RÄ Näbukodonosor, näꞌä ndä de Babilonia, bi zitsꞌi gatꞌho nuꞌu̱ yä israelita xa mi ja yä mfädi. ꞌNepu̱ de gatꞌho nuyu̱, bi huahni ho̱nse̱ nuꞌu̱ yä metsi xa mähotho ꞌne mi yä bämhñä. ¿Gi handi goho de nuyu̱ yä metsi? Hää, nꞌaa rä thuhu Daniel, nuyu̱ mä hñuu, yä babilonio bi ꞌñembi Sadrak, Mesak, ꞌne Abednego.

Näbukodonosor mi ne ge gatꞌho nuꞌu̱ yä metsi, xä tꞌuti xä ñho pa xä mpe̱fi kongeꞌä ha rä palasio. Hänge po hñu nje̱ya bi tꞌuti nuꞌu̱ yä metsi. ꞌNepu̱ Näbukodonosor bi huahni ho̱nse̱ nuꞌu̱ yä metsi xa xki bädi pa njabu̱ xä matsꞌi ko nuꞌu̱ yä xuñha. ꞌNehe mi ne ge nuꞌu̱ yä metsi xa di ja yä nzaki, hänge bi mända dä tꞌumbäbi nuꞌu̱ yä ñhuni ꞌne näꞌä binu mi tsi Näbukodonosor ꞌne rä familia.

Hyandi, Daniel ñäui Aspenas, nuni rä däta ꞌme̱go Näbukodonosor, ¿gi pädi te xipi? Embi ge hingi ne dä zi de nuyu̱ yä hogä ñhuni tsi rä ndä. Pe Aspenas bi durämu̱i ꞌne bi ꞌñenä: “Rä ndä xa mää te ri ꞌñehe gi tsihu̱. ꞌNehe mu̱ dä hyandi ge hingi ja ri nzakihu̱ ja ngu nuꞌu̱ märꞌa yä metsi, dä za dä hyogägi”.

Hänge Daniel bi nzofo näꞌä ñꞌo̱ho̱ xki hñutsꞌi Aspenas pa xä su Daniel ꞌne nuꞌu̱ mä hñuu yä metsi, ꞌne bi ꞌñembi: “Po 10 yä pa rꞌakägihe yä berdura ꞌne yä dehe pa gä tsihe. ꞌNepu̱ hyandi toꞌo mänꞌa ma dä nja rä nzaki, mu̱ nuꞌu̱ yä metsi tsipäbi nuꞌu̱ yä ñhuni rä ndä, o nuje”.

Näꞌä ñꞌo̱ho̱ bi ꞌñenä ge hää. Mi thogi nuꞌu̱ 10 yä pa, Daniel ꞌne nuꞌu̱ hñuu yä ntsitsꞌi mänꞌa xa mi ja yä nzaki ke gatꞌho nuꞌu̱ märꞌa yä metsi, ꞌne bi the̱gi dä sigi dä zi yä berdura hingä nuꞌu̱ yä ñhuni mi umbi rä ndä.

Mi uadi nuꞌu̱ hñu nje̱ya gatꞌho nuꞌu̱ yä metsi bi tsꞌitsꞌi ko Näbukodonosor. Mꞌe̱fa de bi ñä kongeꞌu̱, näꞌä ndä bi hyandi ge Daniel ꞌne nuꞌu̱ hñuu yä metsi geꞌu̱ mänꞌa xa mi ja yä mfädi. Hänge bi zämi pa bi mpe̱fi ha rä palasio. ꞌNe nuꞌmu̱ rä ndä mi pa ko Daniel, Sadrak, Mesak ꞌne Abednego pa mi xipäbi yä xuñha o mi o̱tpäbi yä ntꞌani, bi hyandi ge nuyu̱ yä metsi mi pädi 10 mꞌiki ke nuꞌu̱ yä majhä ꞌne yä bädi.