XIꞌMU̱ dä du nꞌa zi bätsi, ¿hänge xi dä johya rä nänä mu̱ näꞌä rä zi bätsi dä nuhu mänꞌaki? Pe, ¿dä za dä nuhu mänꞌaki nuꞌu̱ ya xä du? ¿Ya xä thogi njabu̱?

Hyandi nuni ñꞌo̱ho̱, ꞌne hyandi nuni ꞌme̱hñä ko rä zi bätsi. Nuni ñꞌo̱ho̱ gehni Elias, mi rä mꞌe̱hni Äjuä. Nuni ꞌme̱hñä mi rä mengu Sarepta, ꞌne xki du rä däme, ꞌne nuni metsi gehni mi rä zi bätsi. Nꞌa rä pa, nuni zi metsi bi ñheni, xa bi ziꞌti rä ñheni ꞌne bi du. Nubye̱, Elias bi ꞌñembi näꞌä ꞌme̱hñä: “Rꞌaki näꞌä ri metsi”.

Elias bi zitsꞌi näꞌä bätsi ha näꞌä kuarto mi ja mäñä ꞌne bi me̱gi ha rä fidi. Nubye̱, bi xadi njaua: “Zi Dada Jeoba, japi dä nuhu nuni metsi”. ¡Näꞌä metsi bi mu̱di bi joxä rä hñä! ꞌNepu̱, Elias bi ziꞌspäbi näꞌä ꞌme̱hñä ꞌne bi ꞌñembi: “¡Hyandi, ri metsi te!”. Näꞌä zi ꞌme̱hñä xa bi johya.

Mänꞌa rä mꞌe̱hni Äjuä mi rä thuhu Eliseo. Nuni mi rä maxte Elias. Pe mꞌe̱fa, Jeoba bi japi Eliseo bi ja yä milagro ꞌnehe. Nꞌa rä pa, Eliseo bi ma pa ha rä hnini Sunem, ꞌne nꞌa zi ꞌme̱hñä xa bi ñhojäꞌi kongeꞌä. Mꞌe̱fa, näꞌä zi ꞌme̱hñä bi mꞌu̱i nꞌa rä bätsi.

Nꞌa xudi, nuꞌmu̱ näꞌä zi bätsi ya xki te, bi ma ha yä huähi habu̱ mi mpe̱fi rä dada. Nse̱kitho näꞌä bätsi bi mafi: “¡Xä ñꞌu̱ mä ñä!”. Nubye̱, bi tsꞌitsꞌi pa ha rä nguu, pe mi zo̱ni, bi du. ¡Rä nänä xa bi durämu̱i! Nguntꞌä bi ma bä honi Eliseo.

Mi zo̱ni Eliseo, bi yu̱tꞌi habu̱ mi ꞌme̱ni näꞌä metsi xki du. Bi xatuäbi Jeoba, ꞌne bi huitsꞌi näꞌä bätsi. Nguntꞌä bi patꞌi rä ndoyꞌo näꞌä bätsi, ꞌne bi ñhetsꞌe yoto mꞌiki. ¡Hängu bi johya rä nänä nuꞌmu̱ bi yu̱tꞌi ꞌne bi hyandi ge mi te rä bätsi!

Xi ndunthi yä jäꞌi xä du, ꞌne xä japi xä duyämu̱i yä familia ꞌne yä ntsitsꞌi. Nuju̱ hindä za gä japihu̱ dä nuhu nuꞌu̱ yä jäꞌi. Pe rä Zi Dada Jeoba hää. Mꞌe̱fa ma gä pädihu̱ te ma dä me̱fi Jeoba pa dä gu̱tsꞌi nuꞌu̱ yä mꞌotho yä jäꞌi xä du.