HYANDI nuyu̱ yä jäꞌi theni nuni ñꞌo̱ho̱. ¿Gi pädi toꞌoni? Nuni ñꞌo̱ho̱ rä thuhu Jeremias, mi rä mꞌe̱hni Äjuä.

Mꞌe̱fa de nuꞌmu̱ Josias bi tehmi nuꞌu̱ yä zidada hingä mäjuäni mi ja ha Israel, Jeoba bi huahni Jeremias pa Rä mꞌe̱hni. Jeremias bi ꞌñenä ge himi jatho rä je̱ya pa xä me̱päbi Jeoba. Pe Jeoba bi ꞌñembi ge ma xä matsꞌi pa xä ja näꞌä ꞌme̱fi.

Jeremias bi ꞌñembi nuꞌu̱ yä israelita ge xä hye̱gi nuꞌu̱ yä tsꞌo tꞌo̱tꞌe mi pe̱fi, bi ꞌñembäbi: “Nuꞌu̱ yä zidada di ndäne märꞌa yä hnini, hingä xa mäjuäni Äjuä”. Pe ndunthi yä israelita himbi yꞌo̱de, bi ꞌuege de Jeoba, ꞌne mi ndäne nuꞌu̱ yä zidada hingä mäjuäni. Jeremias bi xipi nuꞌu̱ yä jäꞌi ge Äjuä ma xä me̱hni nꞌa kastigo po nuꞌu̱ yä tsꞌoki mi pe̱fi, pe nuꞌu̱ yä jäꞌi mi thenitho.

Mi thogi yä je̱ya, Josias bi du. Mꞌe̱fa de hñu nzänä, näꞌä rä tsꞌu̱ntꞌu̱ mi rä thuhu Jeoyakim go geꞌä bi zo̱ho̱ bi mända. Jeremias bi sigi bi xipi yä israelita: “Jerusalen ma dä uadi mu̱ nuꞌähu̱ hingi ne gi ꞌuegehu̱ de ri tsꞌokihu̱”. Pe nuꞌu̱ yä majhä bi nkue̱tho ꞌne bi ꞌñembäbi nuꞌu̱ yä ñꞌo̱ho̱ mi gu̱tꞌi rä ꞌñuu: “Pe̱ꞌtsi te dä du Jeremias ngeꞌä enä ge ma dä uadi mä hninihu̱”.

Xibye̱, ¿te bi me̱fi Jeremias? Nuni himbi ntsu ꞌne bi ꞌñembi gatꞌho yä jäꞌi: “Jeoba xpä pe̱nkägi pa gä xiꞌähu̱ ge ma dä huati rä hnini Jerusalen mu̱ hingi ꞌuegehu̱ de ri tsꞌokihu̱. Pe di ne gi pädihu̱ ge mu̱ gi hyogägihu̱, ma gi hyohu̱ nꞌa ñꞌo̱ho̱ näꞌä hinte mä tsꞌoki tu”.

Nuꞌu̱ yä ñꞌo̱ho̱ mi gu̱tꞌi rä ꞌñuu, himbi hyo Jeremias, pe yä israelita bi sigi bi me̱fi yä tsꞌoki. Mꞌe̱fa, Näbukodonosor näꞌä ndä de Babilonia bi ma bä ntuhni kontra Israel. Näbukodonosor bi yꞌo̱tꞌe yä ꞌme̱go ndunthi yä israelita ꞌne bi zitsꞌi pa Babilonia. ¿Gi hohmä ge rꞌa yä jäꞌi nuꞌu̱ hingi pädi, dä zixäꞌi yabu̱ ha mänꞌa rä hnini?