¿GI HANDI te thogi nuua? Nuyu̱ yä jäꞌi pe̱ꞌtsi nꞌa dängo. Belsasar, rä ꞌme̱to Näbukodonosor, geꞌä mi mända ha Babilonia. Xki nzohni nꞌa mꞌo yä jäꞌi nuꞌu̱ xa mi ja yä däta nsu. Mi tsithe ko nuꞌu̱ yä kopa de gä oro ꞌne de gä plata, ꞌne nuꞌu̱ yä mohi xki thätsꞌi de Jerusalen ha rä templo Jeoba. Nse̱kitho, bi neki rä yꞌe̱ nꞌa jäꞌi ꞌne bi mu̱di bi ñꞌofo ha jädo. Gatꞌho xa bi ntsu.

Nubye̱, Belsasar bi mända bä tsꞌimpäbi nuꞌu̱ yä bädi ꞌne bi ꞌñembi: “Toꞌo dä za dä hñeti ꞌne dä xikägi te ri bo̱ni nuni bi tꞌofo ha jädo, ma gä umbi ndunthi yä regalo ꞌne ma gä hutsꞌi ngu rä hñuu rä ndä ha Babilonia”. Pe gatꞌho nuꞌu̱ yä bädi, himbi za bi hñeti ꞌne nixi bi bädi te ri bo̱ni nuꞌu̱ yä noya mi hutsꞌi ha jädo.

Rä nänä Belsasar bi yꞌo̱de ge nuꞌu̱ yä jäꞌi xa mi hitho hänge bi yu̱tꞌi habu̱ mi ñuni Belsasar ꞌne bi ꞌñembi: “Bänte ri thuhu, ogi tsu. Ha ri tsꞌu̱tꞌhui ꞌmu̱ nꞌa ñꞌo̱ho̱ rä thuhu Daniel näꞌä pädi yä zidada. Nuꞌmu̱ mi mända näꞌä ri xita Näbukodonosor, bi hñutsꞌi Daniel pa bi ndä de gatꞌho nuꞌu̱ yä bädi. Japi dä tsꞌii pa dä xiꞌi te ri bo̱ni nuya yä noya”.

Hänge nguntꞌä bä tsꞌii Daniel. Pe Daniel himbi ne bi hñäni nuꞌu̱ yä regalo mi umbi Belsasar, ꞌne bi mu̱di bi xipi por hanja Jeoba xki hñäki de dä ndä Näbukodonosor, näꞌä rä xita Belsasar, ꞌne bi ꞌñembäbi: “Näꞌä xi mi rä ñꞌexmänsu, hänge Jeoba bi kastiga”.

ꞌNe bi sigi bi ꞌñembäbi: “Nuꞌi ya ngi pädi gatꞌho näꞌä xki thogi ri xita Näbukodonosor, pe nuꞌi ꞌnehe gi ñꞌexmänsu nguꞌä. Gi tsithe ko nuꞌu̱ yä kopa ꞌne nuꞌu̱ yä mohi bä thä ha rä templo Jeoba. Gi ndäne nuꞌu̱ yä zidada xä thoki de gä zaa ꞌne de gä do. Hingi eꞌspäbi rä nsu Äjuä näꞌä mä Hyokätehu̱, hänge Äjuä bä pe̱hni nunä yꞌe̱ pa dä yꞌofo nuyu̱ yä noya”.

Nubye̱ Daniel bi ꞌñenä: “Nuyu̱ yä noya enä: MENE, MENE, TEKEL ꞌne PARSIN”.

“MENE ri bo̱ni ge Äjuä xä mede nuꞌu̱ yä pa bi dura ri tsꞌu̱tꞌhui ꞌne mää ge ya bi uadi nuꞌu̱ yä pa. TEKEL ri bo̱ni ge Äjuä bi yꞌe̱ntsꞌäꞌi ha rä balansa ꞌne bi dini ge hingä tsu̱di rä tꞌe̱ni, ge hingä gä hojäꞌi. PARSIN ri bo̱ni ge ri tsꞌu̱tꞌhui ma dä tꞌumbi yä mengu Medopersia.”

Mientra mi ñätho Daniel, yä mengu Medopersia bi yu̱tꞌi ha näꞌä hnini ꞌne bi mu̱di bi hyo yä me Babilonia. Bi hñäni näꞌä hnini ꞌne bi hyo Belsasar. Nuꞌu̱ yä noya mi hutsꞌi ha jädo, ¡bi kumpli näꞌä xuiꞌä! Pe xibye̱, ¿te ma xä thogi ko nuꞌu̱ yä israelita mi mꞌe̱go ha Babilonia? Mꞌe̱fa ma gä pädihu̱, pe nubye̱ ma gä handihu̱ te bi thogi Daniel.