MꞌE̱FA de bi du Jeroboan, nuꞌu̱ yä ndä mi mända ha nuꞌu̱ 10 yä tꞌu̱kä hnini mi tꞌembi rä tsꞌu̱tꞌhui de rä norte ha Israel, xi mi yä tsꞌomꞌu̱i. Akab geꞌä mänꞌa xi mi rä bo̱ka. ¿Gi pädi por hanja? Go mi rä tsꞌoki näꞌä rä ꞌme̱hñä mi rä thuhu Jesabel.

Jesabel hingä mrä israelita. Mi rä tꞌixu näꞌä ndä de rä hnini Sidon. Jesabel mi ndäne Baal, nꞌa rä zidada hingä mäjuäni. Jesabel bi japi Akab ꞌne ndunthi yä israelita bi ndäne Baal. Jesabel xa mi u̱tsa Jeoba ꞌne bi mända bi thopäbi ndunthi yä mꞌe̱hni. Pe märꞌaa bi ma bä ꞌmu̱i ha yä kueba pa njabu̱ himbi tho. Jesabel asta bi ñhote pa bi me̱ꞌtsi näꞌä mi ne.

Nꞌa rä pa, Akab xa mi turämu̱i. Hänge Jesabel bi yꞌambäbi: “¿Por hanja gi turimu̱i?”.

Akab bi dädi: “Po näꞌä bä xikägi Näbot. Nuga ndi ne xtä tambäbi näꞌä rä hai habu̱ xä gätsꞌi yä obxi, pe Näbot himbi ne”.

Jesabel bi ꞌñembi: “Ogi turimu̱i, näꞌä hai hää ma gi pe̱ꞌtsi”.

Nubye̱, Jesabel bi me̱mpäbi yä karta nuꞌu̱ yä ñꞌo̱ho̱ mi gu̱tꞌi rä ꞌñuu ha näꞌä hnini habu̱ mi ꞌmu̱i Näbot. Bi mändabi: “Hyonihu̱ rꞌa yä ñꞌo̱ho̱ nuꞌu̱ hinte yä ꞌme̱fi ꞌne japäbihu̱ dä mää ge Näbot xä zani Äjuä ꞌne xä zani näꞌä rä ndä. Ju̱kihu̱ de ha rä hnini ꞌne hyohu̱ ko yä nkꞌahni”.

Mi bädi Jesabel ge Näbot xki du, nguntꞌä bi ꞌñembäbi Akab: “Gi ma ꞌne guä ju̱ näꞌä rä hai pa go ri me̱ti”. ¿Hänge mähyoni ge Jesabel xä hñäni nꞌa kastigo po näꞌä rä däta tsꞌoki bi me̱fi?

Mꞌe̱fa, Jeoba bi me̱hni Jeu pa xä kastiga Jesabel. Mi yꞌo̱de Jesabel, nguntꞌä bi gätꞌi yä da ꞌne bi ñhoki pa xä neki xä ñho. Pe mi zo̱ni Jeu ꞌne bi hyandi ge Jesabel mi hudi ha rä bentanä rä palasio, bi ꞌñembi nuꞌu̱ yä ñꞌo̱ho̱ mi ꞌmu̱hni: “¡Hye̱gihu̱ dä dagi!”. Ja ngu gi handi ha rä kꞌoi, nuyu̱ yä ñꞌo̱ho̱ bi yꞌo̱de ꞌne bi hye̱gi bi dagi Jesabel pa bi du. Njabu̱ bi du näꞌä tsꞌomꞌu̱i reinä.