¿GI HANDI hanja rä Hesu hu̱fi nuni zi metsi? Hää, rä Hesu xa di mädi yä zi bätsi. Nuyu̱ yä ñꞌo̱ho̱ di nu̱ꞌti gehyu̱ yä apostol. ¿Gi pädi te xipi rä Hesu?

Rä Hesu ꞌne yä de̱ni ja xpä pengi de nꞌa biahe xa yabu̱. Ha rä ꞌñuu, nuꞌu̱ yä apostol bä ntuhni hänge mi zo̱ni ha Kapernaum rä Hesu bi yꞌambäbi: “¿Te ngi mäñhu̱ ha rä ꞌñuu?”. Rä Hesu ya mi pädi por hanja xki ntuhni, pe bi yꞌambäbi pa njabu̱ xä hyandi mu̱ nuꞌu̱ xä mää näꞌä mäjuäni.

Yä apostol hinte bi dädi ngeꞌä ha rä ꞌñuu, nuꞌu̱ xpi ntuhni ngeꞌä mi ne dä bädi toꞌo de geꞌu̱ mi mädä de gatꞌho. Rꞌa de geꞌu̱ mi ne dä me̱ꞌtsi yä däta nsu ke nuꞌu̱ märꞌaa. ¿Hanja ma xä ja rä Hesu pa xä xipi nuꞌu̱ yä apostol ge hingä mi xä ñho dä hyoni yä däta nsu?

Rä Hesu bi nzofo nꞌa zi bätsi pa bi hyandi nuꞌu̱ yä apostol ꞌne bi ꞌñembäbi: “Di ne gi pädihu̱ ge mu̱ hingi paati ri mꞌu̱ihu̱ ꞌne gi njahu̱ ngu nunä zi bätsi, hindä za gi ku̱tꞌihu̱ ha rä tsꞌu̱tꞌhui Äjuä. Toꞌo mädä ha rä tsꞌu̱tꞌhui Äjuä, mähyoni dä nja ngu nunä zi bätsi”. ¿Gi pädi por hanja bi ꞌñenä njabu̱?

Ngeꞌä yä zi tꞌu̱kä bätsi hingi tuyämu̱i po dä me̱ꞌtsi yä däta nsu ke märꞌa yä bätsi. Hänge nuꞌu̱ yä apostol mähyoni dä mbeni ngu yä zi bätsi, ꞌne hindä ntuhni po dä me̱ꞌtsi yä däta nsu.

Rä Hesu ya xki ꞌñudi märꞌa yä mꞌiki ge xa mi mädi yä zi bätsi. Mi thogi rꞌa yä zänä, rꞌa yä jäꞌi bä tsii yä bätsi pa dä nuu rä Hesu. Nuꞌu̱ yä apostol himi hopi nuꞌu̱ yä bätsi xä uatꞌi rä Hesu. Pe rä Hesu bi ꞌñembäbi: “Hye̱hu̱ yä zi bätsi dä ehe kongeki ꞌne ogi häkuäbihu̱, ngeꞌä rä tsꞌu̱tꞌhui Äjuä ri ꞌñepi nuꞌu̱ nja ngu nuyu̱ yä zi bätsi”. ꞌNepu̱ rä Hesu bi hyu̱fi nuꞌu̱ yä zi bätsi ꞌne bi jäpi. ¡Hängu rä johya di rꞌakägihu̱ gä pädihu̱ ge rä Hesu di mädi yä zi bätsi! ¿Hänge hää?