RÄ Salomon mi bätsitho nuꞌmu̱ bi zo̱ho̱ bi ndä. Xa mi mädi rä Zi Dada Jeoba, ꞌne bi me̱fi näꞌä hogä tsꞌofo xki umbi rä dada. Jeoba mi numäñho Salomon hänge nꞌa xui bi ꞌñembi ha nꞌa tꞌi: “Salomon, ¿te gi ne gä rꞌaꞌi?”.

Salomon bi dädi: “Mä Zi Dada Jeoba, nuga xa di bätsitho ꞌne hindi pädi hanja gä mända. Hänge, rꞌaki rä mfädi pa dä za gä mända xä ñho ri hnini”.

Jeoba xa bi ho näꞌä bi yꞌadi Salomon. Hänge bi ꞌñembi: “Ngeꞌä gä yꞌadi rä mfädi ꞌne hingä yꞌadi gi ꞌmu̱i ndunthi yä je̱ya nixi gä yꞌadi yä ñho, ma gä rꞌaꞌi xa ndunthi rä mfädi ja ngu näꞌä hinxä me̱ꞌtsi yä jäꞌi asta nubye̱. Pe ꞌnehe ma gä rꞌaꞌi nuꞌu̱ yä tꞌo̱tꞌe hingä yꞌadi, hää, ma gä rꞌaꞌi ndunthi yä ñho ꞌne rä nsu”.

Mꞌe̱fa, yoho yä ꞌme̱hñä bi ma bä nuu Salomon ngeꞌä mi pe̱ꞌtsi nꞌa däta xuñha. Nꞌa de nuꞌu̱ yä ꞌme̱hñä bi ꞌñenä: “Nuni ꞌme̱hñä ꞌne nuga di ꞌmu̱ihe nꞌatꞌä rä nguu. Nuga dä pe̱ꞌtsi nꞌa mä ꞌue̱ne, ꞌne rä hñupa, nuni ꞌnehe bi me̱ꞌtsi nꞌa rä ꞌue̱ne. Nꞌa xui rä ꞌue̱ne nuni ꞌme̱hñä bi du, pe mientra ndi ähä bi ma bä tsoogägi näꞌä rä ꞌue̱ne xki du ꞌne bi zitsꞌi näꞌä mä ꞌue̱ne. Nuꞌmu̱ dä nuhu ꞌne dä handi näꞌä ꞌue̱ne xki du, dä da ngue̱nda ge hingä mi go geꞌä mä ꞌue̱ne”.

Mi yꞌo̱de näꞌä mänꞌa ꞌme̱hñä bi ꞌñenä: “¡Hinä! ¡Näꞌä ꞌue̱ne te go mä me̱ti pe näꞌä xä du go rä me̱ti!”. Näꞌä ꞌme̱tꞌo ꞌme̱hñä bi dädi: “¡Hinä! ¡Näꞌä xä du go ri me̱ti ꞌne näꞌä te go mä me̱ti!”. Njabu̱ mi ntuhni nuya yä ꞌme̱hñä. Xibye̱, ¿te ma dä me̱fi Salomon?

Salomon bi yꞌadi nꞌa majuai, ꞌne mbä thämpäbi bi ꞌñenä: “Hekhu̱ nuni ꞌue̱ne te, ꞌne umfu̱ mäde kada nꞌa de nuyu̱ yä ꞌme̱hñä”.

Näꞌä xa mäjuäni mi rä nänä näꞌä ꞌue̱ne bi ꞌñenä: “¡Hinä! Po rä mäte oxki ma gi hyohu̱. ¡Go dä umfu̱ nuni ꞌme̱hñä!”. Pe näꞌä mänꞌa ꞌme̱hñä bi ꞌñenä: “Hinä, nixi pa nuni ha nixi pa nuga, hekhu̱ nuni ꞌue̱ne”.

Nubye̱ Salomon bi ꞌñenä: “¡Ogi hohu̱ näꞌä ꞌue̱ne! Go dä umfu̱ nuni ꞌme̱hñä. Gehni xa mäjuäni rä nänä”. Salomon bi bädi ngeꞌä bi hyandi ge näꞌä ꞌme̱hñä xa mi mädi rä ꞌue̱ne, asta mi ne ge go xä tꞌumbi näꞌä mänꞌa ꞌme̱hñä pa hinxä tho. Mi yꞌo̱de yä jäꞌi näꞌä xki me̱fi Salomon, xa bi johya ngeꞌä mi pe̱ꞌtsi nꞌa rä ndä näꞌä xa mi ja rä fädi.

Nuꞌmu̱ bi mända Salomon, Äjuä bi jäpi rä hnini Israel. Gatꞌho yä huähi xa bi uni yä trigo, yä sebada, yä obxi, yä igo ꞌne märꞌa yä ꞌmotꞌi. Yä jäꞌi mi hee yä hogä dutu ꞌne mi ꞌmu̱i ha yä ngu xä ñho. Mi ja yä ñho pa gatꞌho yä jäꞌi.