MꞌE̱FA de nuꞌmu̱ Dabid bi hyo Goliat, Abner näꞌä rä ndä de yä soldado ha Israel, bi zitsꞌi Dabid habu̱ mi yꞌo Saul. Saul xa bi numäñho Dabid, bi hñutsꞌi ngu nꞌa de nuꞌu̱ yä ndä de yä soldado, ꞌne bi zämi pa xä mꞌu̱ ha rä nguu.

Mi mengi yä israelita de bi ntunkui yä filisteo, yä ꞌme̱hñä mi tuhu njaua: “Saul bi hyo rꞌa yä mꞌo ya jäꞌi. Pe Dabid bi hyo ndunthi yä mꞌo yä jäꞌi”. Saul bi nkue̱ ngeꞌä go mänꞌa mi tꞌespäbi rä nsu Dabid. Pe Jonätan näꞌä hingä mi rä embidioso ngu rä dada, ꞌne xa mi mädi Dabid. Dabid ꞌnehe mi mädi Jonätan. Hänge nuyu̱ bi ja nꞌa rä kohi ge ma xä ntsitsꞌi nzäntho.

Dabid xa mi pädi dä me̱i rä arpa. Saul xa mi ho dä yꞌo̱de näꞌä ꞌmida mi pe̱i Dabid. Pe nꞌa rä pa, näꞌä embidia mi pe̱ꞌtsi Saul, bi japi bi me̱fi nꞌa tsꞌo tꞌo̱tꞌe. Mientra Dabid mi pe̱i rä arpa, Saul bi gu̱ rä lansa ꞌne bi yꞌe̱mbäbi Dabid, ꞌne mi ense̱: “¡Ma gä to̱te ha rä jädo Dabid ko nunä lansa!”. Pe Dabid bi ꞌuengi pa himbi zu̱di näꞌä lansa. Mꞌe̱fa, Saul bi jabu̱ mänꞌaki pe himbi ꞌñätꞌi. Nubye̱ Dabid mi pädi ge pe̱ꞌtsi te xä nsu de Saul.

¿Gi beni näꞌä kohi xki ja Saul? Xki mää ge toꞌo xä hyo Goliat, ma xä umbi rä tꞌixu. Nubye̱, Saul bi ꞌñembäbi Dabid ge pa xä za xä nthäti ko näꞌä rä tꞌixu mi rä thuhu Mikal, pe̱ꞌtsi te xä hyo 100 yä filisteo. ¿Gi da ngue̱nda? Saul mi ne ge nuꞌu̱ yä filisteo xä hyo Dabid. Pe himbi thogi njabu̱, ꞌne Saul pe̱ꞌtsi te bi uni rä tꞌixu pa bi nthätui Dabid.

Nꞌa rä pa, Saul bi xipäbi Jonätan ꞌne gatꞌho nuꞌu̱ yä ꞌme̱go, ge mi ne dä hyo Dabid. Pe Jonätan bi ꞌñembi rä dada: “Ote gi o̱tpäbi Dabid, hinte mä tsꞌoki xä yꞌo̱tꞌe. Näꞌä xä maxꞌäꞌi, ma xä da rä te nuꞌmu̱ bi hyo Goliat, ꞌne xa gä johya po näꞌä bi me̱fi Dabid”.

Saul bi yꞌo̱te Jonätan, ꞌne bi jura ge hinte ma xä yꞌo̱tpäbi Dabid. Hänge Dabid bi mengi ꞌne bi sigi bi me̱päbi mänꞌaki Saul. Pe nꞌa rä pa, mientra Dabid mi pe̱i rä ꞌmida, Saul bi gu̱ rä lansa ꞌne bi yꞌe̱mbäbi mänꞌaki Dabid. Dabid bi ꞌuengi, ꞌne näꞌä lansa bi nꞌo̱tꞌe ha rä jädo. ¡Ya hñuu yä mꞌiki kongehnä! ¡Dabid mi pädi ge mähyoni xä ꞌmatꞌi xä ma!

Näꞌä xui, Dabid bi ma ha rä nguu, pe Saul bi me̱hni rꞌa yä ñꞌo̱ho̱ pa xä hyo. Mikal mi pädi näꞌä mi ne dä me̱fi rä dada, hänge bi ꞌñembi Dabid: “Mu̱ hingi ne gi hatsꞌi xkä tu, gi ma nunä xui”. Näꞌä xuiꞌä, Mikal bi matsꞌi Dabid pa bi bo̱ni po ha rä bentanä. Ngu po yoto nje̱ya, Dabid bi ꞌmatꞌi de Saul, ꞌne mi ꞌmu̱i habu̱ mi tsa.