HYANDI nuni ñꞌo̱ho̱ o mbo ha yä dehe. Thogi yä xuñha, ¿hänge hää? ¡Nuni nda däta peskado ya ma dä dutꞌi! ¿Gi pädi toꞌo nuni ñꞌo̱ho̱? Rä thuhu Jonäs. Ma gä handihu̱ hanja bi zo̱ho̱ bi me̱ꞌtsi ndunthi yä xuñha.

Jonäs mi rä mꞌe̱hni Äjuä. Hixki thogi ndunthi de nuꞌmu̱ xki du Eliseo, Jeoba bi ꞌñembi Jonäs: “Gi ma ha rä hnini Ninibe. Ngeꞌä nuꞌu̱ yä jäꞌi bi ꞌmu̱hni xi bi pe̱fi yä däta tsꞌoki, hänge di ne gi ma guä nzofo”.

Pe Jonäs hingä mi ne xä ma, hänge bi yu̱tꞌi ha nꞌa barko pa xä ma ha mänꞌa ꞌñuu näꞌä hingä mi geꞌä Ninibe. Jeoba himbi ho näꞌä bi me̱fi Jonäs hänge bi japi bi nja nꞌa däta bu̱nthi. Näꞌä bu̱nthi xa mi tse̱di hänge näꞌä barko bi mu̱di bi yu̱i. Nuꞌu̱ yä jäꞌi mi yꞌe̱tꞌi näꞌä barko, xa bi ntsu ꞌne bi maꞌti yä zidada pa dä matsꞌi.

Nubye̱ Jonäs bi ꞌñembäbi nuꞌu̱ yä ñꞌo̱ho̱: “Nuga di xo̱kämbeni Jeoba, näꞌä Zi Dada bi hyoki mähetsꞌi ꞌne rä Xiꞌmhai. Dä ꞌmatꞌi pa hingä pe̱fi näꞌä bi mändagi Jeoba”. Nuꞌu̱ yä jäꞌi bi yꞌambäbi: “¿Te gä pe̱fihe kongeꞌi pa dä ntsaya nunä bu̱nthi?”.

Jonäs bi ꞌñenä: “Yꞌe̱ngägihu̱ ha yä dehe pa njabu̱ rä bu̱nthi dä ntsaya”. Nuꞌu̱ yä jäꞌi hingä mi ne xä jabu̱, pe mi hyandi ge rä bu̱nthi mi yꞌo mi ntsꞌe̱di, bi gu̱ Jonäs ꞌne bi yꞌe̱i pa ha yä dehe. Nubye̱, nguntꞌä bi ntsaya yä dehe ꞌne rä bu̱nthi.

Mi yu̱i Jonäs ha yä dehe, bä ehe nꞌa nda däta peskado ꞌne bi dutꞌi, pe Jonäs himbi du. Hñuu yä pa ꞌne hñuu yä xui bi ñꞌo mbo ha rä mu̱i näꞌä däta peskado. Jonäs bi yobri ndunthi ngeꞌä himbi ma ha Ninibe ja ngu xki mändabi Jeoba. Nubye̱, ¿gi pädi te bi me̱fi?

Jonäs bi xatuäbi Jeoba ꞌne bi yꞌapäbi rä mfatsꞌi. Jeoba bi japäbi näꞌä däta peskado bi zogi Jonäs ha rä hai. Nubye̱ hää, Jonäs bi ma pa ha Ninibe. Ko näꞌä bi thogi Jonäs, ¿hänge utkägihu̱ ge xa mähyoni gä pe̱fihu̱ gatꞌho näꞌä di mändagihu̱ Jeoba?