MA GÄ handihu̱ te bi thogi rꞌa yä je̱ya änte de xä mengi Esdras ha Jerusalen. De gatꞌho yä israelita, Märdokeo ꞌne Ester geꞌu̱ mänꞌa bi me̱ꞌtsi yä däta nsu ha Persia. Ester bi nreinä, ꞌne rä primu mi rä thuhu Märdokeo, bi thutsꞌi ngu rä yoho rä ndä ha Persia. Ma gä handihu̱ hanja bi thogi.

Nuꞌmu̱ Ester mi zi tꞌu̱kä nxutsi, bi du yä dada hänge Märdokeo go geꞌä bi tede. Asuero näꞌä ndä de Persia, mi pe̱ꞌtsi nꞌa rä palasio ha rä hnini Susa, ꞌne ja mi mꞌe̱goni Märdokeo. Nꞌa rä pa, Basti näꞌä rä ꞌme̱hñä Asuero himbi yꞌo̱de, hänge bi huahni mänꞌa rä ꞌme̱hñä pa go bi nreinä. ¿Gi pädi toꞌo bi huahni? Hää, nꞌa nxutsi xa mi mähotho mi rä thuhu Ester.

¿Gi pädi toꞌo nuni ñꞌo̱ho̱ xa nda ñꞌexmänsu? Rä thuhu Amän, mi pe̱ꞌtsi nꞌa rä däta nsu ha Persia, xa di ho ge yä jäꞌi dä ndäne, ꞌne mi ne ge Märdokeo xä ndäne ꞌnehe. Pe Märdokeo himbi ne ngeꞌä mi pädi ge hinxä ñho xä ndäne näꞌä nda bo̱ka ñꞌo̱ho̱ꞌä. Amän xa bi nkue̱, ¿gi pädi te bi me̱fi? Ma gä handihu̱.

Amän bi mete Asuero yä nkꞌuamba o yä nhemhñä. Bi ꞌñembi: “Nuꞌu̱ yä israelita pe̱ꞌtsi te dä tho ngeꞌä xa yä tsꞌomꞌu̱i ꞌne hingi o̱de nuꞌu̱ ri mhända”. Asuero hingä mi pädi ge Ester mrä israelita hänge bi gamfribi Amän, ꞌne bi yꞌofo nꞌa mhända habu̱ mi hutsꞌi näꞌä pa ma xä tho gatꞌho yä israelita.

Mi yꞌo̱de Märdokeo de näꞌä mhända, xi bi durämu̱i. Hänge bi me̱mpi Ester nunä raso: “Ri ma guä nuu rä ndä ꞌne yꞌapäbi ge dä ñängägihu̱”. Ester bi ma, mäske ha Persia mi ja nꞌa mhända habu̱ mi enä ge pe̱ꞌtsi te dä tho nuꞌu̱ toꞌo mi pa mi nuu rä ndä ha hingä xki tsꞌohni. Mi yu̱tꞌi Ester, Asuero bi makuäbi rä zaa de gä oro, njabu̱ bi ꞌñudi ge hingä mi ne ge xä tho Ester. Ester bi nzohni Asuero ꞌne Amän pa dä ñuni. Ja gehni Asuero bi yꞌambi Ester te mi ne dä yꞌadi. Ester bi ꞌñenä ge mu̱ Asuero ꞌne Amän xä ma mänꞌaki rä hyaxꞌä pa xä ñuni, ja xä xipäbini te mi ne.

Rä hyaxꞌä, ha näꞌä ñhuni, Ester bi ꞌñembi Asuero: “Nuꞌu̱ mä jäꞌi ꞌne nuga ma dä thogägihe”. Asuero bi nkue̱ ꞌne bi ñꞌani: “¿Toꞌo näꞌä ne dä hyoꞌäꞌihu̱?”.

Ester bi dädi: “Nuni bo̱ka Amän, ¡go gehni ꞌne dä hyogägihe!”.

Nubye̱ Asuero xa bi nkue̱ ꞌne bi mända dä tho Amän. Mꞌe̱fa, Asuero bi hñutsꞌi Märdokeo ngu rä yoho rä ndä ha Persia. Nubye̱, Märdokeo bi hyoki nꞌa rꞌayꞌo mhända habu̱ bi umbi nse̱ki yä israelita pa xä ntuhni näꞌä pa ma xä nju̱tsꞌi nuꞌu̱ yä nkontra pa xä hyo. Po näꞌä däta nsu mi pe̱ꞌtsi Märdokeo, ndunthi yä jäꞌi bi matsꞌi yä israelita pa njabu̱ nuꞌu̱ yä nkontra himbi hyo.