¿GI PÄDI por hanja nuni ñꞌo̱ho̱ di xatuäbi Jeoba? ¿Por hanja xä mogi nuyu̱ yä karta rꞌandi de rä altar Jeoba? Nuni ñꞌo̱ho̱ gehni Esekias, näꞌä ndä de nuꞌu̱ yoho yä tꞌu̱kä hnini de rä sur ha Israel. Nubye̱ pe̱ꞌtsi yä däta xuñha. ¿Por hanja?

Ngeꞌä nuꞌu̱ yä soldado yä me Asiria, ya xki huati nuꞌu̱ rꞌe̱tꞌa yä tꞌu̱kä hnini de rä norte ha Israel. Jeoba bi hyopi bi thogi njabu̱ ngeꞌä nuꞌu̱ yä jäꞌi mi ꞌmu̱hni xa mi yä tsꞌomꞌu̱i. Nubye̱, nuꞌu̱ yä asirio bi ma pa dä ntuhni ko nuꞌu̱ yoho yä tꞌu̱kä hnini de rä sur ha Israel.

Näꞌä ndä de Asiria ja xki me̱mpi rꞌa yä karta Esekias. Ha nuꞌu̱ yä karta, näꞌä ndä de Asiria mi theni ꞌne mi yꞌo̱ Jeoba, ꞌnehe mi embäbi Esekias ge hindä ntuhni. Gehyu̱ yä karta xä mohni Esekias getbu̱ de rä altar Äjuä. Hänge Esekias bi xadi njaua: “Zi Dada Jeoba, ñängägihe de näꞌä ndä de Asiria. Pa gatꞌho yä dähni dä bädi ge nuꞌi, ho̱nse̱ꞌi gä Äjuä”. ¿Bi yꞌo̱de Jeoba näꞌä sadi?

Esekias mrä hogä ndä. Hingä ngu nuꞌu̱ yä nduxte ndä mi mända ha nuꞌu̱ rꞌe̱tꞌa yä tꞌu̱kä hnini de rä norte ha Israel, nixi mi nja ngu näꞌä rä bo̱ka dada mi rä thuhu Akas. Esekias xki me̱fi gatꞌho nuꞌu̱ yä mhända Äjuä. Hänge mi uadi bi xadi, Isaias bi me̱mpäbi nunä raso xki mää Jeoba: “Näꞌä ndä de Asiria hingä ma dä yu̱tꞌi ha Jerusalen. Hinte mä soldado ma dä uatꞌi ha rä hnini, ꞌne hinte mä flecha ma dä yꞌe̱i”.

Hyandi rä kꞌoi, ¿gi pädi toꞌo nuyu̱ yä soldado xä du? Gehyu̱ yä asirio. Jeoba bi me̱hni rä e̱nxe̱ ꞌne näꞌä xuiꞌä, bi hyo 185,000 yä soldado. Hänge näꞌä ndä de Asiria bi gu̱ rä ꞌñuu bi ma.

Nuꞌu̱ yoho yä tꞌu̱kä hnini de rä sur ha Israel hinte bi ja ꞌne bi mꞌu̱i xä ñho po rꞌa yä je̱ya. Pe mi du Esekias, bi zo̱ho̱ bi mända näꞌä rä tꞌu̱ mi rä thuhu Mänäses. Mꞌe̱fa bi zo̱ho̱ bi ndä nꞌa rä tꞌu̱ Mänäses mi tꞌembi Amon. Mänäses ꞌne Amon mi yä tsꞌo ndä. Hänge nuꞌu̱ yä hnini bi ñudi ko yä ntsꞌomꞌu̱i ꞌne yä tuhni. Nuꞌu̱ yä ꞌme̱go Amon bi hyose̱ nunä ndä, hänge näꞌä rä tsꞌu̱ntꞌu̱ mi rä thuhu Josias go bi zo̱ho̱ bi ndä ha nuꞌu̱ yoho yä tꞌu̱kä hnini de rä sur.