YA XKI thogi yopa, mi nxuiꞌä njuebe, rä Hesu ꞌne nuꞌu̱ 12 yä apostol bi ntini ha nꞌa däta kuarto mi ja mäñä de nꞌa to̱nꞌgu pa bi zi näꞌä ntꞌoxi de rä Paskua. Nuni bi bo̱ni gehni Judas Iskariote. Bi ma pa dä xipäbi yä majhä hanja dä za dä gu̱ rä Hesu.

Näꞌä mierkole, Judas xki yꞌambäbi nuꞌu̱ yä majhä: “¿Te gi rꞌakägihu̱ mu̱ gä daꞌähu̱ rä Hesu?”. Nuꞌu̱ bi dädi: “Gä rꞌaꞌähe 30 yä bojä de gä plata”. Nubye̱ Judas ma xä zitsꞌi nuꞌu̱ yä majhä pa ha mi yꞌo rä Hesu. ¿Hänge xa xä ntsꞌo näꞌä bi me̱fi Judas?

Mi uadi näꞌä ntꞌoxi de rä Paskua, rä Hesu bi mu̱di bi ja nꞌa rꞌayꞌo ntꞌoxi. Bi hekuäbi nuꞌu̱ yä apostol nꞌa thuhme ꞌne bi ꞌñembi: “Tsihu̱, gehnä ri bo̱ni mä ndoyꞌo ma gä uni po nuꞌähu̱”. ꞌNepu̱ bi gu̱ näꞌä kopa mi po rä binu ꞌne bi ꞌñenä: “Tsihu̱ nunä binu, go gehnä ri bo̱ni mä ji ma gä fani po nuꞌähu̱”. Rä Mäkä Tꞌofo embäbi nunä ntꞌoxi «rä Mäkä Ntꞌoxi».

Yä israelita mi tsi näꞌä ntꞌoxi de rä Paskua ngeꞌä mi beni nuꞌmu̱ Äjuä bi me̱hni rä e̱nxe̱ pa bi hyo nuꞌu̱ yä mu̱di tꞌu̱ yä ejipsio, pe yä israelita hinte bi yꞌo̱tpäbi. Pe nubye̱ rä Hesu bi ja näꞌä rꞌayꞌo ntꞌoxi, ngeꞌä mi ne ge nuꞌu̱ yä de̱ni xä ja nunä fenäte tatꞌä je̱ya ꞌne xä beni ge rä Hesu bi du por geꞌu̱.

Mꞌe̱fa de bi zi näꞌä Mäkä Ntꞌoxi, rä Hesu bi ꞌñembi nuꞌu̱ yä apostol ge hindä ntsu ꞌne dä ze̱ yä jamfri. ꞌNepu̱ bi ntuhu yä jähñä pa Äjuä ꞌne bi bo̱ni bi ma. Ya ngu mi thogi mäde nxui. ¿Gi pädi habu̱ bi ma? Ma gä handihu̱.