¿GI HANDI rä Hesu xä mipäbi rä yꞌe̱ nuni zi nxutsi? Nuni nxutsi pe̱ꞌtsi 12 nje̱ya, rä dada ꞌne rä nänä ꞌmai getbu̱ ꞌne xa di johya, ¿gi pädi por hanja? Ma gä handihu̱.

Rä dada nuni nxutsi rä thuhu Jairo. Nuni ñꞌo̱ho̱ mi pe̱ꞌtsi nꞌa rä däta nsu. Nꞌa rä pa, rä tꞌixu nuni ñꞌo̱ho̱ bi hñeni. ꞌNe ngu bi thogi yä pa mänꞌa xa bi ziꞌti rä hñeni. Jairo ꞌne rä ꞌme̱hñä xa bi duyämu̱i ngeꞌä mi handi ge ya ma xä du näꞌä rä nxutsi, ha xi ho̱nse̱ꞌä mi pe̱ꞌtsi. Hänge Jairo bi ma bä honi rä Hesu ngeꞌä xki yꞌo̱de de nuꞌu̱ yä milagro xki ja.

Nuꞌmu̱ Jairo bi zo̱ni habu̱ mi yꞌo rä Hesu bi hyandi ge ndunthi yä jäꞌi xki fahni. Pe Jairo bi thogi asta habu̱ mi ꞌmai rä Hesu, bi ndandiñähmu ꞌne bi ꞌñembi: “Mä zi nxutsi xa di hñeni, di bänteꞌi gi ma guä o̱the”. Rä Hesu bi ꞌñenä ge hää ma xä ma.

Mientra mi yꞌo rä Hesu, yä jäꞌi mi ntutsꞌitho ngeꞌä gatꞌho mi ne dä uatꞌi rä Hesu. Nse̱kitho rä Hesu bi mꞌai ꞌne bi ñꞌani: “¿Toꞌo bi dani mä hee?”. Rä Hesu bi za ge xki ꞌme̱di rä tsꞌe̱di hänge bi bädi ge ja toꞌo xki dani. Pe, ¿toꞌoꞌä? Nꞌa ꞌme̱hñä mi pe̱ꞌtsi 12 nje̱ya de mi hñeni. ¡Ho̱nse̱ bi dani rä hee rä Hesu, bi hogi de rä hñeni!

Jairo xa bi johya nuꞌmu̱ bi hyandi ge rä Hesu mi o̱the yä jäꞌi. Pe nguntꞌä bi zo̱ho̱ nꞌa rä ꞌme̱go ꞌne bi ꞌñembi: “Ya ogi mfada rä Hesu, ri tꞌixu ya bi du”. Mi yꞌo̱de rä Hesu bi ꞌñembäbi Jairo: “Ogi turimu̱i, ri tꞌixu ma dä hogi”.

Mi zo̱ni rä Hesu ha rä ngu Jairo, yä jäꞌi xa mi zoni ko rä dumu̱i. Pe rä Hesu bi ꞌñembäbi: “Ogi zonihu̱, näꞌä zi nxutsi ähä, hinxä du”. Pe nuꞌu̱ yä jäꞌi bi denitho rä Hesu ngeꞌä nuꞌu̱ mi pädi ge näꞌä nxutsi ya xki du.

Rä Hesu bi yu̱tꞌi ko rä dada ꞌne rä nänä näꞌä nxutsi, ꞌne hñuu de nuꞌu̱ yä apostol pa habu̱ mi ꞌme̱ni näꞌä nxutsi. Rä Hesu bi mipäbi rä yꞌe̱ näꞌä nxutsi ꞌne bi ꞌñembi: “¡Nangi!”. Ja ngu gi handi ha rä kꞌoi, näꞌä nxutsi bi nuhu. ¡Bi mꞌai ꞌne bi mu̱di bi ñꞌo! Hänge rä dada ꞌne rä nänä xa bi johya.

Pe rä Hesu ya xki gu̱tsꞌi märꞌa yä jäꞌi de rä du. Mꞌe̱tꞌo, ha rä hnini Nain xki gu̱tsꞌi de rä du rä metsi nꞌa zi biuda. Mꞌe̱fa, rä Hesu bi gu̱tsꞌi Lasaro de rä du, näꞌä mi rä ku Märia ꞌne Märta. Xti zo̱ho̱ dä mända rä Hesu ha rä tsꞌu̱tꞌhui Äjuä, ma dä gu̱tsꞌi xi ndunthi yä jäꞌi nuꞌu̱ xä du. ¿Hänge xa di rꞌakägihu̱ ndunthi rä johya?