞌä xki mää ge ma xa thogi nuꞌu̱ yä israelita mu̱ hinxä hye̱gi nuꞌu̱ yä tsꞌo tꞌo̱tꞌe. Pe yä israelita himbi ne bi yꞌo̱te nuꞌu̱ yä mꞌe̱hni Äjuä. Nuyu̱ himbi ne bi xo̱kämbeni Jeoba ꞌne bi sigi bi ndäne nuꞌu̱ yä zidada hingä mäjuäni. Hänge mi japä mꞌe̱di dä hñäni nꞌa kastigo. ¿Hanja di pädihu̱? Esekiel, nꞌa rä mꞌe̱hni Äjuä xikägihu̱ te mä tsꞌo tꞌo̱tꞌe mi pe̱fi yä israelita.

¿Gi pädi toꞌo Esekiel? Geꞌä nꞌa de nuꞌu̱ yä metsi xki zitsꞌi Näbukodonosor pa Babilonia. Geꞌmu̱ bi tsꞌitsꞌi ꞌnehe Daniel, Sadrak, Mesak ꞌne Abednego. Ngu rꞌe̱tꞌa nje̱ya änte de xä tsꞌätꞌi Jerusalen.

Nuꞌmu̱ Esekiel mi ꞌmu̱itho ha Babilonia, Jeoba bi ꞌñuti nuꞌu̱ yä tsꞌo tꞌo̱tꞌe mi thogi ha näꞌä rä templo mi ja ha Jerusalen. Jeoba bi ja nꞌa milagro, pa njabu̱ mäske Esekiel mi ꞌmu̱i ha Babilonia, bi za bi hyandi gatꞌho näꞌä mi thogi ha rä templo. ¡Xi mi xä ntsꞌo näꞌä bi hyandi!

Jeoba bi ꞌñembi Esekiel: “Hyandi nuyu̱ yä tsꞌo tꞌo̱tꞌe pe̱fi nuyu̱ yä jäꞌi nuua ha templo. Hyandi nuyu̱ yä kꞌeñä ꞌne nuyu̱ märꞌa yä zuꞌue xä hyoki ha gatꞌho yä jädo. ¡ꞌNe hyandi hanja nuyu̱ yä israelita di ndäne!”. Esekiel bi za bi hyandi gatꞌho näꞌä mi thogi ha Jerusalen ꞌne bi yꞌofo.

Jeoba bi yꞌambäbi Esekiel: “¿Gi handi näꞌä pe̱fi nuyu̱ yä jäꞌi gu̱tꞌi rä ꞌñuu ꞌne huyämu̱i ge hinto handi?”. Esekiel hää bi hyandi 70 yä ñꞌo̱ho̱ mi ndäne nuꞌu̱ yä zidada hingä mäjuäni ꞌne mi enä: “Jeoba hingi handi näꞌä di pe̱fihu̱. Näꞌä xä ma de nunä hnini”.

Nubye̱, Jeoba bi ꞌñuti Esekiel rꞌa yä ꞌme̱hñä mi hudi ha näꞌä goxthi mi ja ha rä norte de rä templo. Xki hñudi ꞌne mi ndäne Tamus, nꞌa de nuꞌu̱ yä zidada hingä mäjuäni. ꞌNepu̱, Esekiel bi hyandi 25 yä ñꞌo̱ho̱ ha rä goxthi de näꞌä rä templo Jeoba, mi handi pa mbo̱xhyadi ꞌne mi ndäne rä Hyadi.

Jeoba bi ꞌñenä: “Nuyu̱ yä jäꞌi hingi pe̱skägi rä tꞌekꞌei. Hingä se̱he̱ o̱tꞌe yä tsꞌoki, ꞌnehe bi ehe ha mä templo pa pe̱fi nuꞌu̱ yä tsꞌo tꞌo̱tꞌe”. Hänge Jeoba bi ꞌñenä: “Ma dä hyandi te ngu mä kue̱, ꞌne hingä ma gä hueki nuꞌmu̱ xkä handi dä uadi”.

Hñu nje̱ya mꞌe̱fa de nuꞌmu̱ Jeoba bi ꞌñuti Esekiel nuꞌu̱ yä tꞌo̱tꞌe, yä israelita bi nju̱tsꞌi kontra Näbukodonosor. Hänge nuni ndä, bi ma pa dä ntuhni kongeꞌu̱. Mꞌe̱fa de nꞌa nje̱ya mäde, yä me Babilonia bi za bi rꞌani nuꞌu̱ yä jädo mi kotꞌi Jerusalen ꞌne bi tsätꞌi gatꞌho rä hnini. Ndunthi yä jäꞌi bi du, ꞌne märꞌaa bi tsꞌitsꞌi pa dä mꞌe̱go ha Babilonia.

¿Por hanja Jeoba bi hye̱gi yä israelita bi thogi nuya yä däta xuñha? Ngeꞌä himbi yꞌo̱te nuꞌu̱ yä mhända Jeoba. ¿Te dä za gä pädihu̱? Ge mähyoni gä o̱tehu̱ nzäntho näꞌä xikägihu̱ Jeoba.

Ri mu̱di bi thopi rꞌa yä jäꞌi bi gohi ha Israel, ꞌne Näbukodonosor bi hñutsꞌi nꞌa judío mi rä thuhu Gedalias pa bi hyandi nuꞌu̱ yä jäꞌi. Pe rꞌa yä israelita bi hyo Gedalias. Nubye̱ yä jäꞌi xa bi ntsu, mi huyämu̱i ge yä me Babilonia ma xä mengi pa xä huati gatꞌho. Hänge bi japi Jeremias dä ma kongeꞌu̱, ꞌne bi ꞌmatꞌi bi ma pa Ejipto.

Hänge ha rä hnini Israel hinte mä jäꞌi bi gohi. Po 70 yä je̱ya hinto bi mꞌu̱i ꞌne xki huitꞌätho näꞌä rä hniniꞌä. Pe Jeoba xki mää ge xti uadi nuꞌu̱ 70 yä je̱ya, ma xä japi yä israelita xä mengi ha yä hai. Pe mientra, ¿te mi thogi nuꞌu̱ yä israelita bi tsꞌitsꞌi pa Babilonia? Ma gä handihu̱.