HYANDI Samuel di xiꞌspäbi rä aseite ha rä ñäxu nuni ñꞌo̱ho̱. Geꞌä mi tꞌo̱tꞌpäbi nuꞌu̱ toꞌo xki huahni Äjuä pa dä thutsꞌi de gä ndä. Jeoba bi ꞌñembäbi Samuel ge xä xiꞌspäbi rä aseite ha rä ñäxu Saul. Näꞌä xa mrä hogä aseite ꞌne xa mi yu̱ni xä ñho.

Saul mi handi ge hingä ri ꞌñepäbi dä ndä hänge bi ꞌñembäbi Samuel: “Nuga xti ꞌñehe de Benjamin, näꞌä xa rä zi tꞌu̱kä hnini de Israel, ¿por hanja gi xikägi ge ma gä ndä?”. Pe Jeoba mi numäñho Saul, ngeꞌä Saul himi honi dä tꞌespäbi rä nsu. Hänge Jeoba bi huahni pa dä ndä.

Saul hingä mi rä hyoya ha nixi mi rä tꞌu̱kä jäꞌi. Saul mi ehe de nꞌa rä familia näꞌä xa mi pe̱ꞌtsi ndunthi yä bojä, xa mi mähotho ꞌne xa xmä ñhetsꞌi. Mi joꞌo mänꞌa nguꞌä, ¡gatꞌho yä jäꞌi mi tso̱xtä ha rä xiꞌnxi Saul! Saul ꞌnehe xa mi nextꞌi ꞌne xa mi ja rä tsꞌe̱di. Yä jäꞌi mi johya ngeꞌä rä Zi Dada Jeoba xki huahni Saul pa dä ndä ha Israel. Gatꞌho yä jäꞌi mi enä: “¡Dä mꞌu̱i pa nzäntho rä ndä!”.

Yä nkontra yä israelita mänꞌa xa mi ja yä tsꞌe̱di ꞌne xa mi o̱tpäbi ndunthi yä xuñha yä israelita. Mꞌe̱fa de bi thutsꞌi Saul de gä ndä, yä amonita bi bo̱tsꞌe pa xä ntunkui yä israelita. Pe Saul bi muntsꞌi xi ndunthi yä soldado ꞌne bi däpäbi yä amonita. Yä israelita xa mi johya ngeꞌä Saul go mi geꞌä rä ndä.

Ngu bi thogi yä je̱ya, Saul go geꞌä bi gu̱tꞌi rä ꞌñuu pa njabu̱ yä israelita bi dähä ndunthi yä tuhni. Saul mi pe̱ꞌtsi nꞌa rä tsꞌu̱ntꞌu̱ näꞌä himi tsu, mi rä thuhu Jonätan. Jonätan bi maxä yä israelita pa bi dähä ndunthi yä tuhni. Pe yä filisteo geꞌu̱ xa mi u̱tsa yä israelita. Nꞌa rä pa, yä mꞌotho yä filisteo nuꞌu̱ bi nju̱tsꞌi kontra yä israelita.

Samuel xki xipi Saul ge xä do̱ꞌmi asta xä zo̱ho̱ pa go geꞌä xä ja nꞌa ofrenda pa Jeoba. Pe Samuel himbi zo̱ni nguntꞌä. Saul mi tsu ge yä filisteo xä mu̱di xä ntuhni, hänge bi mꞌe̱tꞌo ꞌne go bi ja näꞌä ofrenda. Mi zo̱ni Samuel, bi ꞌñembi Saul ge hingä geꞌä xki me̱fi ngeꞌä hixki yꞌo̱te Jeoba ꞌne bi ꞌñembi: “Jeoba ma dä huahni mänꞌa ñꞌo̱ho̱ pa go dä ndä ha Israel”.

Mꞌe̱fa, Saul himbi yꞌo̱te mänꞌaki Jeoba. Samuel bi ꞌñembi Saul: “Mänꞌa xä ñho gi yꞌo̱te Jeoba ke gi umbi yä ofrenda de nuꞌu̱ yä hogä de̱ti. Ngeꞌä hingä yꞌo̱te Jeoba, nubye̱ ya hingä ma dä hye̱gi gi sigi gi ndä ha Israel”.

Kongehnä, utkägihu̱ ge mähyoni nzäntho gä o̱tehu̱ rä Zi Dada Jeoba. ꞌNehe, udi ge mäske nꞌa rä jäꞌi rä hojäꞌi, ngu Saul, dä za dä zo̱ho̱ dä ntsꞌomꞌu̱i mꞌe̱fa. ¿Hänge nunka di ne gä ntsꞌomꞌu̱ihu̱?